立法會選舉 候選人 馮檢基18年追妻史
撰文：Ling
攝影：Killy Sung（部分相片由受訪者提供）
場地：Assaggio Trattoria Italiana@香港藝術中心（Tel：2877 3999）
兜兜轉轉，兩人18年後35歲才走在一起，幸得上天眷顧，婚後育有一子馮本一（Benny），現已22歲大學畢業，踏上戲劇之路。回想當初，敏慈沒有後悔太遲接受丈夫，「當兩個人嘅關係未說服到自己、未感覺得自在，係唔會結婚，我哋要用咁多時間去發掘大家，兜兜轉轉再重遇上，一切都係上天安排。」
堅持愛一個人 沒有原因
「有啲嘢係控制唔到，唔知點解好記掛，好持久。」能堅持去愛一個人，其實沒有原因，就是內心想去愛她，就去愛她。 1974年，基哥與敏慈為大學同班同學，相識不久就被她的文藝氣質所吸引，自此深深愛上，兩人之後一起參與社會科學學會，基哥為副主席，敏慈是秘書，彼此成為了好友。基哥自幼家貧，讀書之路波折重重，升上大學後又忙於搞學生活動，考試屢次肥佬被踢出校，敏慈協助他寫上訴信，希望改為留班，她竟然寫到喊。「當時我只係覺得佢好慘，點解讀書有咁多波折。」基哥把握機會，第一次向她示愛，可惜不獲領情。「我對佢只係產生憐憫，絕對唔係愛情。」敏慈回想道。
時間 不能沖淡一切
馮檢基在學校和工作上，擅於說話、辯論、做話劇，但一見到敏慈，心情便非常緊張，說話結巴，令兩人難以溝通。基哥被踢出校後，轉到英國留學，赴英前表白過兩次被拒，打算留學三年後會淡忘她，但原來時間不一定沖淡一切。「我以為會變晒，佢可能會拍拖結婚，我會喺英國識到其他女仔，點知係唔得，當我去到識到啱傾嘅女仔，甚至有機會發展，佢個影又出返嚟，好似種咗喺腦裏面。」基哥當年在英國邊讀書邊在餐廳打工，餐廳老闆很照顧他，怕他寒冷送睡袋，借錢給他交學費，畢業前更挽留他工作，「佢仲話可以俾錢我做生意，幫華人申請福利。」基哥婉拒好意，決心返香港見敏慈。
三年日夜盼望，返港後再約會敏慈，到第四次表白，敏慈勸他死心，以後不要再見面。「嗰次真係好唔開心，之前三次我都可以投入番工作，但嗰次唔得，成個禮拜失魂落魄。」信奉耶穌基督的他，質疑耶穌為何沒有為他指點迷津？「如果佢唔係我另一半，你幫我解結呀；如果佢真係我另一半，你幫我搞掂佢！」他決定去耶路撒冷與神理論。
遊走以色列開竅 18年開花結果
馮檢基沿着耶穌30歲開始傳道的路線行走，當走到客西馬尼園，突然感到一鼓強烈訊息，「當殺死你嘅人都可以原諒，你仲有咩擔心牽掛？心中有恕先係真愛，人哋呃你、鬧你、打你兩巴都冇所謂。」他的腦海突然開竅、放鬆，敏慈的影子亦開始淡化。
返港後他仍當敏慈是好友約見面，但心態已放開不少，不介意被拒絕，「以前搵佢真係想見佢，唔答應嘅話我個心會乸住；但當時佢一唔睬我，就好似扑散我內心石，愈來愈少唔開心。」敏慈開始發覺他有轉變，覺得彼此能溝通，1986年，兩人在藝術中心一間餐廳見面，天南地北談天12小時，由3pm傾到3am，正式打破隔膜，關係邁進一大步。「就算冇可能，唔代表我會放棄。」一句說話，敏慈窩心地照單全收，1992年，戀情終於開花結果，兩人拉埋天窗。
兒子默書差 小手肌發展慢
兩人婚後渴望組織家庭，但有感年紀大未必如願，已計劃領養小孩，不久卻喜獲上天眷顧，1994年誕下兒子本一。敏慈讚丈夫是一個好爸爸，不過他工作忙碌，教仔的重任落在她身上，多年來的教育之道就是讓兒子多嘗試，音樂、運動、語文統統都玩過，從中找到了運動的興趣。「個仔冇得迫，試多啲會睇到佢邊啲有心做，好似佢鍾意踢波做龍門。唯獨我想迫佢學游水，因為係求生技能，每年暑假單人班、群體班都上過，都係迫唔到，佢真係冇心機學。」敏慈最驚喜是發現兒子喜歡英文，睇卡通片自學生字，「佢睇卡通片係睇英文對白，從中學到好多字，所以佢作文寫到好多深字。」
基哥對愛情堅持，敏慈對教仔亦有一份堅持，每日接送兒子返學放學及睡前講故事，直到小學四年班，「有幾本已經讀到爛晒，佢都唔會厭，四年班佢10歲，之後佢開始大個，可以慢慢獨立。」
棄名校 讀IB新校
本一就讀沙田具口碑的傳統小學，因適應問題及欠缺活動，小學生涯並非十分快樂，敏慈說：「佢冇乜機會參與活動，唔係好投入，只係參加舞獅表演，當佢有機會做小司儀，又因太緊張表現差，令佢自信心低落，老師亦冇再俾機會佢。」
兒子的最大問題是中文默書成績差，經常整句漏空導致不合格，一次敏慈看兒子在開學前一篇周記，寫到升班後很害怕中文，格仔簿的格仔更細，經了解後原來兒子的小肌肉發展慢，令寫字速度慢，默書時就跟不上老師的朗讀。四年班的老師得悉他的問題後，每次默書皆為本一特製答題紙，放大格仔，並預先寫上「的的了了」，只要求他默寫重點字眼，自此本一的信心大大提高，敏慈非常感激老師的因材施教。「小朋友有困難，家長未必知道，如果我早啲知就更好，四年班先發現係遲咗啲。」
普遍家長都以為IB課程彈性、少功課，敏慈認為IB課程毫不簡單，並形容IB是長途賽、傳統課程為短途賽，「從一個功利角度睇，IB課程嘅投入與支出係不相稱，要投入好多effort，但考得好絕不容易。反而傳統課程着重考試一剎那，平時烏呢單刀都冇所謂。」
兒子投身 戲劇藝術
敏慈有感兒子不適合讀傳統學校，而且校內競爭大，即使升中時有機會入讀一間傳統名校，她決定放棄轉讀一間創校僅兩年的IB學校，這一博徹底改變本一的人生，更發掘到他對戲劇的熱誠。「當時學校只係開到中二，全校唔夠200人，所以人人都有份參與sports day同其他活動，佢玩得好投入，直到中四佢仲競選House Captain，爸爸有教佢點拉票、寫政綱。」
正因在IB學校多參與戲劇表演，自此本一與戲劇結下不解之緣，從台前、幕後、導演、燈光，每一個環節也投入學習，直到赴英升讀大學亦鐵定主修戲劇。前年他在大學創出代表作，由他策劃下，與30位同學合製第一次世界大戰中，英軍戰壕的紙製藝術裝置，吸引了BBC等多個媒體報道，英國空軍更提出永久收藏，令他感到自豪。本一今年大學畢業，考慮回港發展，但香港的戲劇藝術工作不多，西九文化區又未落成，將來前路茫茫，但基哥對兒子非常驕傲，雖然兒子的科目「冷門」，非賺大錢的行業，但能夠讓兒子發揮所長、學有所成，才是父母的重任。
馮檢基 為2016 立法會選舉 新界西候選人，其餘參選人包括黃潤達、尹兆堅、高志輝、周永勤、鄭松泰、鄺官穩、田北辰、何君堯、梁志祥、郭家麒、黃浩銘、李卓人、黃俊傑、麥美娟、陳恒鑌、張慧晶、呂智恆、湯詠芝、朱凱廸，合共20張名單。
Save
Save
Save
