【1+1+1】曾離家學廚9個月 蔣怡感激老公：佢令我成長
撰文：Kammy｜圖片來源：節目截圖、Instagram
結束12年愛情長跑
蔣怡嘅老公翁狄森係名珠寶設計師，佢家族從事珠寶生意，更曾獲香港十大傑出設計師大獎，前美國第一夫人米歇爾·奧巴馬（Michelle Obama）更曾戴過他設計嘅翡翠戒指！。二人於2013年結婚，結束12年愛情長跑，婚後仲生咗囡囡Uma同囝囝Skye。
緣分由剪報開始
蔣怡喺節目中透露，佢同翁生嘅緣分原來由剪報開始。當時蔣怡識咗個一樣係做Model嘅朋友，而對方嘅男朋友就係翁生！有一日，翁生打電話畀蔣怡，話自己已經同當時嘅女朋友分開咗，但屋企就唔知點解有一堆蔣怡嘅剪報，仲問佢攞唔攞返。就係咁，佢哋就開始有來往！
不過，翁生就強調，當時自己其實冇諗住要追蔣怡，純粹係想還返啲嘢畀對方。
其後有一次，蔣怡為時裝雜誌拍攝，當時佢著住好薄嘅晚禮服仲要捱住凍咁拍，而翁生喺蔣怡拍完之後去接佢，當時翁生著住好普通嘅西裝，但蔣怡就對佢留下深刻印象。主持人車婉婉仲笑住問：「係咪覺得佢好靚仔？」蔣怡就立即否認，話覺得對方好Warm、畀到安全感佢，仲話「冇男人畀過呢種感覺我」。
而翁生就最欣賞蔣怡可以打開佢嘅心扉。翁生仲提及，令佢最印象深刻就係同蔣怡去領養寵物，因為當時蔣怡一見到啲小動物就愛心爆棚，仲不停捉住翁生隻手去揀寵物。
協定以彼此關係為中心
好多人生咗小朋友之後，都會將專注力放喺小朋友身上，但翁生為咗避免呢個情況出現，佢就同蔣怡協定，就算有小朋友之後都要以佢哋兩公婆為中心點，「只可以小朋友圍住我哋轉」。不過，翁生最後都發現呢個協定係冇可能，因為好難控制蔣怡唔集中精力喺小朋友身上。
蔣怡就笑言，老公愈係唔畀佢集中精力喺小朋友身上，佢就愈會將重心放喺仔女身上。
老公投訴蔣怡：可唔可以對我溫柔啲？
做媽媽嘅都會投放好多時間喺自己仔女身上，而蔣怡都唔例外。蔣怡表示，生咗小朋友之後，其實佢都想抽啲私人時間出嚟、做返自己，但奈何做唔到，所以佢好少再好似以前咁溫柔地對待老公，翁生亦經常投訴蔣怡「可唔可以對我溫柔啲？」
不過，蔣怡生完兩個小朋友之後就深深咁體會到生兩個嘅分別，因為喺生第一個嘅時候佢對老公抱有期望，好希望對方喺各方面都可以幫到佢，但到第二個嘅時候，因為已經知道個過程係點，寧願老公自己樂在其中，其他嘢自己搞掂，令蔣怡喺照顧小朋友方面變得順利。
翁生曾經希望家庭可以以兩公婆為中心，但蔣怡最後都做唔到，依家就索性實行「男主外，女主內」，由蔣怡去專注照顧對仔女，而翁生除咗工作之外就要專注照顧蔣怡。
蔣怡感激老公：佢令我成長
節目其後安排蔣怡同車婉婉去做按摩，仲偷偷地安排翁生做佢嘅按摩師！期間，蔣怡透露，佢好欣賞老公嘅樂觀性格，雖然佢唔善於浪漫，但就可以將本來唔浪漫嘅嘢浪漫化，特別係好多時可以淡化咗自己嘅怒氣，不過佢就唔知原來老公一直喺佢後面聽晒！
講講下，蔣怡仲講話佢其實好感謝翁生咁多年嘅照顧，畀到安全感佢，「如果唔係老公咁多年嘅照顧，畀機會我去成長，就唔會變成今日嘅自己」。翁生喺後面一路幫蔣怡按摩，一路聽住對方嘅心聲一定超冧啦！
蔣怡講完之後，車婉婉就話返畀蔣怡聽其實老公一直喺身邊，令佢又驚喜又感動！
為夢想 離家學廚9個月
當小朋友出生後，好多媽媽都會放下自己的夢，專心相夫教子，直到仔大女大，自己步入中年才去追尋未完嘅夢。不過，熱愛烹飪嘅蔣怡一直希望可以報讀藍帶學校，打從懷孕前已有此想法，直到誕下囡囡翁容（嗡嗡）後要照顧家人起居飲食，再燃起她嘅「藍帶夢」，喺老公鼓勵下，決定喺囡囡一歲時圓夢，隻身遠赴倫敦藍帶學校九個月，最終考取第一名回來。
囡囡唔認媽咪半年
Coco自言不是一個有創意的人，在藍帶修讀西餐及甜品的她，每件作品的靈感均來自丈夫和女兒，學成歸來後希望能傳承下一代。不過Coco首先面對的挑戰，是要重新建立母女關係，回來後囡囡覺得媽咪好陌生，更試過一腳踢開媽咪，傷透她的心，最後花了足足半年落手落腳湊才令女兒重投懷抱，「依家佢已經黐實咗我。」
女兒2歲 一定要回來
「如果我當時唔去，就要等到個女18歲先行得開。」Coco選擇女兒一歲時一走九個月，錯過了很多女兒的成長片段，甚至有機會賠上母女關係，「俾我再揀我都會揀返呢個時間去，因為呢個係perfect timing，呢九個月佢唔係最需要我，亦唔係佢變化最大嘅時候，我計過一定要喺個女2歲生日返嚟，因為2歲佢開始返學，好多嘢爸爸同工人姐姐都唔可以親自帶佢去或搞清楚，好似學校由媽咪帶比較好。而且當佢慢慢長大，就會唔記得1歲發生過嘅嘢，3歲前嘅記憶係比較模糊。」很多東西都不能計算，幸運的是藍帶其中一個就讀期，完全符合Coco的需要，「課程六月畢業，去個旅行七月返嚟啱啱好佢2歲生日，如果報唔到嗰期要遲三個月，我諗我未必會去。」
行公園怕觸景傷情
遠在彼邦的藍帶生活，三個學期需要適應刻苦的課程、繁重的功課，以及超大壓力的期終考試，Coco更十分掛念嗡嗡，惟有用facetime看看她。「我哋有時差，我日頭佢就夜晚，我返到屋企佢已經瞓咗。佢嗰陣一歲幾唔係好識facetime，又唔識講電話，所以唔能夠成日見到佢。」難得活在夢想之中，Coco也希望專心學業，返學期間盡量叫自己不能想着女兒，「我一諗住佢就咩都做唔到，我每日返學要經過一個公園，倫敦有好多公園，隔幾條街就有一個，每日都見到好多小朋友同狗喺公園玩，我要低頭行，唔可以見到呢啲畫面，一見到我就會邊行邊喊，我唔想喊住返學。」Coco笑言要當自己18歲，心態要像青春大學生，「所有同學都係18、22，我係double their age，可以做得佢哋阿媽！同學初初都以為我20歲出頭，知道我年紀同有個女之後都好驚訝！」
回來已不是BB
九個月學成歸來，當時Coco見到2歲的嗡嗡已不再是BB，「佢由一飯糰變成一個小人，我走嗰陣佢先啱啱識行。」小朋友的感覺好直接，不見媽媽九個月，感覺一定很疏離，即使爸爸亦不能灌輸女兒要接受媽媽。Coco早有心理準備女兒會漠視她，甚至視她陌生人，所以她返家第一件事要「爭番個女」，足足花了半年，嗡嗡才重新接受媽咪。「小朋友唔會因為你係阿媽就鍾意你，我花咗半年先爭到佢番嚟。我返嚟之後佢第一次病，佢係黐住工人姐姐唔要我，我一抱佢就喊，仲一腳踢開我！之後日日我都落手落腳湊佢，帶佢周圍去玩，半年後先黐番我，到依家就黐實咗喇。」
選讀本地學校不怕艱辛
Coco當年一邊「爭女」，一邊為她找K1學位，終選定一間重兩文三語的學校，日後會行本地學校之路，首要學好中文。「我同老公都覺得中文好重要，中文係好難學，但從小學唔會覺得難，我哋細個都唔覺㗎。如果先學英文再學中文就會覺得難，相反英文唔使好認真學都會識講識寫。」
Coco都聽過本地學校功課壓力大，但讀書總要有辛苦的時候，捱過才能適應社會，「如果個女似我，讀書應該唔會有問題。」原來Coco由細到大讀書都考三甲，上到大學更年年考第一，今次藍帶亦是第一名畢業，「我由細到大冇咩叻，係讀書比較叻。」
考試有法 年年考第一
讀書第一未必靠天資，更重要是讀書有方、考試有技巧，「讀書一定要有方法，搵出考試嘅重點。好似我藍帶考試要煮四碟餸，唔識考試嘅同學就成日練習點煮，但我哋喺藍帶訓練咗九個月，冇人係唔識煮餸。其實呢個試係考organization，喺有限時間內，邊一分鐘要做邊樣嘢；喺有限空間入面，所有嘢點安排先係最重要。」Coco與好同學一齊備戰考試，先用紙製作試場的擺位，畫低四個爐頭、雪櫃、剪出七個不同大小的煎pan，再加以想像練習烹調。「每一個步驟我都設計得好仔細，一分鐘都唔會浪費。成個過程我練習咗無數次，唔用腦我都知下一步要做咩，唔需要再睇notes，所以考試嗰日我好從容，監考老師見到我咁有條理，即刻加分。」
考試唔識要跳來做
讀書一定要明白課文，切勿死記硬背，Coco教路每次上課後必先理解內容，之後再複習就入腦得多。「大學嗰陣我成日兼職model，好少時間讀書，當我知道老師今日講咗呢幾頁書，我就花30至45分鐘去睇，明白咗我就唔使上堂，我知道自己明咗，到考試前再溫習refresh番個記憶，考試就冇問題喇。」Coco笑言好鍾意考試，同學十分妒忌她「唔溫書都考第一」，但她坦言考試需靠幾分運氣，選擇題經常「撞中」，「我信自己感覺！我老公話佢一考試就好緊張，一路睇時間一路作答，愈睇愈緊張，或者遇到唔識嘅問題就係咁諗，最後就唔夠時間做。我就相反，從來都唔睇時間，一見到唔識就跳，做完有時間先返轉頭，揀比較識嘅先諗，再跳再做，咁樣會掌握到時間，亦唔會太大壓力。」
廚房教育 切炒煮樣樣齊
Coco經常帶女兒去公園玩，並進行廚房教育，她在藍帶的收穫，幾乎全都送給女兒。「我幾乎日日都喺廚房，佢成日要入嚟搵我，一見我煮嘢就大嗌：我help！或者當我問：Uma, can you help？佢睇緊電視都會衝入嚟幫我。我已經俾佢試過攪拌、搓麵粉、切嘢、炒嘢，包餃子都會俾佢一齊包。」切食物都敢讓女兒接觸？「係呀，因為我教佢刀要點揸，邊度唔可以掂，切完要點樣擺先安全。煮緊嘢我都會話佢聽，邊個位好熱唔掂得，提早教佢係好嘅，俾埋安全教育佢。」當時嗡嗡已將媽咪「離棄」她的日子忘得一乾二淨，Coco向她測試過，「你記唔記得之前有段時間好少見到媽咪？佢話『唔記得』，咁就好喇，哈哈！」
藍帶的生活
Coco主修西餐及甜品，全因為自己喜歡，九個月的課程分三個學期，第一個教基本技巧，第二個提升烹調技巧、餸菜更複雜，最後的學期則要創新菜式及備戰大考。回想第一日上堂自己信心爆棚，但一上堂便受到好大打擊，「淨係切嘢已經騰晒雞，材料要切絲1mm×5mm、3cm立方體，每一刀都要拎把尺度。」直到第二個學期，Coco才開始享受，最終取得Grand Diploma，雖然壓力大，但一切都很值得。
