貝安琪 BB重新聯繫母女情
不過，兩母女沒有隔夜仇，自Ankie的兒子貝小龍(Sebastian)出生後，成為了一家人的開心果。榮升婆婆的劉香萍弄孫為樂，經常上門探BB，令母女之情重新連繫上。
●撰文：Ling
●攝影：Simpson Chiu(部分相片由受訪者提供)
●服裝：Takeanap(www.takeanaphk.com)、Ferrari Store Junior
●場地：Studio Tree(Tel：97891567)
新一代混血萌B
Ankie的寶貝Sebastian有著四國混血基因，Ankie是中德混血，未婚夫SimonvanDamme則有摩洛哥及加拿大血統，Sebastian更擁有一個充滿中國色彩的中文名「小龍」，全因Simon鍾意食小籠包，英文名則由Ankie取名。
眼仔碌碌的小龍，有望繼周汶錡的一對兒子之後，成為另一網紅混血B。Ankie笑指BB不怕陌生人，經常笑笑口，好得人歡心。「佢好搞笑㗎，好鍾意引人笑娛樂人哋，佢最鍾意聽歌，咩歌都聽，好似Ray Charles、Michael Jackson、Jazz、Opera，我哋聽乜佢都鍾意。」
今年補辦婚禮
「小龍BB」的出現，是Ankie和Simon的計劃之外，或許這是上天的刻意安排，讓一直在媽咪控制下生活的Ankie，在工作和家庭也要獨立、負責任起來，換一個全新的靚媽身份繼續生活。
去年Ankie發現有孕，劉香萍希望女兒立即結婚，但Ankie覺得兩個人在一起，一紙婚書並不重要，不必急於簽紙，而且與Simon已有共識翌年補辦婚禮，一來想修身做個靚新娘，二來想待囝囝識行識走做花仔，三人行更開心。「婚禮簡簡單單，有親友一齊慶祝就夠，我哋可能會喺香港、加拿大兩邊搞，喺香港會擺酒，做番一啲傳統嘅嘢，好似接新娘玩新郎，我覺得好好玩！」
劉香萍嚴管女兒 對孫仔放縱
劉香萍曾讚揚Simon是個思想純品的大男孩，希望他們盡快告之婚訊。Ankie笑言與媽咪的關係已大有改善，全靠趣致可愛的小龍，俘虜了婆婆的心。至於母女間的問題，Ankie已有方法拆解。「我由得佢講，佢講晒出嚟就會舒服啲，同埋BB好得意，幫我哋改善咗兩代關係。」
很多長輩對子女嚴謹，對孫兒則變得慈祥嬌縱，Ankie笑稱媽咪也一樣，現在對BB疼愛有加。「佢由細到大對我都好嚴，我知佢係為我好，佢想我聰明啲、nice啲，又安排我喺德國讀書。但依家我就驚佢太縱BB，佢每星期都嚟探BB，最鍾意唱歌，又叫我日日影BB相、拍片send畀佢睇，媽咪見到BB真係好開心。」
順產過程有危險改開刀
Ankie於去年2月1日在德國誕B，Simon和劉香萍也有飛往當地陪伴。一心想順產的Ankie，在生產過程一度驚險萬分。「生BB嗰日我陣痛咗五個鐘，佢都唔能夠直出，再等落去驚BB會抖唔到氣，而且佢心跳開始有啲唔正常，我嘅血壓又愈來愈高，情況好緊急，最後決定要開刀，好彩母子平安，雖然傷口到依家仲有啲痛，但會慢慢好番嘅。」
Ankie在產後沒有跟足傳統坐月，一來媽咪和未婚夫不在身邊照顧，二來自己一向茹素，蛋奶、芝士統統戒掉，所以連補品也沒有吃。不過Ankie有仔萬事足，心情開朗令身體復元快，惟她對修身情況未夠滿意，希望盡快回復最fit狀態投入工作及結婚。除了模特兒及演藝工作之外，她亦是一名專業瑜伽導師，以前她每日可做三小時瑜伽，但現在湊B太忙，只能每兩日做一小時瑜伽，更是教導學生時才一起做。她大嘆為人母親後，幾乎將所有時間奉獻給孩子，但她堅持親力親為湊仔，甚至帶小龍一起開工。「以前覺得自己有好多時間，依家完全冇時間做自己嘢，有次出去同朋友慶祝生日，我都想快啲返屋企。」
素食媽媽餵母乳半年
雖然Ankie自14歲起茹素，但絕不影響母乳量，她曾形容自己為一部Milkmachine。為了給予孩子最好的東西，Ankie餵哺母乳六個月，她坦言人奶路非常艱辛，很佩服其他母乳媽媽。「真係好辛苦好痛，而且我係一個鍾意郁動嘅人，唔鍾意成日坐，餵母乳令我有好多嘢做唔到，好似瑜伽咁，但為咗BB健康我一定要做，最後都堅持咗六個月。」
現在小龍已進食固體食物，受媽咪的影響下喜歡食蔬果，最愛番薯、香蕉、牛油果，Ankie有讓他試不同食物，包括肉類，沒有強迫囝囝一齊茹素，但囝囝已不自覺地「戒口」，她說：「佢去朋友仔嘅生日party，有好多美食，佢都唔想要cupcake同肉類，最鍾意都係食菜。」
四語教學 培育小小Gentleman
至於教育方面，在德國土生土長的Ankie，讚揚當地教育嚴謹但沒有壓力，這正正是他對教育兒子的方向。她已在德國慕尼黑參觀過幼稚園，校園有大片草地，環境非常優美，但她希望留在香港發展演藝事業，並多考幾個瑜伽導師牌，想BB在身邊，所以最後或安排兒子留在香港讀書。她認為在香港和歐洲讀書各有各好，香港的讀書環境雖然比較辛苦，但可以學好中文。
由細到大，Ankie一直以三語溝通：德文、英文、廣東話，現在與囝囝更四語齊下，自己對囝囝講德文，Simon講法文，婆婆劉香萍講廣東話，自己與Simon則以英語溝通，每人講一種語言就不易令BB感到混淆。不過，由於婆婆比較少見，Ankie怕囝囝的廣東話不佳，近來自己也多說廣東話。她樂見囝囝對語文吸收迅速，相信他頗有語言天份。
其實Ankie不期望囝囝要像「李小龍」懷著18般武藝，想BB學多幾種語言，只為與各方家人溝通。她做媽咪的，保證不會重蹈上一代的覆轍，適時就會放開，能培育他成為一個開心有禮和有創意的Gentleman，便已足夠。
