專家菜姨姨：親子共讀應由懷孕期間開始
廣告
很多媽媽都會喺懷孕初期同BB傾偈，講下媽媽經歷嘅日常大小事，其實除咗傾偈，已經可以進行親子共讀！或者你會問：「對住胎兒講故事？會唔會好似對牛彈琴咁呀？」親子共讀專家菜姨姨蔡淑玲說：「雖然小朋友未出世，但係媽媽讀書嘅聲音會留喺小朋友嘅腦海入面，成為知識，亦能夠令小朋友習慣父母同自己講嘢嘅聲音，促進腦部發展。
撰文：Sunday Kiss｜攝影：Cliff
親子共讀應由懷孕期間開始
菜姨姨認為家長投入感能夠令小朋友更加注重喺親子共讀嘅活動入面，父母享受閱讀嘅時候，小朋友就因應父母嘅情感能夠更加容易投入喺故事入面。菜姨姨透露現時喺醫院看懷孕嘅媽媽介紹親子共讀，佢認為當媽媽懷孕嘅時候，就已經同子女產生緊密嘅關係，當媽媽同小朋友一齊講故事嘅時候，小朋友喺肚入面都會聽到媽媽嘅聲音，小朋友會同媽媽有感應。
有懷孕嘅媽媽可能會問，寶寶未出世，根本唔會明白自己講緊咩，親子共讀真係有用咩？菜姨姨就解釋，媽媽喺懷孕期間進行親子共讀嘅活動能夠有情感聯繫，小朋友喺媽媽個肚入面習慣聽到父母嘅聲音，出世之後亦會繼續聽父母同自己講嘢，有助刺激腦部發展。親子共讀其實喺係小朋友嘅成長過程之中嘅一個好重要嘅元素，透過親子共讀，爸爸媽媽同小朋友一齊學習，因此親子共讀應該越早越好。
懷孕時共讀圖書要正面
有媽媽對於懷孕期間應該點揀共讀圖書感到困惑，菜姨姨鼓勵媽媽懷孕期間可以多去書店翻閱兒童圖書。菜姨姨說：「有啲兒童圖書比較吸引大人，如果父母有興趣其實可以先購買。」菜姨姨建議，當父母摸住肚入面嘅BB，想像小朋友已經出世喺自己懷內，父母已經可以諗下應該點樣去講故事。菜姨姨認為父母要同小朋友一齊成長，並學習小朋友嘅童心。至於應該選擇咩書去做共讀，菜姨姨建議父母可以揀一啲自己有興趣嘅、有趣、開心同正面訊息嘅書進行共讀，以死亡、父母辛苦為主題嘅故事則可以避免。
