胃癱少年 重拾滋味

十六年來從不肚餓

「我肚餓喇！」這句說話平常不過，有人一說出口，甚至會被揶揄：「你又想食？食少啲啦！」但此話出自陳志傑口中，寧舍珍貴，因為是自十六年以來，他第一次覺得肚餓。現年二十三歲的志傑外表與一般青少年無異，身高1.73米，體重大約57公斤，BMI（體重指標）是19，貼近正常範圍（20）。當他掀起外衣時，會發現其腰間有一道長約六厘米的手術疤痕，並凸出一部儀器，事緣他是胃癱患者，近日植入了一部胃起搏器。胃起搏器的運作原理與心臟起搏器相似，以電擊刺激胃部，恢復蠕動功能，促進消化系統正常運作，讓他能如常進食。志傑植入胃起搏器已九個月，之前一直只吃由母親煲的愛心靚粥及注射營養奶，手術後三個月，即半年前，他才重拾肚餓感覺。

美食當前 眼花繚亂

「醫生同我講過，植入胃起搏器後，預計需要半年適應期，先可以恢復正常飲食，我有晒心理準備，唔抱太大
希望，三個月左右，有一日喺屋企，我突然覺得肚餓，嗰下覺得幾得意，好平靜咁同阿媽講我肚餓，佢就走入廚房煮粥俾我食。」志傑表示當下沒有過分激動，可能覺得似夢又似幻。

如今，他依然很小心飲食，未有因恢復胃部功能而大吃大喝，因為十六年來一直折騰，如今像重獲新生，倍加
珍惜。筆者特意相約他到酒店邊吃自助餐，邊進行訪問及拍攝，他對於很多道菜式皆大感新奇，面對眼前的羊
架、青口、雞塊肉扒等菜式，他都說不知道是甚麼味道。接着，走到甜品枱，筆者鼓勵他隨意拿自己想吃的，他戰戰兢兢地說：「好少食甜品，因為果糖好難消化，之前唔敢食。好細個見到其他小朋友食糖，當然有扭計，但阿媽話好番先食……」筆者示意志傑拿起棉花糖沾朱古力噴泉，看其表情，就知他覺得很新奇。面對自助餐上各式美食，陳志傑像極劉姥姥遊大觀園。最後，他只吃了三碟食物就滿足了！

七歲起食量大減

十六年前，七歲的陳志傑開始出現腸胃問題。他努力地回想：「我記得七歲左右，去完學校旅行後，就上吐下
瀉，當時去診所睇醫生，以為係腸胃炎。之後，經常腸胃唔舒服，食唔到太多.，食完過.十分鐘就作嘔，經常出
出入入醫院，未有搵到咩事。有醫生話我有幽門螺旋菌，keep住一路食藥。當時屋企人就以為我體質差，因為
六七歲時，我曾經爆血管。」問題持續好一陣子，當時十二歲的他，更只有約廿七公斤，體重比同齡者輕得多，而志傑坦言當時年

直至十三歲那年，志傑才意識到自身健康問題的嚴重性。「有日嘔血，嗰下先識驚。再入院時，就轉介我去精神科，覺得我係焦慮問題，唔想返學。確實，當時我無咩點返學，一來成日入院，二來真係唔夠體力應付長時間上堂，怕血糖低隨時暈，不過實情係我好想返學，好怕住院。」

試盡中西醫 求神問卜

吃不到食物，固然就吸收不到營養，志傑從前經常疲累，一天可睡上十八、二十小時，又因抵抗力差而常感冒，根本沒精神及體力做任何事。「嗰刻已經唔係諗無得食好嘢而失去人生意義，而係只想維持身體，有力氣返學、喺屋企自修，唔敢奢望太多。」志傑是家中的獨子，父母十分疼愛他，只要有康復的希望，都願意一試，做過很多檢查，亦嘗試過偏方。「細個做過致敏源測試，發現對奶製品容易敏感。除了西醫外，有睇過唔少中醫，有親戚話鄉下有個好厲害名醫，一家人就坐一整日大巴返福建，結果跟其他中醫一樣，都係話我胃寒，要補多啲。入廟拜神都做過，甚至請過道士去屋企作法。」再看他胸口食道位置有一道長疤痕，是接受有關胃酸倒流的手術留下的。可惜，以上各種中西醫加偏方，均無改善問題。

插儀器吸收營養奶

接受植入胃起搏器前，志傑持續多年背着一包米重的儀器，邊靠鼻管餵食營養奶邊上課。他滿足地邊吃着壽司，邊回想吃流質食物的時期：「主要食粥再加插鼻喉，直接將營養奶注入腸道，營養奶係營養師配，要特登訂，大約一日注入八罐250cc營養奶，另外再加食少少粥，大約一碗仔。以前跟屋企人係分開食飯，阿媽會日日煲唔同粥俾我，好彩佢煮嘢食好好味，會用雞湯熬湯底，加人參、當歸、北芪等藥材煮粥，又試過煲魚粥，不過我怕魚腥味，就好少煮，有好多款式，食唔厭。」當時志傑的情況已較小時候好，而至2011年，當時志傑被轉介至威爾斯親王醫院跟進病情，由香港中文大學醫學院教授跟進，病情出現曙光。

一包紙包奶便飽

在香港，與胃癱相關的資料不多，志傑曾看過一則有關胃癱的報道，但從無聯想跟自己有關。直至轉介至威院，經醫生評估大半年，做「胃納測試」，發現他喝270毫升奶便飽，即約286千卡路里，較正常的600至800千卡路里少，出現嚴重早飽等情况，那時才確診胃癱。「當時發現問題所在，我都唔敢太開心，可能之前試過太多方法。不過，我依然覺得有希望。當醫生話可以植入起搏器，雖然要自費十萬，又屬於亞洲首例，但我同屋企人無顧慮太多，爸爸一直默默工作承擔我嘅醫療費用，今次同樣支持。」手術十分成功，胃起搏器已融入志傑身體，他未有覺不適，更可如常飲食，跟爸媽同枱吃飯，甚至跟同學老師食自助餐和打邊爐。

望重返校園讀醫護

往日，志傑體重試過最輕只有四十四公斤，去年初植入胃起搏器，體重慢慢上升，由五十公斤升至最近的五十七公斤。雖然體重仍屬偏輕，但已貼近正常範圍， 可喜可賀。「以前健康問題， 根本返唔足學，只能自修，可以話逢二進一，我依家廿三歲先讀中五，跟同學相差有八年。不過，好彩，我算讀到書，加上搵補習老師同自修，成績算唔錯。做醫生就比較難，但我希望日後做護士幫其他病人。上年中五時，學校安排我去文科，但我希望讀護理，自動建議由中四讀起，揀理科科目讀。」接受訪問時的志傑還未復課，他最希望可以盡早重返校園，珍惜當下，追回過去的十六載。

●撰文：Esther Ngan

●攝影：Simpson Chiu（部分相片由受訪者提供）