【齊齊哈囉喂！】萬聖節未到 星級嘩鬼提早出籠應節
廣告
【齊齊哈囉喂！】仲有幾日先到萬聖節，一眾「嘩鬼」已經急不及待出籠！呢幾日唔少星級家長都喺網上平台分享萬聖節造型，有啲驚嚇、有可愛，更加有啲係玩神秘！一齊睇吓有邊個會嚇得到你！
撰文：Joanne 圖片：梁洛施，周汶錡、Reina、湯盈盈、陳茵媺ig
Isabella包冇人認得
Isabella梁洛施一向都好少喺ig PO三個仔嘅相，原因大家都明嘅！佢哋爸爸係咩人丫，梗係要高度保護兼保密啦！
不過Isabella好似對萬聖節好期待咁，早幾日已經PO過一張喺中環石板街影嘅街景相，似係要準備為萬聖節裝身！
今日（28/10）Isabella就再PO出一張4人合照，除咗9歲大仔長治扮忍者露出一對眼之外，其餘3個都包到實，真係有人認得出至奇！一對8歲孖仔長亨同長軒就模仿《國定殺戮日》嘅XX眼同裂嘴造型。至於着猩猩衫嗰位，又會唔會係Isabella呢？
周汶錡混血B仔扮殭屍
周汶錡就幫大仔Jacques變身成最靚仔、最可愛的小殭屍。
雖然化到成口血咁，但係一個甜笑，邊個捨得唔畀糖你丫！
呢睇佢Cute到呢！
陸永囡囡化身暗黑公主
好多小女孩都好嚮往公主造型，陸永兩個囡囡都應該係公主控嚟嘅，不過喺萬聖節，就以一身暗黑公主Look出動喇！
媽咪Reina就話，其實兩個女只係想着靚衫，並唔係想去Party或者攞糖食啦！
陳豪一家清一式扮牛仔
陳豪同陳茵媺成日曬恩愛，連萬聖節都唔放過呀！同三個仔女一齊扮牛仔，夠晒團結呀！
錢嘉樂同兩個女雕南瓜
萬聖節又唔係事必要扮鬼扮馬先叫應節嘅！錢嘉樂湯盈盈兩公婆，就喺屋企同兩個女一齊玩雕南瓜應節啦！爸爸又幾好手勢喎！
