章子怡談與繼女首見面：骨子裏心疼她

撰文：Kammy｜圖片來源：Instagram、節目截圖、微博

章子怡：骨子裏心疼她

不少人對繼母印象負面，認為佢哋同灰姑娘嘅繼母一樣，只係會愛錫自己嘅子女，刻薄繼女。不過，現實中其實都有唔少「好繼母」嘅例子，好似係章子怡咁。章子怡同老公汪峰於2015年結婚，佢哋除咗育有一女醒醒之外，仲有撫育汪峰同前妻葛薈婕所生嘅囡囡小蘋果，而子怡更一直當小蘋果視如己出咁咁愛錫。

近日，章子怡參加內地綜藝節目《妻子的浪漫旅行2》，佢喺節目中表示，過往一直都飾演好多硬朗角色，但其實係其他人唔了解佢，佢本身係一個好識照顧其他人，生完小朋友後更母愛爆棚。

其後大談同小蘋果嘅關係，有人大讚子怡跟小蘋果相處得好好，不禁讚嘆「很不容易」，章子怡聽完後就透露對方從未排斥過自己，而自己就「很心疼她，骨子裡心疼她」。

首次見面 以「媽媽」稱呼章子怡

章子怡第一次見繼女小蘋果時，對方一開始就接受佢仲已經叫佢做「媽媽」，令子怡開心不已。子怡仲話，當時小蘋果仲好細，但依家身高已經超過一米七，仲高過自己。當時子怡講呢番話嘅時候，臉上仲充滿驕傲與幸福，睇得出佢真係好愛錫小蘋果。

汪峰怕囡囡為了自己而忍耐

汪峰亦表示，第一次帶小蘋果去見章子怡見面時，曾經同囡囡講：「有任何你覺得心裡覺得彆扭的，你都告訴我，沒有問題」，希望小蘋果唔好因為自己或子怡而自己忍耐。

汪峰大讚老婆：讓她感受到媽媽的愛

其後，汪峰亦大讚老婆，「她（章子怡）在很多方面讓熙熙（小蘋果）感受到媽媽的愛，這一點是完全沒有任何人可以代替的，但又是熙熙最需要的。我從熙熙身上發生的事情，我就明白了一個道理，有的時候陪伴比血緣還要重要。」