胡杏兒大仔「化妝」好嬌俏 網民大讚：好得意呀！
撰文：Kammy｜圖片來源：胡杏兒Instagram，姚子羚Instagram
胡杏兒大仔「化妝」好嬌俏
胡杏兒日前就宣布已順利誕下細仔李奕霖（Ryan），仲上載一家四口手搭手嘅相，真係幸福滿瀉！呢日，胡杏兒嘅好姊姊姚子羚就去探訪佢哋，更分享同Brendan大玩自拍嘅相。期間，姚子羚仲幫Brendan用APP「化妝」，真係好可愛呀！
已升做哥哥嘅Brendan，呢日同契媽姚子羚一齊用APP自拍，加上卡通人物頭箍嘅佢，隨即對住鏡頭做個嘟嘴樣，十分得意！Brendan仲被濾鏡加上眼影同眼線，媽媽杏兒見到即留言：「Eyeliner（眼線）😅👁」，見佢加個滴汗嘅Emoji，睇嚟完全睇唔慣囝囝上妝嘅樣。不過，子羚就搞笑咁回覆：「u can try to help him makeup 🤣（你可以試吓幫佢化妝！）」
Brendan有一班「契媽sss」，包括「胡說八道會」的李施嬅、胡定欣、黃智雯、胡蓓蔚及姚子羚，佢哋好錫Brendan，仲成日畀Brendan嘅可愛樣電親添！
Brendan十個可愛瞬間
1. 幫契媽們攞手袋
Philip同胡杏兒一直都教Brendan要學做個「Gentleman」，呢日Brendan仲毫不忌諱幫佢嘅契媽攞手袋。其後，佢爸爸更留言話，囝囝經常都嘗試盡力去做每件事，雖然係好攰，但阿仔已經做得好好！
Philip仲寫咗十二個「H」畀Brendan，分別係：快樂（Happy）、健康（Healthy）、英俊（Handsome）、坦誠（Honest）、謙遜（Humble）、渴望（Hungry）、幽默（Humorous）、勤勞（Hard working）、英勇（Heroic）、正直（Honourable）、樂於幫忙（Helpful）、真誠（Heartfelt）希望可以做囝囝嘅座右銘，陪住佢成長。
2.紫菜索吻
Brendan受佢嘅契媽們寵愛就係人都知，呢日胡定欣就成功用紫菜誘Brendan去錫佢，氹到一班契媽好開心！
胡定欣仲搞笑咁留言：「一睇就知契媽sss太DRY，要揾人錫下啦… 一睇就知Baby Lee你太鍾意食野，所以俾我地氹到啦🤪🤪🤪成功!~」
3. 同把遮一樣高
Brendan有次同爸爸一齊攞遮散步，相中見到Brendan攞住把同自己一樣高嘅紅色遮行路，畫面十分搞笑！Philip仲留言話，學點樣攞住把女性化嘅雨傘去散步係人生中重要嘅一課。
4. 準備做哥哥 心興奮
杏兒去年宣布懷有第二胎，當日以一張Brendan指住媽咪肚仔嘅相去公布消息，超温馨！
其後，杏兒一家三口一齊去渡假，期間更影咗一輯唯美孕照。相中見到Brendan好興奮咁望住媽咪食，睇嚟Brendan都好期待小生命降臨，佢第時一定係個好哥哥！
5. 幫爸爸處理公事
有次Philip上載咗張相，見到Brendan 攞住枝筆，好投入咁「講電話」，成個大老闆咁！Philip仲留言話，由於公司最近好忙，所以攞嚟Brendan去幫手同客人傾計，仲讚囝囝做得好添！睇嚟Brendan 大個之後會係一個出色嘅老闆。
之前Brendan 都有同杏兒試過做接線生，睇嚟個時佢已經偷定師！
6.杏兒橫店開工 Brendan驚喜現身
胡杏兒正佗著第2胎時，仍然喺橫店拍攝新劇《末代廚娘》。直到劇集煞科，杏兒先有時間可以好好休息，家人更安排囝囝到橫店探班，畀驚喜杏兒。杏兒表示，Brendan第一次去橫店非常興奮，更興奮得一直在片場內跑嚟跑去，十分可愛！
8. 曳曳畀人鬧
爸爸Philip曾上載張Brendan畀人鬧完嘅相，Brendan 當時好沮喪咁瞓喺梳化上，個反應超搞笑！Philip更留言話：「哦…..曳曳俾人鬧 😂Naughty boy got told off 😂」
9. 精通4種語言
早前一班「契媽sss」一起去探望Brendan，正所謂「三個女人一個墟」，「胡說八道會」嘅六位美人你一言我一語，把當時只有10個月大嘅Brendan「頭都痕埋」。
事緣三位契媽為小Brendan講故事時，竟然用咗三種唔同嘅語言，姚子羚嘅普通話、胡蓓蔚教上海話，李施嬅講英文，加上媽媽胡杏兒嘅廣東話，係名符其實嘅「兩文四語」！
10.眼訓擺萌樣
唔少小朋友眼瞓嘅時候都會擺唔同嘅表情，而Brendan都同樣擺出個萌樣，處於想瞓同唔想瞓之間，杏兒更話：「BB你的表情很能代表媽媽現在的心情，唉，現在要振作去拍戲了！！💪🏻😑😑😑」
