鐵人爸爸李致和生活化教運動

Dec 20 2015

李致和，香港三項鐵人運動最強代表，即使已退役，仍是香港人心目中的首席鐵人。15年的職業生涯獲獎無數，連續多年稱霸中港鐵人賽冠軍，2006年摘下亞運銀牌，更是首位參加奧運三鐵的香港運動員，付出過無比鬥志及耐力。

2011年，「李鐵人」卸下戰衣，轉執教鞭擔任中文大學體育運動科學系講師，並組織家庭展開新一頁，誕下可愛女兒李詩翹（Ciara）。原來鐵人與天下間的爸爸一樣，終歸都會被女兒融掉。

2_243K_family — 鐵人面對女兒也要放下身段，扮鬼扮馬氹女兒開心。（女兒李詩翹Ciara 3歲半）

鐵人爸爸李致和生活化教運動 — 致和十五年職業生涯中獲獎無數，在香港三鐵的成就無人能及。

鐵人湊女沒耐性

「I love you, you love me, we are happy family！」眼前的鐵人竟然對囡囡唱起冧歌，詩翹的開心笑臉已融掉了鐵人，但致和揚言不會做慈父，會好好教導她的言行舉止，「我成日都想錫佢，但我都冇乜縱佢嘅，曳嗰陣我有時會過分嚴厲。」
詩翹束起孖辮，樣子可愛跳脫，與外形硬朗的爸爸不太相像，致和笑言她比較似媽咪，「佢好貪靚鍾意照鏡，成日撥啲頭髮，叫佢剪頭髮又唔肯剪。」致和平日教務繁忙，還要保持運動訓練，所以囡囡比較黐媽咪，「媽咪比我更加錫佢，我始終要返工，同埋耐性冇咁好。」身為鐵人竟然沒耐性？「無錯，我啲耐性去晒運動同工作，所以我冇乜耐性對其他嘢。」

4_243K_family — 2000年代是他職業生涯最輝煌時期，包括06年亞運銀牌及08年獲頒香港傑出運動員獎。

繼續比賽做好身教

退役後，運動場上的風光只成回憶，對致和來說，不會因家庭而忘記過去，獎項與家庭同樣珍貴，「之前贏過嘅獎項同有咗自己囡囡，係兩樣唔同嘅事，獎項係用自己努力同奮鬥去換取嘅成果，當然囡囡都係我寶貝，所以兩樣對我嚟講都咁重要。」
他有向女兒分享以前的英勇事蹟，為了做個好榜樣，公餘時間仍有練跑、踏單車，參加較輕鬆的體育比賽，如馬拉松及單車公路賽等，希望女兒為自己打氣，並感染她多做運動。「平時會盡量抽多啲時間陪詩翹玩，帶佢上游水堂、出去踩單車玩吓。家長要做好身教，自己都要多做運動，唔好淨係叫小朋友做，要同小朋友一齊做，其實小朋友最鍾意係同父母一齊玩，潛移默化令佢哋愛上運動。」

李致和威水史
1999-2004年連續6屆香港國際三項鐵人錦標賽男子精英組公開賽冠軍
2001-2004年連續4屆中國國際三項鐵人錦標賽男子精英組公開賽冠軍
2004年出戰雅典奧運，成為首位參加奧運三鐵的香港運動員
2006年多哈亞運三項鐵人銀牌
2008年香港傑出運動員獎
2009年全運會三項鐵人銅牌
2010年亞洲沙灘運動會金牌

5_243K_family — 致和退役後狀態依然好fit，全因他對運動充滿熱誠，同時為學生及女兒做好身教。他覺得教導新一代學生必須生活化及靈活，「叫佢哋對住本書讀好難投入，要將教材生活化，好似教體適能科目，對住女仔話做呢啲動作可以消脂，佢哋就會好有興趣喇。」

游水單車跑步最基本

三項鐵人運動包括游水、單車、跑步，致和雖沒打算訓練囡囡成為「小女鐵人」，但該三項是基本運動，希望囡囡從小積極參與。「佢依家三歲半，已經俾佢去學游水，因為游水係一項技能；單車方面都係踩吓三輪車，以玩為主，得閒就帶佢去公園同單車徑，踩吓碌吓輕鬆啲；跑步就睇佢自己有冇興趣喇，佢依家都係鍾意你追住我，我追住你咁，希望從生活中俾佢熟習呢三項運動。」
不過致和比賽就叻，教女又另一回事，好似游水他寧願交由友人負責，都不願自己教，訪問當日就遇上詩翹趕去泳班。「我自己教佢實扭扭擰擰，所以咪搵泳會朋友教佢，可以同成班小朋友一齊玩，個氣氛輕鬆啲學得好啲。」

7_243K_family — 致和做爸爸後多接觸了小朋友的世界，不再只有比賽和訓練。

8_243K_family — 詩翹性格比較怕事，不敢去嘗試，但致和覺得都有個好處，「佢一有咩事會問過爹哋媽咪先會做，算好乖㗎喇。」

培養運動從跑跳擲開始

致和不會指定囡囡玩該三項運動，只是自己熟悉才先讓她接觸，最重要是培養運動習慣，令她愛上運動就夠。「佢依家都有其他興趣，好似女仔都鍾意跳舞，都會參加跳舞班發掘吓。」他強調要培養小朋友做運動，必須從生活中摸索，不能一開始就叫他們打桌球、打乒乓球，「小朋友要從基本動作（Fundamental Movement）開始，包括跑、跳、擲。」
問詩翹其實最鍾意甚麼運動呀？「彈彈床！仲有喺水度玩！」總之有得玩就最鍾意啦！
詩翹現階段盡量接觸多項活動，就讀樂基幼兒學校（駿景園） K1的她，原來幾有唱歌天分，去年N班已經參加歌唱比賽，贏得人生第一個獎盃仔，別具意義！

鐵人推介戶外場
1.蒲崗村道
公園位於九龍鑽石山，佔地約9公頃，公園提供多元化康樂設施包括人造草地球場、長約一公里的高架單車徑、及適合初學者的單車園地讓小朋友放電。
2.科學園單車徑
由沙田至大埔，途經科學園的一段單車徑臨海而建，寬闊筆直難度低，老少咸宜，絕對稱得是香港最熱門單車徑。
3.馬鞍山海濱長廊
全長3.2公里，佔地約5.2公頃，位於馬鞍山沿海一帶，前臨沙田海，遠眺八仙嶺羣峯，海天一色。場內設有緩跑徑及兒童遊樂場等，適合一家大細來散心。
4.環保農場
讓小朋友多認識動植物，了解食物從何來，更可以餵羊仔，好多農場亦設有大空地讓小朋友跑跳、踏單車，夠一家大細玩足一日。

11_243K_family — 致和現時仍有參加單車和跑步比賽，為女兒做個好榜樣，他笑稱女兒都有到場支持，「佢見到我都會叫我加油、快啲！」

為入名校做運動超錯

人人都知做運動強身健體，對小朋友有益，惟在功利的香港社會，好多家長視做運動為名校入場券，現身為教師的致和，都觀察到此現象，勸告家長心態不應太功利，即使入到名校，小朋友最終都會放棄運動。
「呢個目標係唔啱，你想小朋友做運動係好，但個目標唔應該咁功利，你因為游水好成績而拎到學校offer，呢個係一個bonus，我見過有為咗入名校玩運動嘅學生，上咗大學就放棄運動，如果想學生keep住做運動習慣，就唔好為咗拎offer，而係建立興趣，只要有興趣就會自動波。好似我自己雖然退咗役，但我依然鍾意做運動，唔係為咗教學席位或獎項而做。」

13_243K_family — 女兒性格貪玩，有得出街玩就好投入，死頂至上車才睡覺。

12_243K_family — 詩翹被老師讚揚上課乖巧，更睇中她有唱歌天分，選她做代表參加歌唱比賽。

小鐵人賽低至八歲

幸而好多學校也積極推廣各類運動，提供更多機會讓學生發掘興趣，一展所長，其中三項鐵人運動也席捲學界，培養新一代「李致和」，而香港三項鐵人總會每年也舉辦多項「小鐵人賽」，吸引好多小學生參加。致和指三鐵或兩鐵，最細級別都要八至十歲，賽道短距離，「例如游200米，跑400米，可以俾小朋友一試。」
致和有今日成就，並非從小參賽贏在起跑線，在現今社會眼中或算遲起步，他14歲才正式接受三鐵訓練及比賽，最終成就有目共睹，證明起跑線並非一切。「我覺得唔需要太早參加比賽，雖然比賽可以感受唔同體驗，但小學階段俾小朋友接觸，多參與戶外活動已經足夠。」