網民將兩個女比較 陸永嫂：兩個女都醜
撰文：Sunday Kiss｜圖片來源：missussix@ig
網民將兩個女比較 陸永嫂：兩個女都醜
陸永嫂Reina日前喺Instagram post咗細女sim sim準備學校表演嘅相，好多網民都讚sim sim好靚女好可愛，但係其中一位網民留言話「Hannah靚好多」，搞到陸永嫂親自回覆反擊「我冇辦法改變你同其他人嘅睇法，但我覺得我兩個女都好靚… 佢哋兩個唔係倒模出嚟，所以各有特色。幾靚都好，外面有更多人比佢哋靚，一山還有一山高，成日比嚟比去，唔辛苦咩？外人點將佢哋比較都好，都改變唔到我，兩個都係我生嘅，我只會講「兩個都靚」或者「兩個都醜」，完。」
媽媽眼中囡囡/囝囝都係最好！
有啲人可能覺得網友只係講咗一句「Hannah靚好多」，陸永嫂會唔會太大反應呀！但喺媽媽眼中，每一個仔女都係自己嘅寶貝，每一個仔女都咁可愛不分上下，外人又憑咩批評自己寶貝女/仔呢！其實sim sim 同Hannah 都各有特色，而且仲好乖，細細個就識得感恩，依一點好多大人都做唔到呀！
細細個就學識感恩 陸永嫂：從兩個囡囡身上學懂更多
早前，陸永太太Reina分享了一段開車載著兩個囡囡的影片，當兩個囡囡面對烈日下卻站在路邊指揮交通的警察時，感到疑惑並問：「媽咪，警察企喺度做咩？」Reina並沒有多想，就回答：「交通燈壞咗，喺度指揮交通，如果冇人指揮交通，可能好容易撞車，或者撞到過馬路嘅人。」
聞言的兩個囡囡，舉動令媽媽意想不到，Reina留言話：「兩姊妹吱吱噚後，叫我開窗，話等陣有嘢同警察講… 講完之後，佢哋問我: 「點解冇人同警察講唔該？」 我沉默左幾秒… 勉強答「好多人都怕醜，唔敢講出口掛！」
「媽咪，我哋係咪好叻呀，我哋都唔怕醜！」
事後，Reina指「就喺啱啱上車前，因為我架車泊露天嘅關係，我撻著架車之後都上唔到車，我哋三個就喺烈日當空下暴曬，三個都大嗌好熱嗌辛苦… that’s why! 」而囡囡的小舉動，令作為媽媽的她倍感安慰，直言：「唔係我教得好 ，我喺兩個小朋友身上學到更多」！
點解你咁乖嘅？陸永大女的回答令媽媽倍感安慰
其實陸永嫂都唔只一次分享教女心得，早前佢就喺社交網站留言話：「成日忍唔住問Hannah 點解會咁乖，佢多數會笑一笑，答「我都唔知呀！」今晚又忍唔住問點解佢會咁乖，佢都係答唔知，今次佢講多一句「可能我乖你會開心，咁我就乖囉⋯⋯」
大女咁乖，怪唔知Reina都忍唔住Hashtag：#我覺得呢個真係一個超乖嘅小朋友#我上世到底做過啲咩好事 ！
睇完Reina的分享，網民紛紛留言話：
好幸福，有個又靚，又懂事，又錫媽咪，心地又好的女，等將來都想有
超乖女 咁細個就識咁諗
完全明白，因為我都覺得大女同細女好唔同，我大女都好懂事，我都一樣會經常忍唔住問佢點解會咁乖
想做個好榜樣比妹妹睇
其實Hannah咁乖，都係因為Reina教女有方！Reina早前就分享過當兩個囡囡嗌交時，點樣用一句說話就可以令兩姐妹明白對方有幾重要！
陸永嫂一句說話令兩個女和好
Reina亦分享兩個女Hannah同Simsim過海時，佢哋爭執嘅一幕。「中環到東隧，兩姐妹喺後座不停嘈，不停投訴，不停雞蛋裏挑骨頭… 出咗東隧之後，我就話：「好啦，你哋咁唔鍾意大家，一個搬去嫲嫲屋企住，一個搬去婆婆屋企住，以後唔好見啦⋯⋯」
兩個喊到攬埋一舊呢幕真係好感動！
Reina話之後返到屋企叫兩個女商量好，食埋pizza就自己執行李，再車走佢哋。因為Reina之後上咗房，所以唔知佢哋商量成點，但聽到佢哋喊住傾偈，於是就叫Maria收埋電話錄畀佢睇，發現感人嘅一幕。Reina仲驚大家聽唔明，幫手配埋字幕，連周家蔚都留言話要借鏡呀！
人真係要喺失去的時候先明白對方的重要，當Hannah同Simsim知道佢哋要分開住，終於明白對方有幾重要！
兩個女雖然有時候會吵吵鬧鬧，性格又各有唔同，但其實都好愛大家。媽媽Reina的IG發布了不少有關兩女的笑料，不時大爆可愛搞笑金句，就連平時講笑自己都唔笑嘅陸永都忍唔住笑咗出嚟，兩個囡囡嘅搞笑功力真的不遜於爸爸！
Hannah x Sim Sim 搞笑金句語錄
1. 我的志願
「我的志願」是每個小朋友的必答題／作文題目。當你預計小朋友的答案可能是警察、消防員、醫生甚至太空人時，Sim Sim的答案竟然是⋯⋯ 「 Hip hop！嗯⋯⋯hot pot！」陸永聽到後也忍不住問：「你想做打邊爐？」而Sim Sim就回答道：「打邊爐嘅人」。就連姐姐Hannah也忍不住反問道：「係咪佢癲咗？」小朋友的創意先至係最估你唔到！
2. 以癲為目標
原來Sim Sim被姐姐問係咪癲咗，係有跡可尋的～ 話說早前媽媽Reina就在IG再爆Sim Sim的笑料：「前幾日出街，我叫佢去梳下個頭先出門。『Sim， 你去梳下你個頭啦，成個癲婆咁。』佢話：「我覺得癲先得意，我唔梳啦！」。今日，佢唔係問：「我癲唔癲？」佢係問：「我夠唔夠癲？」。竟然會以癲為目標，Sim Sim真係好爆！
3. 食嘢大過天
從媽媽Reina的IG的分享上，可以看得出Sim Sim是一個很怕攰的人。有一次媽媽叫Sim Sim出廳玩，當時手上拿著一大包零食的Sim Sim竟然有得玩都唔去玩：「玩仲悶啊食野唔悶啊～」，然後家姐Hannah就突然出現，扮Do姐手指指著說：「你哋幾個低級呀！」，大家隨即也跟著大笑起來～ 其實幸福真係好簡單！
4. 想跳芭蕾舞的原因
有一次陸永問Sim Sim：「你想唔想做戲？」Sim Sim答：「唔想！因為好攰唷⋯⋯」陸永再問：「咁想唔想唱歌？」Sim Sim答：「唔想！因為都好攰啊⋯⋯」咁究竟Sim Sim想做咩？想不到她竟然說：「想跳芭『嚟』舞，因為可以趌高，同跳舞好好玩～ 但係我唔識跳舞⋯⋯ Bye bye la！」小朋友嘅無厘頭先係最開心嘅笑彈！
5. Sim Sim的辛酸史（？）
Sim Sim是一個很怕攰但又很健談的人，每天都有很多事情要跟媽媽分享。有一次車程途中她就跟媽媽分享她的辛酸史：「媽咪， 你知唔知我要做好多嘢啊？」當媽媽也好奇她有甚麼要做時，她說：「因為我要去廁所行路好攰⋯⋯ 填顏色好攰，我又唔記得填快啲無得玩滑梯⋯⋯」媽媽聽後無言，表示除了一句：「辛苦曬！」，已經不知可以再說甚麼了！（笑）
6. 燒嘢食的相反？
除了Sim Sim外，家姐Hannah間中都會爆出金句，就如有一次她想說「打邊爐」，但又忘記了怎麼說，結果她將之形容為「燒嘢食的相反」，搞到媽咪一舊雲！不過有些網友對於Hannah的形容表示十分認同，並分析道：「燒嘢食是用火燒的；打邊爐是用湯滾的」，兩者相反的邏輯基本上是成立的，更表示Hannah創意100分！Hannah其後再問媽咪：「媽媽，你記唔記得要個Pot加埋水同埋未煮熟嘅嘢，一齊放落去，係叫咩啊？」得到答案後，她終於可以問：「我想講幾時先打邊爐？」
7. 笑匠陸永也敗給兩個囡囡
Sim Sim的喜感爆燈，令爸爸陸永就連鬧人時都忍唔住笑。有一次兩女做錯事，本來在嚴肅地教導兩個女的陸永，因為Sim Sim不經意地露出令人發笑的表情，令他也忍不住問Sim Sim：「你咩樣啊？」然後發笑，更被兩女反問：「你笑咗喎！」。陸永平時講笑自己都唔笑，偏偏在教女時忍唔住笑！今次真係唔知好嬲定好笑，最終他只好回應一句：「我而家係嬲到笑啊！」
