陳國邦羅敏莊 育成小歌后
兩人2012年意外懷有女兒陳禛，她的出現令兩人關係更親密，增添家的感覺，國邦更藉着訪問輪到向女兒「示愛」：「我作為爸爸好多謝有你呢個女，因為呢個女真係好特別。」
撰文：Ling
攝影：Simpson Chiu（部分相片由受訪者提供）
場地：FunZone@Ma On Shan（Tel: 2631 4001）
陳國邦羅敏莊 夫妻相處一凹一凸
國邦與Mimi的性格一凹一凸，男方較內斂，女方則外向，喜歡表達自己，雖然會產生矛盾，但同時可以相處得很好，Mimi說：「佢會教我有啲嘢唔一定要講出嚟，好似佢喺個節目先講出嚟，就可以令我非常激動。」國邦認為不同性格相處的話題，可以開講座，甚至十多個課堂去研究。「每個人都唔同，有一凹一凸好成功，但都有好多一凹一凸分手收場，我亦都認識有夫婦從來都冇嗌交，其實任何情況都會發生，而每一個叫做成功嘅例子，都可以話你聽佢嘅成功之道。但我哋面對嘅係人，每個人都唔同，你要搵適合自己嘅辦法去面對你身邊伴侶，冇一個成功嘅方程式。」Mimi亦覺得兩人相處沒有「相處之道」，只是兩人想繼續相處，就思考怎樣行下一步。
Mimi與國邦多年的關係中，一直都是女追男，做埋柴可夫斯基，直到結婚一刻，買求婚戒指及結婚酒席均由Mimi一手包辦，叫未來老公負責到場就可。由關係一開始，Mimi已知道國邦並非浪漫的人，所以浪漫與否並不影響他們關係，國邦指自己平日雖然無情趣，不過「一係唔做，一做就一擊即中！」
父母常錫錫 感染囡囡
平日在家中，Mimi較多甜言蜜語，但好少對外公開；反而老公在家不說，對外卻如此開放。「佢向住大眾講得叻過我，但平時佢又唔同我講呢啲嘢㗎喎，所以好多謝呢個節目俾機會佢講呢啲嘢俾我聽。」
國邦為人行動最實際，口裏不說，身體卻很誠實，每天都會錫錫老婆，連囡囡都被感染。「我哋成日都錫錫、拖手，食飯前、瞓覺前、起身、出門口前，一日都錫好多次，所以個女都俾我哋感染咗，好鍾意錫我哋，完全唔吝嗇，仲會錫佢鍾意嘅人。」
囡囡成就3D立體的家
兩人原本沒打算要小朋友，一次意外他們接受了這份大禮，女兒陳禛的出現令他們關係更緊密，好有家的感覺，國邦更形容「家」這個字由2D變得3D立體。但他明言不會追多個，有陳禛一個小朋友已經夠幸福。「因為呢個係陳禛！人好特別，你就係你，每人都唔好睇輕自己，亦都唔好高估自己，每個人都只有一個。所以陳禛，我作為爸爸好多謝有你呢個女，因為呢個女真係好特別。」陳禛也可愛地回答爸爸：「我係呀！」
Mimi坦言，如果當初有計劃要小朋友，是應該早一些，因體力比較好，但在思想上現在是一個right time，「如果我後生啲，未必有耐性同佢一齊玩，但依家我哋有耐性咗。」
在湊小朋友方面，性格冷靜的國邦反而是一名急進爸爸，Mimi因母性強烈，比較有耐性、EQ高。「打個比喻，我叫個女去做一件事，我數1、2、3，數到3你都唔做我就罰，媽咪反而會數到10先叫佢去做。」國邦笑言太太先被他訓練了十年，再由囡囡延續訓練，令太太EQ極高！
禮貌必須從小教
陳禛性格活潑得來乖巧有禮，好多人大讚國邦與Mimi教得好，他們認為自己非嚴父嚴母，惟在待人處事上比較嚴謹，從囡囡識玩玩具開始，就展開教導，國邦說︰「我一定要佢自己執番玩具，執完先可以再拎第二件玩具出嚟；我哋又成日教佢分享，包括玩具、食物，人哋俾嘢你就一定要講唔該，從小灌輸佢呢個觀念，自自然成為習慣。」他指囡囡在這方面做得不錯，有賴盡早展開道德教育，令父母不必嚴苛對待。
有見部分小朋友曳起上來會誇張到𦧲地，國邦有看過一些兒童學家的分析，這些小朋友是不斷挑戰父母的底線。「小朋友已經建立咗𦧲地扭計嘅模式，要改正的話真係要好嚴。我哋教育開始得早，所以唔使用到咁嚴都有唔錯嘅成績。」
Mimi也相信，小朋友部分性格是天生，陳禛性格好，可能是她天生質地好。「我覺得我哋有一半功勞，佢自己都有一半功勞，我覺得我同大家嘅教法都差唔多。有啲小朋友天生係好活躍、 硬頸，咁真係難教啲。」Mimi覺得陳禛除了頭髮最似媽咪鬈曲，其樂觀、親切及喜歡與朋友打交道的性格亦似足她，而細心思考這方面就似爸爸，有齊父母的優點。「外表都係㗎，啲人成日話個樣似爸爸，個頭就似我，好fair嘅，真係生咗小朋友先發覺咁神奇。」
四歲唱成首〈三人行〉
已經四歲大的陳禛，興趣方面已慢慢浮現，父母皆是演藝之人，陳禛絕對遺傳了演藝細胞。日前國邦與Mimi一家三口做facebook live直播訪問期間，陳禛即場獻唱〈三人行〉（按此重溫），獲網民大讚好聽、音準，歌詞更一字不漏！Mimi也笑言：「我自己唱歌我都覺得佢犀利！」
每次陳禛唱歌時，好多人對Mimi說：「你訓練得好好喎！」但Mimi澄清從來沒有訓練她，「陳禛好鍾意唱歌，又好鍾意聽歌，仲會自動跳舞，佢嘅音樂感好強烈。有時我會介紹啲歌俾佢聽，聽多幾次時，佢為咗要學識呢隻歌，就要求我播多幾次，希望做到成功為止！」
國邦指就培養小朋友表演這方面，可能與其他父母有所不同。「我哋唔會訓練佢特登表演、特登唱歌，但因為我哋兩夫婦都係從事表演事業，所以當我哋觀察到陳禛鍾意唱歌嘅時候，我哋就會教佢點樣唱得好。」
國邦又自小與陳禛玩演技遊戲，例如角色扮演，陳禛扮媽媽，國邦扮陳禛，Mimi扮爸爸。「大人可以用技巧掩飾情緒，細路仔唔識，當我哋知道佢鍾意表演先對佢有要求，好似表達能力方面，如果佢依依哦哦話想食飯，我就會叫佢諗清楚自己想講咩先，講嘢要講清楚啲，發音咬字要清楚，去唔到嗰個音就叫佢大力啲。所以係個次序調轉，係佢鍾意，我哋先有要求。」
在有規範的自由下發展
國邦對演戲一直努力學習，每次接觸不同劇本，與不同對手合作，又尋到新的學習機會。他強調自己追求學問，但小朋友階段應以開心為主，因學習之路遙遠漫長。「唔需要緊張幼稚園要點樣、小學又點樣，我哋對小朋友嘅目標只係搵間學校，佢可以開心去玩就得。」
陳禛現就讀一間國際學校幼稚園，Mimi坦言不想做功課，送女入該校是因學校明言，頭一段時間都沒有功課。「依家好多傳統學校都要做好多功課，我係好驚，唔想面對。呢間學校講明細個呢段時間唔使做功課，但之後要做的話，小朋友已經大個啲，可以自己面對，唔係我迫佢做。其實我最怕係咁細個就迫佢做功課，搞到我哋關係變差。」
維持緊密的親子關係，是國邦和Mimi對湊女的重中之重，會影響親子關係的事，他們盡量不做，並讓孩子自由發展，Mimi指自己的教法非一般，家長未必認同。「我俾小朋友好free，我會俾食糖、俾佢夜瞓。佢係我個女，我有我嘅睇法、教法，我唔驚佢太free，驚我就唔入呢啲學校，我就係想佢唔係傳統學校教法。」
國邦補充，讓孩子自由發展的定義，並非毫無規範，自由是應有一定限制。「其實社會上嘅自由一路都有規範，就算個女讀嘅學校好自由，佢畢竟係一間學校，有校規，好似朝早9點返學，下午5點放學，唔係自由到你鍾意返就返，唔返就唔返。」
食糖、遲睡，這些在家長眼中的壞習慣，他們都覺得可以做，最重要灌輸正確思想，兩人異口同聲說：「食糖唔緊要，只要唔係當飯食，食完刷牙就得啦，你知道食糖嘅好處，同時要懂得防止壞處發生。屋企有糖，佢想食可以俾佢食，但屋企冇佢都堅持食， 我哋就會解釋番：『陳禛，冇就係冇㗎喇，唔係你想有咩就有咩。』夜瞓都係，你唔瞓覺唔緊要，但第二日要早起你就一定要起身，當然佢可能會賴床，但要提醒番佢，尋晚我哋叫你瞓覺你唔瞓，你今晚早啲瞓番。」
簡單而言，父母讓孩子在有規範的自由下生活，同時讓他們理解責任，國邦說：「如果大家覺得陳禛係一個唔錯嘅細路仔，我哋所俾嘅自由就係咁。」
成長日誌
出世
3個月
10個月
1歲
2歲
3歲
