趙勁皓 盧頌之 今周剖腹誕B女
28歲的Dada直言選擇開刀因自己怕痛，亦不想有任何差池，因自己出世時亦因臍帶纏頸兩圈，令計劃順產的盧媽媽要改為開刀。「所以我都好驚，亦唔想痛咁耐，所以決定開刀。」醫生強調最重要產婦感覺舒服，並指出一個現象：「愈後生愈想開刀，愈大年紀愈想順產。」
撰文：Ling
攝影：Issac Poon（部分相片由受訪者提供）
化妝：King Yip@KINGS MAKEUP
髮型：Louis@KINGS MAKEUP
場地：King’s Fitness（tel: 9661 2100 / 6102 6328）
懷孕分開住 産後補結婚
King和Dada外表看似爛玩的年輕人，實際好喜歡小朋友，希望趁後生組織家庭，又覺得在雙方感情基礎穩定下，不一定要先結婚後生仔，他們覺得可以掉轉次序，故開始不設防，King說：「我哋有keep住做呢件事，有就有冇就冇啦，好順其自然，冇諗過咁快中。」身旁的Dada大笑道：「哈哈，其實我哋好少（做）㗎咋， 我哋唔係一齊住，忙完又大覺瞓，所以真係一份禮物。」
但為何不在懷孕初期結婚？可以盡快名正言順成為趙太。「我哋唔想一有咗就急住結婚，想慢慢搞個婚禮，我哋好怕繁文縟節，應該唔會鋪張擺酒。」兩人現時仍分開居住，但會互相上大家屋企照料，而傳統上大肚婆亦不宜搬家，Dada待產後才慢慢遷往新居一齊住，坐月期間會留在娘家，有媽咪幫手。
𡃁模好友齊齊做媽咪
快將成為媽咪的Dada，身邊的𡃁模好友Annie G.（吳燕安）和Hidy（余曉彤），齊齊上岸做媽咪，更一齊生女做姊妹花。被問到會否收起性感，她明言：「其實我都冇做模好耐，所以都冇咩特別。」
回想第一次產檢見到BB已經好興奮，到第二三次聽到心跳，心裏更泛起一陣感動，好期待BB出世。訪問當日距離Dada剖腹的日子不足四周，隨着與B女見面的日子愈來愈近，心情也愈來愈緊張。「個肚開始急速脹大，King成日話我行路似企鵝，瞓覺又會腰痛，因為阿B愈嚟愈重。其實準備工夫都做得七七八八，但真係第一次感到咁徬徨無助，因為真係完全零經驗，所以都好緊張，但我同King準備好㗎喇，身邊亦有好多人幫，應該無問題。」
轉型做生意 助商場「翻生」
Dada希望將來做全職媽咪，但會與朋友搞一些有關商場翻新的project，「有啲商場吉咗變死場，得十間八間舖開，好多舖都租唔出，我同朋友就group埋幫呢啲商場起死回生。」Dada在懷孕期間開始這門生意，她負責度橋、宣傳，其中一個死場為北角城市金庫，下月會有Softopening，屆時可一睹該場如何起死回生。
年輕孕婦陀B相對輕鬆，Dada整個孕期幾乎沒有不適，僅初期比較疲倦，有輕微反胃及暈眩，沒有嘔吐，三個月後所有徵狀已消失。「我冇乜水腫，個肚又冇紋，陀得算靚。」懷孕後最大分別是口味，從來不好甜食的她忽然好甜，「我不嬲唔食糖水、蛋糕、朱古力，有咗之後全部都有食。」有指口味其實是BB主導，初期Dada鍾意食菜，近一個月， BB則要求食橙和香蕉，「我上網check過呢個時候係食呢啲嘢多。」
日日岀街抗抑鬱
性格好動的Dada大嘆懷孕期間多空閒時間，有時感到沉悶，以砌積木為樂，間中仍有打牌，King笑她要做跟得夫人，陪他到健身房和餐廳返工。「我有叫佢喺屋企休息多啲，但佢唔肯，鍾意行嚟行去。」
他們兩人都是夜貓子，因King要打理酒吧，Dada亦習慣夜瞓，兩人凌晨會一齊打機，Dada知道自己應該早瞓及多休息，但生理時鐘難改變，而且心情對孕婦更重要。「孕婦最緊要開心，我行來行去開心過匿喺屋企，可以見多啲人傾吓偈，一匿埋就好易亂諗嘢，亂咁上網，睇到啲唔開心嘅新聞仲唔開心，我差唔多日日都出街，我好驚有抑鬱。」受賀爾蒙改變影響，Dada變得易喊，所以她更加要多外出分散注意力。「有次我搭地鐵去健身室搵King，拎住啲嘢好重，打俾佢又唔聽電話，行行吓我自己喺度喊，一直喊到去健身室，鬧爆佢做乜唔聽我電話，但喊完又覺得自己好白癡，佢啲學生都笑我，平時我唔係咁。」
曾任中文及籃球老師
King和Dada同是屋邨津貼學校出身，他們未知會否讓小朋友行傳統學校的路，但不會做怪獸家長，不會強迫學習，希望小朋友發掘興趣，King說：「我會俾佢自由學習，我細個父母都冇迫我學嘢，得閒就落公園玩、打吓籃球。」玩運動都能玩出個未來，King現擁有專業健身教練及籃球教練牌，更開設自家健身室，其中陳柏宇是他的星級學生，至於會否教女兒打波及做gym，要視乎她的興趣。「如果佢淨係鍾意畫畫，我唔會迫佢做運動，俾佢選擇發展空間。」
不說不知，King除了走訪過多間學校教籃球之外，更曾任中文老師，熟悉很多學校的收生要求，他明言校長們最着重學生的能力，而非鬥報興趣班鬥多cert。「好多興趣班標榜自己會頒獎狀獎牌，報學校會加分，其實學校都知道呢啲係商人搵錢工具，學校係唔會睇呢啲嘢。如果盲目跟從去報呢啲班攞cert，小朋友辛苦之餘，對入學又冇幫助。」King寧願自己多與小朋友玩耍、親自教導，讓小朋友有個開心的童年。
絕不棄養六隻狗
非常熱愛打機的二人在BB出世後，會盡量減少在BB面前打機，並多帶她去郊外接觸大自然，而非一個沉迷玩iPad的小孩。一共養了六隻狗的King和Dada，更希望培養囡囡與小動物相處，並斷言絕不棄養小動物，反之小動物能培養小朋友的愛心，Dada說：「小動物係知道㗎，我有咗冇幾耐，我屋企隻哥基嗰排勁黐住我，好似驚我走甩，平時攤喺度唔係好理我㗎，跟住我就知道自己有咗。依家我問隻狗，BB呢？佢都識攤個頭去我肚度！」Dada自懷孕後常與狗狗們談及BB，又叫牠們不要爬上肚子，牠們真的乖乖沒有亂爬。「小動物好有性，我哋好期待小朋友同小動物一齊玩嘅日子。」
參考資料：衛生處網頁
