造人成功懷第二胎 應采兒相片露餡 Jasper有妹妹啦！
廣告
陳小春應采兒結婚已有8年，近年二人頻頻上大陸綜藝節目曬恩愛，仲成日帶仔仔Jasper上節目㖭！Jasper早前就同大陸綜藝節目嘅工作人員表示好想要個妹妹。而根據應采兒早前喺微博post嘅相，有眼利嘅網民發現應采兒身邊有一罐孕期用嘅維生素，網民推測應采兒應該再次懷孕，Jasper 好有機會夢想成真喇！
撰文：叮叮｜資料來源、圖片：應采兒微博、Instagram ｜編輯：YIU
應采兒疑有喜
應采兒喺12月8日post 咗一張相上微博，相片內容係話：「做遊戲都要有隊友，我采鵝隊已經有隊友啦，那另一隊呢？」，單係睇相片內容可能會以為應采兒講緊打機嘅隊友，但有網民睇清楚幅相之後就另有睇法喇！事關相片入面有一罐孕期用嘅維生素，網民紛紛起哄，推測應采兒終於懷有第二胎，Jasper終於有隊友喇！網民仲話應采兒今胎一定係女，一圓Jasper想要個妹妹嘅心願。不過部分網民就有其他睇法，認為罐孕期維生素可能只係賣廣告用，或者備孕期間用，指應采兒身邊有罐孕期維生素唔一定係有咗。
合照肚凸惹懷孕猜測
其實除咗罐孕期維生素之外，早前應采兒喺Instagram post嘅一幅同鄧麗欣嘅合照已經引起網民揣測佢係咪有咗。事關相片中嘅應采兒著住一件頗為鬆身嘅衛衣，雖然衛衣並唔貼身，不過應采兒嘅肚似乎都有啲凸凸哋。有網民就留言話：「肚子圓圓的。」、「采兒姐要生妹妹了嗎哈哈哈。」一方面有網民留言指應采兒係咪再次有喜，另一方面亦有網民護航話可能只係條裙嘅褲頭位凸咗出嚟啫。
應采兒一直準備懷第二胎
早前應采兒同丈夫陳小春一齊接受專訪，二人合體難免被問到生第二胎嘅進度。應采兒首先就一反大笑姑婆嘅風格，好怕羞咁話：「就…可以準備啊。」喺隔離嘅小春就諗住搭嘴：「上禮拜……」小春未講完，應采兒就自爆：「上禮拜準備了一下！」果然，大笑姑婆應采兒唔會令人失望，總係會講啲出人意表嘅說話，惹人發笑。雖然唔少網民已經認定咗應采兒已經懷有第二胎，不過現時應采兒夫婦尚未正式認證懷孕嘅消息。我地就耐心等待佢哋宣布好消息啦！祝Jasper早日得償所願，媽媽早日生個妹妹嚟陪你啦！
