蜘蛛女 鄭麗莎 3胞胎靠排卵藥

問︰Lisa今次多胞胎有幾多個BB？

答︰今次是第二胎，是3胞胎，2女1仔，目前是32周，各BB體重由3磅至4磅不等，其實3磅左右已經叫OK，因為3胞胎都比較細粒，我目標希望佢哋可以去到4磅，同埋可以係34周後先出世。醫生話數字不是問題，最重要係佢哋Stay係媽媽肚內長啲，咁就會健康啲，我早前28周時都打咗強肺針，令BB的內臟都強壯啲，預防早產！

問︰今次陀3個辛唔辛苦呢？

答︰今次辛苦在夜晚去廁所次數去得密，起碼3至5次，但好在我停咗工作，可以瞓到自然醒！而陀B方面，醫生話其實一般孕婦去30周就要去卧床或坐輪椅，但好在我個人身高較高同埋有運動底子，陀B時唔算太吃力，不需卧床或輪椅，而今次冇出現腰骨痛，又冇膝蓋痛，目前行動仍自如！

我個肚睇起上嚟雖然唔算好巨，但同上一胎比其實已經大好多！懷孕之前我只重58至59公斤，今次今次加懷孕3胞胎後只得65公斤，很奇怪！不過好在醫生話個肚一切良好，加埋胎水等，成個肚約重廿磅。至於胎動方面，發覺BB只係間中踢踢吓，時唔時移動，好似手指劃過咁！

問︰有冇人工受孕？

答︰其實有聽醫生意見，因為想陀馬騮仔，醫生開藥俾我食，開頭期望懷孕一個已經好開心，今次仲要3個，真係好驚喜，完全估唔到！醫生開頭在醫院時曾建議減胎，畢竟3胞胎對BB或對媽媽都有有一定風險，但經家人商量過後，我最報決定3個都要！因為做媽媽嘅，都想所有BB都一齊平平安安出世，唔想放棄任何生命，一個都不能少！

問︰打針先有3胞胎？

答︰其實只聽醫生意見，食咗排卵藥。但有機會出現副作用嘅「多胞症」，而我就咁好彩中咗！其實我知社會上有好多方法可以催谷生仔，但我覺得最緊要係考慮自己身體及BB健康。

問︰夢想係生6個BB？

答︰小時候的夢想係想生6個BB，所以當年拍拖己問男友，生好多個是否OK，最後佢OK先嫁俾佢！但今次生3個真係意料之外，是上天賦予的禮物，我當然希望繼續生，但家人叫我收肚，因為「生易湊難」啊！之後嘅事，就順期自然吧！哈哈！

問︰食嘢食得多唔多？

答︰其實都係迫自己去食，因為今次陀3個，所有營養俾BB吸晒，我成日都要提自己要食嘢，半夜起兩次身亦要搵埋野食，食完先瞓得安落。同時，因為個肚會頂住個胃，要提自己多餐少食！大家睇到我除42吋肚外，手腳都都Slim冇水腫，而且雙手仲有老鼠仔！其實大肚期間我都有做運動，因為郁得太多，身邊人都有少少擔心。不過我最多都行來行去，落街散步之類，不過近期就少咗，但已經比一般大肚婆郁得多！

問︰陀B時點令巨肚皮膚冇乜妊娠紋？

答︰其實我個肚皮就冇乜妊娠紋，不過就有爆筋情況出現，爆咗微絲血管時似有蟲仔的感覺。其實同時都出現好多問題，如流牙血及易有鼻血等，但呢啲好在日後會好得返！至於點解冇妊娠紋？應該同我做運動有關吧，做開運動的人新陳代謝快，皮膚都好啲，加上我晚晚都有用面膜，同時一日塗四至五次護膚品。

問︰今次會開刀定順產？

答︰產檢時醫生建議要開刀，如果feel到有少少唔舒服都要準備入院開刀，唔跟次序拎BB出來，到時順期自然，目前位置是左邊係女，右邊係仔！其實我見前過咗34周就隨時生得，所以我一早做好準備，執好晒走佬袋！我心水係去政府醫院生，因為公立醫院的醫生一早已經Stand By好等產婦，加上設備較完善，我好放心！