「樂壇小強」阮民安三年抱兩 嬌妻為日本原宿女神

撰文：Kayla｜圖片來源：Facebook、《Kawaii International》截圖

陪老婆入產房

喜獲麟兒嘅阮民安，接受傳媒訪問時表示，自己因為怕血，所以上一胎冇陪老婆入到產房，老婆上次經歷咗20幾個鐘先生到大仔，令佢覺得好內疚，所以第二胎就克服自己怕血嘅問題，陪老婆入產房生BB：「今次睇住成個過程，佢好辛苦，一度想放棄。」

阮民安仲話產房個護士認得佢，叫佢唱首歌氹老婆開心：「最後我都冇認真唱，只係不停咁分散佢注意力。」好彩第二胎都無驚無險，順順利利出世同爸爸媽媽見面！

老婆Eva為原宿女神

阮民安同老婆拍拖兩年，並於2017年結婚，同年生咗大仔阮治童，不時見到Eva喺Facebook上分享同仔仔嘅合照，非常溫馨。原來阮民安老婆Eva大有來頭，有「原宿女神」之稱嘅Eva，原名張倚雯，身兼模特兒、設計師、DJ 等多重身份，工作不時都要穿梭日本、香港、中國內地，有「港版Kyary Pamyu Pamyu」之稱。

Eva平時除咗拍廣告，打碟都有一手，曾多次應邀為戶外Show做DJ，更曾接拍日劇《Ghostraight》、《天國…幽靈…不思議…》等，喺日本頗有名氣。

千呎豪宅曝光？

Eva喺日本發展得非常好，仲曾經接受過日本電視頻道NHK World節目《Kawaii International》嘅訪問，帶攝製團去屋企做貼身訪問，令阮民安嘅豪宅曝光！

不過有網民話，其實阮民安一家係住喺酒店式公寓（Service Apartment）嘅底層，所以拍攝隊所拍到嘅超大泳池，其實係酒店設施之一。不過屋企毋須富麗堂皇，只要一家有愛就得啦！