鍾嘉欣一家四口慶冬至 罕有上載仔女正面照
撰文：K | 圖片：Instagram Facebook
鍾嘉欣一家四口慶冬至
鍾嘉欣自從仔仔出世後有一段時間沒有更新Instagram，趁住昨日冬至，嘉欣上載2個仔女嘅合照向大家報告近況，其中她表示最近和老公一起專注於照顧兩個小朋友，並表示已經重投工作。
嘉欣一共上載4張相片，其中網民都話大女似足媽咪，細仔就似足爸爸！一家人基因超強勁！
令人動容的情書
好多媽媽喺一胎同二胎次間掙扎，除咗經濟考慮之外，仲會擔心自己嘅愛夠唔夠分畀兩個小朋友。新生第二胎嘅嘉欣，原來都曾經有過呢個諗法，不過母性係自然而發嘅，早前嘉欣望住Jared ，寫上一個封《給兒子的情書》，就將呢份疑慮一掃而空喇！
「Jared：在我遇見你之前，我擔心我的心沒有空間去愛另一個靈魂。 在擁有Kelly之後，我怎麼能愛另一個人呢？ 然而，在你出生後，我現在知道我有足夠的空間來愛你。 你把我的愛帶到了更高層次。 謝謝。Jared，我會珍惜你。」
囝囝真係似爸爸？
Jared出世之後，人人都話佢勁似爸爸！10月尾時嘉欣再PO出囝囝幾張萌照，真心覺得呢兩父子真係唔怕會失散呀！
爸爸係咁樣樣～
囝囝就係咁樣樣！（強烈懷疑影相時馬國明就喺Jared附近！唔係點會將天然呆表現到極致！）
相信自己可變強
嘉欣在片中提到，感謝助產人員幫助自己在家生產，整個生產過程非常順利。今胎只用咗13個鐘生細佬，而生Kelly時用咗17至18個鐘，足足快了3個鐘。這個經歷絕對是「One of the best experience in my life」，令佢學識相信自己身體，只要相信自己，不論是生小朋友，其他事都可以完成。
坐月心得
睇到嘉欣面色紅潤有氣息，相信佢嘅身體恢復得好快！佢表示生完BB之後，媽媽的能量大量流失，需要多吃些蛋白質食物，另外應多吃蔬菜如扁豆、西蘭花、杏仁、豆腐、雞蛋、奇亞籽甚至藜麥白飯等。
兩道簡單坐月家常菜
紅棗陳皮薑蒸雞
少量紅棗、陳皮及薑切成絲，然後用豉油、糖及鹽把雞略醃。把全部材料蒸10至15分鐘。
西蘭花炒菜
西蘭花和薑先入炒起並放置一邊備用，再炒紅蘿蔔備用，其後炒黑木耳備用，最後把所有材料和醬油混合。
照顧大女細仔
嘉欣相信媽媽才是最清楚自己小朋友情況，「我覺得要畀一個好安全、冇壓力同有愛嘅環境畀個B，咁就OK喇！同埋父母都要開心，因為你開心，個B先至會開心！如果你緊張，個B都會緊張！」宜家最大挑戰係讓大女Kelly明白有咗細佬，爸爸媽媽都依然咁愛佢，俾佢足夠安全感。經過一個月教育，Kelly勁錫細佬，不時會攬攬錫錫。
鍾嘉欣產後首現身 坐月中零走樣
鍾嘉欣早前公布在家誕下細仔Jared Anthony Leung，而她有份客串拍攝的無綫新劇《再創世紀》今日舉行記者會，身在加拿大的嘉欣拍攝短片支持。片段中她透露自己是坐月中，偷偷地走出屋外拍片。而片段中的嘉欣相當精神，面尖尖身材亦完全沒有變胖，完全唔似啱啱生完！
鍾嘉欣在家產子
嘉欣喺錄音表示，囝囝Jared係個「大B」，一出世就好多頭髮。家人都話BB好似同家姐Kelly餅印一樣。自己今次選擇咗在家產子，得到專業嘅助產士支援，所以好安全咁生BB。成個生產過程，都好順利，絕對係畢生難忘的經歷。
囝囝超似爸爸
鍾嘉欣9月於Instagram 發佈相片，公佈自己囝囝出世喇！嘉欣表示囝囝重7磅14安士，樣子極似爸爸！嘉欣仲表示今胎係在家產子。恭喜曬嘉欣！
鍾嘉欣叫網友估BB性別
鍾嘉欣今年三月宣布再度有喜，不過一直都未公開BB性別。近日喺個人社交網上載一張摸住巨肚的相片，見到嘉欣於肚上畫上代表男嬰的粉藍色心心，及代表女嬰的粉紅色心心，並留言指老公唔想公開BB性別以作驚喜，但係佢等唔切，及想找出真相！仲問網友，BB係男仔定女仔？
鍾嘉欣晒床照宣布BB性別
鍾嘉欣日前叫大家估佢今呢胎係仔定女，今日就終於開估，見到佢肚上同樣有藍色心心，不過就少了一邊粉紅色心心，原來係想同大家宣布今胎係B仔！嘉欣留言：「JKL are happy to announce that we are expecting a baby boy!!!」「JKL」即係老公Jeremy、女兒Kelly同嘉欣Linda呀！
湊成一個「好」字
嘉欣喺社交網站上載幾張床上照，見到佢身穿短身上衣展示肚皮，擺出不同甫士，懷孕逾七個月依然肥胎不肥人。大量網民都留言恭喜嘉欣與老公湊成一個「好」字！
鍾嘉欣頻發福利照
鍾嘉欣早前宣布懷上第二胎，同時宣布會離開加盟了13年的TVB，雖然已經甚少會出席公開活動，但嘉欣耐唔耐就會派福利。有次佢就上載三張靚相，身穿華麗露肩短裙，依然美豔動人，其中兩張相仲擺埋誘人甫士，大騷白滑肌膚及修長美腿。
鍾嘉欣生埋今胎夠晒數
之前佢由加拿大返港出席活動，被問到肚中BB性別，嘉欣就話雖然已經照咗，不過兩公婆叫醫生唔好講，希望保持驚喜！嘉欣同時透露，無論今胎係仔係女都好，都會係最後一胎，兩個夠晒數！
