胡杏兒幸福人妻升格新手媽媽：想囝囝搵到自己興趣
撰文：Irene Lok
攝影：Killy Sung（部分相片取自胡杏兒IG）
服裝︰Max Mara/Marella
胡杏兒：想囝囝搵到自己興趣
杏兒自言不希望成為怪獸家長，囝囝尚年幼，性格有待進一步了解，她會因應囝囝的性格而選校，也有可能安排他去外國寄宿。她希望囝囝將來能夠找到自己的興趣，因為她深明做自己喜歡的事情，才能做得開心做得好。
感謝奶奶幫手湊B
早在囝囝出世前，杏兒已做好餵母乳的打算，她希望跟隨世界衞生組織的建議，至少餵六個月，認為對BB的免疫力及腦部發展較好。「人奶路確係難，我好幸運，屋企有人幫手，奶奶會落手落腳幫我湊，令我可以好放心，有多啲時間休息。休息得夠先有奶，奶量都唔錯。我頭幾個月好努力，儲咗好多人奶，有一個冰櫃嘅份量，算係幾自豪。」
堅持餵人奶 幾度塞奶崩潰
杏兒在餵母乳之初，也經歷過多次乳腺阻塞問題，她笑言曾經因此幾度感到崩潰，多得陪月幫她按摩通乳，過了一兩個月餵母乳已漸入佳境。現時囝囝是全人奶BB，「佢都好大隻，就嚟20磅重喇，我開始擔心自己奶量，唔知夠唔夠佢食，但我唔會畀咁大壓力自己，見步行步啦。」
準備為囝囝加入固體食物
囝囝差不多六個月，準備加入固體食物，杏兒已開始讓囝囝試食生果茸及粥仔，「我哋將蘋果茸放入奶嘴畀佢啜，佢鍾意食到如果你掹咗個奶嘴，佢會同你死過。我相信佢係一個好鍾意食嘢嘅人，好似我同我先生一樣。」杏兒盡量親力親為照顧囝囝的起居飲食，將來揀奶粉或其他嬰幼兒食品，她會選擇成分天然，最好有科研實證的產品。由於她在大學時修讀科學，所以也會從科研角度考慮，了解當中的成分。
捨不得離開囝囝太耐
由懷孕到生下囝囝，杏兒感覺自己工作上沒有怎麼停下來，坐月後不到幾天便出席產後第一個活動，慢慢全面復工。不過，她捨不得離開囝囝太耐，「要飛好長時間嘅工作暫時都做唔到。依家飛之前最緊要搵到啲酒店係有冰格，可以將我泵好嘅奶雪起，返嚟可以畀囝囝飲。」她亦隨身自備了一個小冰箱，方便冰奶。
與圈中媽媽分享BB經
在湊仔過程中，杏兒也有請教圈中的媽媽，她分享有跟同樣育有兒子的陳敏之交流，「敏之囝囝大個啲，已經識行，Linda（鍾嘉欣）都有同我分享。Aimee（陳茵媺）喺我差唔多生之前，錄咗好多音畀我，話畀我知生仔過程會點，喺我塞奶時又鼓勵我。大家都好好！以前大家多交流工作嘅嘢，依家通常會分享BB經。」
老公湊仔仲叻過自己
新手爸媽湊BB少不免手足無措，杏兒面對如粉團一樣的初生BB也戰戰兢兢，丈夫卻一副大無畏精神。「佢湊仔仲叻過我！因為佢之前同啲姪仔姪女一齊生活過。囝囝出世初頭，我好雞手鴨腳，驚整親BB。但佢好瀟灑，話畀我知『你咁樣嘛』，佢好自然就抱起BB，幫BB換片、掃風。」當然經歷了半年時間，杏兒對湊BB已上手。
奶奶是天賜的禮物
除了丈夫，奶奶的幫忙也加強了杏兒湊仔的信心，她形容奶奶是天賜的禮物。原本於英國定居的奶奶在她懷孕期間回港，日日煲湯照顧她的飲食，到她生完囝囝又陪坐月，亦決定留下來幫手湊孫。杏兒自言是一個乖巧的大肚婆及產婦，跟足傳統禁忌坐月，坐月期間每日飲最少三公升湯或水，沒令奶奶操心。奶奶曾煲鹿尾巴給她補身，雖然她對這種補藥有點抗拒，但她還是乖乖喝下去，免得浪費奶奶一片苦心。當她不在港時，囝囝就交由奶奶主力照顧。奶奶認為杏兒是慈母，但杏兒在囝囝出世前，卻認定自己將是一個嚴厲的媽媽，「我唔能夠接受佢曳，或者喺大庭廣眾扭計。不過，佢依家仲係BB，梗係要錫吓佢先，到大啲先再教。」
按囝囝性格揀教育路向
「我希望我唔係一個逼得小朋友太緊嘅家長，但又唔能夠完全放鬆。小朋友最緊要搵到自己嘅興趣，有鍾意做嘅嘢佢一定會畀心機去做，而且會做得好。」杏兒中學時期於愛爾蘭寄宿讀書，丈夫則在英國長大，她認為寄宿是一個不錯的選擇，可以訓練小朋友獨立。「BB未出世前，我哋會幻想會唔會中學送佢去寄宿，但BB出世之後，又唔捨得佢咁細個就要自己面對咁多嘢。」這明顯是母親的矛盾。
對於為囝囝選擇本地教育或國際教育，她還在考慮中，主要看囝囝的性格而定，身邊的朋友也給予不少意見，包括鄰居應采兒，跟她分享囝囝Jasper在國際學校讀書的情況。杏兒的丈夫來自傳統的客家人家庭，與奶奶在家說客家話，杏兒婚後也學會聽客家話，更識得說一點客家話。她希望囝囝接觸中國的傳統文化，能夠說中文，識得自己的語言。
望胡說八道會姊妹得到幸福
胡說八道會一班姊妹胡定欣、胡蓓蔚、李施嬅、黃智雯及姚子羚，都是囝囝的契媽，有五位契媽錫囝囝很幸福。杏兒說姊妹們很忙碌，平日各有各忙，但大家都會抽時間見面，或者來見契仔。「佢哋係好鍾意Brendan，見到佢啲相同影片都好開心。我成日同佢哋講，好希望佢哋快啲同我一樣踏入呢個階段，因為呢個真係好幸福好開心嘅過程。」胡說八道會中只有杏兒一人成為媽媽，但她不會刻意將話題圍繞囝囝，有時亦會跟她們分享生BB、餵奶等一些產前產後的事情，未為人母的姊妹們都感到新奇有趣。
婚後為顧及家庭，杏兒說難以如以前般為事業搏殺，但也希望有自己的空間，能在家庭及事業取得平衡。她與設計師朋友創立婚紗公司，稍後在上海開分店，因此她最近經常中港兩邊飛，忙到無時停。
勤做瑜伽修身
杏兒十二年前為演活《肥田囍事》中的肥田不惜增肥，雖然事後很快減肥成功，但她表示身體再不能像以前那麼容易瘦回來，因為脂肪細胞已經膨脹了，現在keep fit不像以前那麼輕鬆。不過，拍攝當日在場不少曾與杏兒合作過的人，都表示她比懷孕前更苗條。「生完之後怕影響奶量，所以冇做咩地獄式減肥，冇節食同做太劇烈的運動。我陀B嗰陣重咗三十磅，生完已經冇咗十磅，我覺得係水腫比較多。」其實她最近一個月才開始做運動，更跟圈內的瑜伽導師林芊妤（Coffee）學瑜伽，在這位魔鬼教練的訓練下，杏兒上第三堂瑜伽已經做到倒立。除了做瑜伽，她得閒也會做帶氧運動，務求保持定期運動量。
杏兒表明︰「嚟緊準備生第二個，唔會等太耐，唔想減完肥又再嚟過。」不久的將來應該會收到杏兒的好消息。
