謝婷婷分享BB相 宣布秘密產女3個月
撰文：Sunday Kiss｜圖片來源：謝婷婷Instagram，謝霆鋒weibo，新傳媒集團圖片庫
36歲謝婷婷宣布秘密產女
藝人謝賢同狄波拉囡囡謝婷婷嘅感情生活一直都受外界關注，以前曾高調同安志杰拍拖，可惜二人於2013年分手。其後，又盛傳同荷李活影星「鷹眼」謝洛美維納（Jeremy Renner）相戀，但男方最終否認戀情。近年已甚少在港現身的謝婷婷，自去年5月公開出席珠寶活動後，就未有再露面。今日，謝婷婷突然喺社交平台上宣布已做了媽媽，為不少人大為震驚！
BB出世100日
謝婷婷「失蹤」近一年，今日就突然上載一張BB小手捉住大人嘅手指，更留言「You are my brightest light.」，並指「happy100days」 、「babygirl」，可見BB已出世3個月，更係女嚟，真係恭喜哂！
謝賢獲頒「終身成就獎」
早前《第38屆香港電影金像奬頒奬典禮》，大會就率先揭曉今屆「終身成就獎」得主為謝賢。藝人謝賢雖然已82歲，但一直為香港電影及電視界默默耕耘，從1956年《遺腹子》飾演受盡後父欺凌，淒慘可憐嘅仔、1980年《千王之王》嘅「南神眼」羅四海、到前年喺電視劇《賭城群英會》中飾演向無名一角等，至今已從影67年，如今獲頒最高榮譽終身成就獎，可見佢喺香港電影及電視發展上有重大貢獻，恭喜晒謝賢！
最成功嘅「代表作」–謝霆鋒
提起金像獎，好自然會諗起曾經攞過「最佳男主角」、謝賢大仔謝霆鋒。1979年謝賢同同為藝人嘅狄波拉結婚，先後生咗謝霆鋒同謝婷婷，不過二人最終都離婚收場。謝賢同狄波拉對仔女家教甚嚴，但偏偏霆鋒年輕時較為反叛，曾因「頂包案」而要入獄14日。雖然如此，但隨著霆鋒逐漸懂事，喺各方面都有唔同嘅出色嘅成就。
謝霆鋒17歲開始出道，憑著自己喺音樂方面嘅才華，喺香港樂壇打出一片天。除此之外，霆鋒喺影視領域同樣成就斐然，多次喺香港電影金像獎中獲獎。近年，霆鋒亦成功打造咗《鋒味》呢個品牌，更喺全球廚藝大賽中獲得冠軍。謝賢培育出咁優秀嘅仔，可謂係佢一生中最值得驕傲嘅事！
謝霆鋒：爸爸係心中嘅「最佳男主角」
2010年霆鋒奪最佳男主角，感言中提及自己細個嘅時候，謝賢喺身邊不斷講自己拍過幾百小時嘅電視劇，幾百部電影。直到18歲時，霆鋒獲頒「金像獎最佳新演員」，當時佢放咗個獎喺枱面，反問謝賢「你有冇攞過金像獎？」點知呢番說話一直哽喺霆鋒心入面十幾年，霆鋒自知自己不知天高地厚，更對住鏡頭講：「希望佢原諒呢個不知天高地厚、無禮貌嘅小朋友，要湊大一個咁難教嘅細路、每日笑面迎人，你至係最佳男主角。老豆，對唔住。」
霆鋒同謝賢曾經喺節目中透露，兩仔爺嘅關係不太密切，問到謝賢有多了解兒子霆鋒時，佢指：「呢個好難講，因為我同跟佢真係唔係好熟，因為各自有工作，佢日日飛嚟飛去拍戲，有時候三、四個月都唔會見上一面，連電話都冇。」
隱藏的父愛
到霆鋒返港時，其他人經常畀謝賢問點解唔同霆鋒一齊見面，謝賢答：「佢返到香港，當然係同佢朋友見面，年輕啲，成日跟著老人家冇意思，我從來唔會去麻煩佢。」兩人雖然不常碰面，甚至連對方嘅行蹤都要透過別人口中先知，但從字裡行間卻隱藏著滿滿嘅父愛。
更加愛護爸爸
霆鋒曾透露，謝賢近年仍會親自收集有關自己嘅新聞：「最近這幾年，他一直覺得自己是我的負擔，幫不了我甚麼東西。可能是當了一輩子的明星，到現在覺得自己起不了甚麼作用，所以特別的沮喪、特別的不知道自己還活著幹嘛。」
霆鋒表示，睇住爸爸一點一點變老，有好大嘅感受，「我是一個比較獨立的人，所以跟父母表達愛意那方面是很差的，但是爸真的老了，那我知道不應該等到一個人真的老了才對他好，所以希望這幾年有開始改變。」
謝賢疼愛兒子和孫兒
另外，謝賢表示，其實父子兩人自霆鋒5歲開始讀書時，都好少講嘢，冇咩家庭樂。「從他讀書至進入電影圈，我都是讓他自由發展。」問到謝賢認為霆鋒發生過咩事情，令佢感到遺憾或可惜時，謝賢更忍不住感觸落淚，謂：「 霆鋒真的很愛他的孩子，每次分開時，兩個孩子都不捨得跟爸爸說再見。」可見謝賢不但非常疼愛霆鋒 ，同時亦很愛護兩個孫子。
送八千萬豪宅 作父親節禮物
霆鋒與謝賢兩父子感情要好，之前父親節前夕霆鋒為爸爸送上驚喜，以8,500萬購入淺水灣道怡峰低層海景單位送給爸爸，實用面積約1,939呎，呎價達4.3萬元，登記買家是謝家鈺 ( 謝賢 的原名)，其實早年霆鋒曾送上價值500萬的勞斯萊斯名車予四哥。很多影迷大讚霆鋒的舉動超窩心，絕對是孝順星二代。
節目中，霆鋒同老豆、契媽、內地影星張一山，一齊下廚煮飯俾「順德自梳女」。煮餸期間，謝賢同阿姐講起當年合作拍《千王之王》時霆鋒出世嘅情況。謝賢憶述，當時接到電話就即刻除低戲服撲去醫院，趕到醫院等咗15分鐘霆鋒已經出世。
不過，第一眼見到霆鋒後，謝賢第一句話竟然係：「咁醜嘅。」
一旁嘅嘅霆鋒即刻唔服氣大嗌：「似你囉。」連同場嘅阿姐都笑咗出聲。
之後，張一山踢爆霆鋒話謝賢認為他「唔夠型格」，謝賢聞言即刻話：「沒有，他，慢慢來。」霆鋒又話自細就聽太多老竇的「穿衣原則」，阿姐都忍唔住幫口：「那你肯定要聽他的（謝賢），他穿衣服很講究。」
另一邊廂，阿姐透露謝賢嚟緊又做演員，婆婆聞言大讚霆鋒與謝賢都好紅。謝賢就「彈」霆鋒只是「一般般啦」，一旁嘅阿姐都開口讚：「一代勝一代。」
好勝老竇聞言，就九秒九回答：「我唔識聽呢句話」，認真爆笑。
最後，霆鋒趁喺拍緊節目，但粗粗質疑老竇「一直戴著太陽眼鏡究竟睇唔睇到嘢」。謝賢二話不說脫下眼鏡，霆鋒就將太陽眼鏡拿到鏡頭前，讓觀眾一嘗老竇嘅視角。然後話：「今天的不算黑，平時戴那麼黑能不能看到？」謝賢見阿仔質疑佢多年不變嘅造型，直言：「（因為）我不想看到你！」
霆鋒聞言已無還擊之力，直接舉手投降，仲話老竇：「真係好百厭」，眼見呢對父子爆笑鬥嘴，連阿姐都忍唔住笑謝賢係「老頑童」
