陳展鵬單文柔公佈BB性別 網民：已經改埋英文名？！

撰文：東方新地｜圖片：instagram

陳展鵬單文柔公布小豬比性別

42歲「視帝」陳展鵬同28歲單文柔拍拖2年，二人於去年結婚並宣佈有喜！雖然一直都對BB性別保密，但日前二人為小豬比大搞Baby shower，同時就驚喜公佈小豬比性別！

準媽咪單文柔喺個人社交網甫出IG story，見到單文柔打開紙箱見到粉紅色氣球，其中一個大氣球就印住「It’s a girl!」，驚喜公布小豬比性別！

當日嘅baby shower中，單文柔迎請咗一班好姐妹，包括魏韵芝、劉穎鏇、黃心穎、張寶兒、李美慧等，而大家都有喺個人社交網甫相，見到準媽咪陀B陀得非常靚，完全冇走樣！

另一方面，未知煎pan同單文柔係咪已經為小豬比改好英文名，見準媽咪不斷以BabyQ稱肚中BB！

單文柔佗B愈陀愈靚

今年係單文柔婚後第一次以人妻身份過年，呢日同屆港姐劉穎鏇及魏韵芝，以及同係「美女學徒」嘅鍾晴就去咗佢屋企到拜年。至今已經佗B五個月嘅單文柔，個肚已經非常明顯，班姊妹仲送咗BB衫畀單文柔𠻹！

姊妹聚會當然要影合照留念啦，相中見到素顏嘅單文柔孕肚非常明顯，唔少網民都讚佗得好靚！而成班姊妹合照時仲喺單文柔肚上擺出心心手勢，場面非常溫馨！

陳展鵬Ready好陪入產房

早前，陳展鵬亦都上載一張上育嬰班嘅相片於社交平台，相中佢戴上口罩，一隻手拎住尿片，另一隻手托起BB雙腳，親自幫道具BB換尿片，仲留言：「豬爸爸豬媽媽Are you Ready🤘🏻I am Ready」其後佢更表示，對湊B好有信心，已經安排好晒營養師、產前產後配套同陪月，最重要就係已經準備好陪太太入產房，仲話「呢個年代，男人唔陪太太入產房同唔去照顧小朋友係犯法㗎，要報警！」

BB改名做「阿Q」

雖然陳展鵬同單文柔希望舉行完Baby Shower先公開BB性別，不過佢哋就已經諗好BB嘅英文名係Q字頭，因為父母嘅英文名字頭係R（Ruco）及P（Phoebe），夾喺R同P中間係Q，所以想「小豬脾」英文名都想係Q字頭，或簡稱「阿Q」，仲話：「寓意人見人愛，開開心心，因為豬B係可愛同有福。」

陳展鵬陪大肚老婆齊齊戒口

單文柔同大多數女生一樣喜愛食甜品，但孕婦忌吃太甜，唯有戒口。除咗甜食，陳展鵬更透露榴櫣、士多啤梨、麻辣火鍋、生冷食物如魚生、瀨尿蝦、大閘蟹、凍飲同雪糕等通通都唔食得。

陳展鵬：「點會偷食呀！」

於是，廿四孝老公陳展鵬，決定陪大肚老婆一齊戒口。老婆唔食得嘅，自己都唔食，佢仲話：「點解我唔食得？？？法官大人冤枉!!!!! 」

話雖如此，當陳展鵬被問到會唔會去「偷食」時，他甜蜜地回：「我差不多每一餐都同佢一齊食，點樣偷食呀！」仲Man爆咁話：「我依家同佢一樣，都唔食得呢啲嘢！」

網民們都大讚陳展鵬好男人，「老婆最大！ 」、「哈哈 乖！聽老婆的話 」、「一句講哂 老婆大哂」，非常羨佢哋夫婦甜蜜！

單文柔晒吊帶大肚寫真

單文柔首次晒孕肚，佢喺Ig貼咗一張身穿白色吊帶裙嘅寫真照。可以清楚見到腹部隆起，唔少網民紛紛猜測佢懷孕約5個月，旁邊更有鮮花襯托，仙氣十足呀。

單文柔留言話﹕「你們的假期過得好？ 剛剛過了我最喜歡的節日。今年。。。買了一棵真的聖誕樹，有好香的松樹味，佈置了我們的家，做了兩頓晚餐，在聖誕樹下準備了禮物，看了一場戲。最重要是今年可以和你一起度過。」