盲聾跑步好手 化身猛龍出征

6歲變單眼

來到斧山道運動場，完全失明的莫儉榮 （Kim）牽着聽障者吳立康（Michael）手臂練習跑樓梯，正備戰跑樓梯比賽。初期，他們不算太合拍，Kim需要慢慢跟着Michael的節奏，配合步伐，跑多幾次，彼此熟悉對方節奏，開始加快跑速。到練習後期，他們跑得十分快，完全不為意他們是殘障者。是次比賽的領隊是莫儉榮，他發起的「猛龍隊」，將有十位成員分成兩組，參加「匡智競步上雲霄」跑樓梯接力比賽，挑戰1,688級樓梯賽程，目標登上75樓頂層終點。報道刊出後，比賽剛完結。

莫儉榮積極樂觀，經常說笑，是隊中的核心及開心果。回想44年前，少不更事的他，家住在黃大仙木屋區，沒有鞋着通山走，到後山捉金絲貓為樂，父母忙着搵食，孩子只能天生天養，絕不是金叵蘿。完全失明的莫儉榮回想6歲時，右眼突然喪失視力也不以為然。「盲人世界，單眼佬就是王！”In the Land of the Blind, the OneEye is King. “記得6歲時寫寫吓copybook，右眼好似突然熄燈。父母掛住搵食，阿爸做散工木匠，阿媽做車衣女工，屋企有四兄弟，我排第三，無時間理我。有去油麻地睇過眼科，醫生講過做手術，但沒有接受教育的父母怕手術危險，認為是小事，自自然然就會冇事。加上當時仲有左眼，單眼只係影響立體感、平衡感， 有時行路不太方便，基本都無咩事。村內小朋友最多搵嘢掉我、笑我盲，我當時無特別唔開心。」

13歲全失明

說年少的Kim已經像現時般大無畏？才不是！他只是不知道自己將大難臨頭。直至13歲那年，他終於知驚。「細個讀心光盲人學校，我算是視力好，某一日，弱視同學撞倒我，左眼視網膜脫落，變成完全失明，當時好灰好灰。記得雙目失明第一次過馬路，差.害死同學。我跟住高我五、六級師兄，他同樣完全失明，但早就習慣用聽力聽車聲，佢帶我過馬路，我當時好驚大叫，影響佢判斷力，我.企.馬路中間，感覺到面前近距離有車駛過。」Kim跟死神擦身而過。
13歲少年本是風華正茂，跟朋友踢波嬉嬉哈哈過日子，視網膜手術失敗，注定Kim的世界從此變得黑暗。「失明後，我覺得人生咩都無，灰.成一年，直至俾我接觸到小說。完全失明前，我沒有認認真真學凸字，當我凸字摸得快.，開始睇好多書，包括《孤星淚》、莎士比亞《哈姆雷特》、狄更斯作品等等，就好像《孤星淚》話我知︰一切快樂就係做番自己，令我覺得原來世界沒有變。」閱讀世界之趣，叫眼盲的Kim心不盲，擴闊了視野，狼吞虎噬學校圖書館內的點字書，即使當時沒有點字辭典，但Kim仍想辦法理解故事情節，遇上不明白的英文，厚.臉皮追問師兄姐。書中自有黃金屋不是無道理，後來Kim讀.讀.，更栽進歷史世界，發掘到更多借古鑑今的大道理。此外，他的英語更突飛猛進，成績優異，更被推薦入讀傳統名校聖保羅書院。

跟同學觀星看默劇

現時的莫儉榮職銜、經歷多多，雙目失明膽粗粗去跑半馬拉松、參加毅行者，又曾代表香港參加殘奧會立定跳遠賽事，又籌劃盲人觀星傷健營。他回想一切，都是源於高中的經歷。昔日盲人入讀傳統名校屬很少有，Kim靠努力成為其中之一。「St. Paul’s College.重培訓學生成為社會領袖，入讀前，我只鍾意閱讀，St. Paul讀書時嘗試好多以前未做過.事。盲.我竟然做.觀星學會副主席，講笑咩？後來，同學啟發我，講笑話Joint school觀星梗係唔望天，望隔籬個女仔。觀星唔只望天，最重要係知道星座名字、故事，締造浪漫感、溝通機會。生命快樂與否係視乎有無浪漫感！」Kim口中的浪漫感當然不是直指追女仔，而是寓意在人生中懂得時刻發掘意義、趣事。

當很多視障人士看輕自己，甚至旁人都認定他們一事無成、沒有將來。Kim的行動打破以上「定律」。「讀St. Paul時，有次同學帶我睇戲，點知係睇默劇，好似打我一拳咁， 玩我？崩口人忌崩口碗。點知個同學同我講︰『Kim，我無當你係盲人，覺得你係普通人，你可以感受.氣氛，要大膽衝破心理關口。』以上事對我影響很大，高中畢業後，95年，放棄當時月薪二萬幾公務員工作，唔做接線生，31歲人走去報讀浸大社工系，有太太支持外，想起就是讀書時期.經歷鼓勵我。」

首位盲人註冊社工

Kim現時是非牟利組織香港傷健共融網絡主席，並擔任社工。「唔好睇我依家咁多嘢講，好似唔怕醜，其實我讀社工時，要見輔導員，衝破自己、克服自己，好似依家咁係訓練出嚟。我喜歡對人嘅工作，做社工唔係話要用我自己經歷，幫番傷健人士，服務對象當然有視障、聽障者，亦有健全人士。」確實，見香港傷健共融網絡計劃多多，包括為香港大學開發「去街易」app提供協助，讓殘疾人士可透過資訊科技改善生活。此外，他們成立了「富二代教育基金」，專為殘疾家長的健全子女提供功課輔導和其他學習機會。Kim笑說，如果筆者或攝影師日後搵唔到工，可以找他幫忙。傷健人士無論是視障、聽障或是其他問題，面對病患，需重新適應社會，總會束手無策，有的甚至選擇逃避，自行隔離避世。為了鼓勵傷健者重新走出來，Kim於2011年擔任香港傷健共融網絡主席時，同步發起組成「猛龍隊」，主要招募視障、聽障者加入隊伍，一起參與長跑運動，後來其他傷健人士如精神病患者，又或是健全者亦可加入，現時成員約有80人，建立及推廣傷健共融。

聽障領跑員拍住上

擔任Kim領跑員的吳立康（Michael）是猛龍隊的成員。6年前因傷撞到後腦而損害了聽力，現時靠人工耳蝸協助，大約剩下五成聽力。一直喜歡跑山的他，不曾因聽障而放棄熱愛的運動，更加入猛龍隊成為主要領跑員，成為Kim及其他視障者的眼睛。「聽力受損影響我平衡力、方向感，有時行路左搖右擺，但我無想過放棄運動，我好鍾意運動，尤其跑山，雖然跑山相對跑公路或者馬拉松危險，但大自然風景好靚，而且路段多變，很好玩。我聽力變差後，有研究用8字跑法，避免左右擺，克服咗好多。」在旁的Kim大讚Michael是很好的領跑員，體力勝過他。Michael解釋：「領跑員體力要再好啲，因為我嘅角色係照顧跑手，留心觀察隊員身體狀況。好像我跟Kim練跑樓梯，夾咗手勢，當佢手向上下擺表示慢一點，而向外撥代表加快。我一定跑先半個身位，他貼着我手臂就好。」他倆同時表示：「挑戰15層樓梯，沒問題！」報道刊出之時，「匡智競步上雲霄」跑樓梯大賽已經於10月11日結束，首次參加跑樓梯大賽的Kim與Micheal，均表示成績結果不重要，最緊要是勇於挑戰自我，代表傷健人士，向大眾展示力量，不低估、不放棄自己之餘，更可以付出更多，為其他社會有需要的智障人士出力，展示猛龍精神，毋懼前路恐懼，將傳說中的「TheFearless Dragon」躍然現實中！

●撰文：Esther Ngan

●攝影：黃大立（部分相片由受訪者提供）