鄭嘉穎有仔萬事足 甘為家庭推內地劇

撰文：Kammy｜圖片來源：鄭嘉穎Instagram，陳凱琳Instagram

鄭嘉穎分享當爸爸後的心態轉變

鄭嘉穎出席親子活動時表示，自己終於有機會獲邀出席親子活動，以往都只係陳豪獲邀出席。鄭嘉穎表示結婚同做爸爸後，心態上都有所轉變，因為未結婚之前係自我中心，結婚後就以家庭為先，如今就連太太陳凱琳都退後啲，所有嘢都以小朋友為先。鄭嘉穎一直都好鐘意打網球，就連囝囝嘅英文名Rafael都係取自西班牙網球名將拉斐·拿度（Rafael Nadal Parera），被問到會唔會培養阿仔做亞洲網球王子，嘉穎就答：「係世界（網球王子）！睇吓佢將來鍾意咩啦。」

甘為囝囝推內地劇

鄭嘉穎笑稱，要多謝阿仔令佢有機會接到唔同類型嘅工作，現階段係全職湊仔，如果工作要離開香港太耐就唔會接住，因為怕離家太耐，囝囝會認唔到佢：「短程都可以，如果要離港3、4個月就真係太長，暫時唔諗，都推咗啲內地劇，自己都覺得好幸運依家有得揀，如果十年前就冇得揀。」佢續指，依家每日起身第一時間就會去睇下囝囝，仲話阿仔個樣每日都變緊。

太太係最愛

鄭嘉穎被問到，太太Grace嘅地位降低咗有冇激嬲佢，佢就話唔會嬲，因為彼此都知道囝囝係最需要人照顧，如果將來再有第二個，佢仲有得退後，不過暫時未有計劃，要太太抖吓。鄭嘉穎直言：「太太始終都係最愛，因為仔女長大後會離開我哋，最後喺身邊嘅都係太太，所以太太先係最愛。」

鄭嘉穎陳凱琳囝囝愈大愈靚仔

早前鄭嘉穎同太太陳凱琳嘅囝囝3個月大，二人更齊齊帶阿仔出街，享受天倫之樂。呢日，兩公婆為阿仔搞百日宴，仲上載多張囝囝嘅近照。相中見到，承悦好好肉哋，而睡眼仔好大，十分精靈可愛，絕對深得兩公婆嘅遺傳。

鄭嘉穎留言：「鄭承悦，爸爸媽媽為你改呢個名係希望俾你一個承諾，令你每一天都感受到愛同喜悅，祝你一百日生日快樂，We love you so much❤️」

胡杏兒催鄭嘉穎生女 將來對親家

當日胡杏兒一家三口都有份出席承悦嘅百宴。杏兒同嘉穎因為2011年拍攝劇集《怒火街頭》時結緣，杏兒喺網上以劇中角色「王思苦」催「Law霸」快啲生多個女：「Law霸恭喜你，娶到一個靚靚老婆又喜得麟兒，快啲再生個囡囡同我對親家！王思苦上」；而嘉穎都有即時回應，指佢同Grace會盡力而為！Grace亦留言表示，感謝杏兒出席兒子嘅百日宴：「多謝你一家大細參加BB嘅百日宴 You look so radiant as always!」

《鐵馬尋橋》好友齊到賀

出席百日宴嘅賓客仲包括劇集《鐵馬家族》成員唐詩詠﹑馬國明﹑黃嘉樂同其女友。唐詩詠喺社交網分享多張百日宴嘅相，佢表示：「我知我唔識抱 佢個樣應該係舒服啩？﹗買BB衫仔真係好難 買啱size又驚著得唔耐 買大少少就變成咁 但你又著得好靚仔喎 同我又好襯喎 我個心俾（畀）你融化左（咗）啦」之後又話：「Our BIG family 多左一個小人仔 💚承悦💚 #鐡馬家族 #rafa100days 。」