細So太太 堅持餵 母乳 至2歲

撰文︰Ling
攝影︰Clay Lam

全職媽媽每日埋身餵

餵足廿幾個月 母乳 殊不簡單，Wing能堅持至今是因為有個好開始，懷孕時上過 母乳 班吸取知識，到BB出世後沒有驚慌，幾日後開始上奶，並當上全職媽媽每日埋身餵，久而久之養成習慣。「母乳班嘅導師有好多年經驗，佢話每個媽媽都係夠奶，只係開頭上奶人人唔同。頭幾日大家都會話冇奶，醫院姑娘又係咁話你唔夠奶，搞到BB食唔飽，叫你補奶粉，導師叫我哋千祈唔好咁做，其實初生BB個胃只係一粒波子咁細，唔使食好多奶都夠，可能啜到幾啖就得。」

Jack仔出世頭幾日，Wing未上奶，醫院姑娘多番建議她補奶粉，否則每個半小時就要餵一次，她寧願不睡覺都要餵母乳。「一開始餵咗奶樽，好多BB都唔肯埋身食人奶㗎喇，因為啜奶樽好易。如果從來都冇餵過奶樽，BB就知道要有力度先食到嘢，刺激到媽媽上奶。」

推介三款茶水助上奶

Wing介紹各位想餵母乳的媽媽多飲三款茶水助上奶，包括扁豆衣水、米水、炒米茶，「扁豆衣水去水腫、修身快；米水就用紅米、白米、薏米煲；仲有陳皮同炒米煲嘅水，主要係飲呢三樽， 每日飲2L，加埋魚湯，冇飲凍水，好快啲奶就源源不絕。」

拒叫大仔做哥哥 老婆做媽媽

Jack仔2歲幾終於斷奶，9月剛度過了3歲生日，成為大哥哥。不過細So在兩子面前不會稱呼他們做哥哥、弟弟，連叫老婆都不會叫媽咪，他解釋道：「佢係我老婆，我唔係咁想叫佢媽咪，掉番轉我都唔想佢叫我爸爸，如果佢要我負一個爸爸責任嘅時候，係關於小朋友而叫我爸爸就OK，唔知係咪我諗多咗啦，但呢個係我嘅家規。同樣應用喺兩個仔身上，Jack仔先得3歲，咁快就要佢負上哥哥責任，即係咩呀？佢連做一個小朋友嘅責任都未識，所以我依家唔會叫佢做哥哥，要佢教細佬、讓細佬，慢慢我先再教佢。」

細So在教仔方面有一套新思維，以尊重子女為大前提，家長並非永遠是對的，「唔可以下下用家長身份壓佢，如果小朋友一曳就鬧，佢只會愈來愈反叛。」眼前的Jack仔對爸爸好黐身，訪問尾聲細So要返工，Jack仔即攬實爸爸不欲他離開，Wing在旁解釋道：「爸爸乜嘢都問到督，要了解個仔做呢個行為、點解扭計個背後原因，其實佢自己都未必知，要狂問佢慢慢搵個答案。試過有次臨瞓前我哋叫佢去廁所，唔係就會瀨尿，佢死都唔肯去，佢話唔急，大家一哭二鬧三上吊，除晒褲坐喺廁所都唔肯屙，佢同爸爸講真係冇需要，我哋決定信佢，結果佢真係冇瀨到，所以小朋友真係冇得迫，一定要尊重佢哋嘅想法。」