爸爸的強大基因 陳智燊首公開仔仔正面相：鼻大口大似我
撰文：Sunday Kiss 圖片：陳智燊宋熙年IG
首公開仔仔正面相
兩位新手爸媽一直忙緊照顧BB，甚少喺IG分享BB嘅近況。今日陳智燊少有貼兩張咗B仔相，留言問大家「BB似邊個多啲」，而他認為BB眼仔似媽咪，鼻仔同嘴仔似自己，仲叫大家估下耳仔似邊個。
陳智燊又放咗一張影住仔仔腳帶嘅相，留言話「我們會一直牢記2018年，由二人變三人家庭一年。我們現在有了一個屬於我們嘅兒子，又或者是屬於 Sarah嘅兒。」
一索得男 母子平安
日前31/8 陳智燊宋熙年同時更新IG，原來佢哋嘅愛情結晶「Boss baby」，已經出世喇！仔仔重6磅非常健康！Sarah PO咗一張Jason抱住BB嘅相，慈父相表露無遺！
同時Jason就PO咗一樣同BB頭貼頭嘅相，個樣勁冧，仲話好多人都話個仔同佢似樣，咁即係大個都會係一個靚仔啦！
新手爸爸Jason在訪問中表示，心情好興奮。上個星期老婆仲係大住肚，BB而家出咗世，成件事唔知點去消化，覺得好得意、好神奇！而佢亦都有陪老婆入產房，過程好順利！
新手爸爸覺得好充實
Jason日前出席活動時，個樣都明顯好攰，佢話BB而家兩個星期大，試過幫BB沖涼，雖然自己都幾驚，但係對BB嘅喊聲都冇厭倦感覺。而家出親去做嘢都會好掛住BB，放工唔係返屋企，就係去買BB嘢，日常生活已經離唔開BB，好充實！
BB尚未改名
報導指，Jason仲喺醫生傍住之下，幫囝囝剪臍帶！佢話當時好似剪綵咁，醫生仲叫佢影咗相先！剪完BB仔冇事，佢自己都冇嚇親。Jason覺得BB瞓覺個樣好甜，好似媽咪，不過朋友就個個話BB 似爸爸。
想再追一個女
「Boss baby」而家就仲未改名，但已經同媽咪一齊返咗屋企，兩個都食得瞓得！Jason話Sarah想再生多個女，嚟緊佢哋會再好好計畫吓！
新手媽媽容光煥發
早前Sarah至喺IG出PO抒發產後嘅感受，仲話自己身形同個樣都未「還原靚靚」，但係尋晚Jason就喺IG PO咗Sarah張個人大頭相，就見到Sarah容光煥發，又冇水腫又冇起斑，精神又好好，就好似Jason咁講，好Amazing呀！
慶祝結婚兩周年
另一邊箱，Sarah就PO咗張恩愛放閃相，仲話好感激老公皇恩大赦，畀佢放監3個鐘，同埋畀佢着番5個月冇着過高踭鞋，同佢一齊扮靚靚食呢餐結婚兩周年飯！
不過始終都仲未坐完月，食完好西，又要返去繼續坐⋯⋯月喇！
「我而家唔似相中人！」
而家正喺度坐緊月嘅Sarah，9月13日喺IG發文，直言一直都知道「為母之路」唔易行。懷孕只係一個開始，不過佢覺得好幸運，由懷孕到生產都好順利。不過產後呢幾個星期，對佢自己嚟講就好有挑戰性，因為可能身形樣貌都仲未回復（佢話：我現時唔似相中人）。為餵母乳都做好不眠嘅準備，但係之前冇人同佢講過，產後嘅腫脹、出汗、憂鬱等等嘅情況係會咁嚴重，加上傷口又未復原，又熱（可能因為坐月唔吹得等，所以要著長袖衫！）一切一切一都將佢昔日嘅魅力打倒！但係係乜嘢令佢覺得呢一切都係值得？就係當佢抱住BB嘅同時，老公一樣都抱住佢！ 講咗咁耐，原來都係放閃㗎！
