陳曼娜轟陪月唔稱職 用尿水幫BB沖涼
廣告
陳曼娜女兒Joie今年誕下B女Kaelyn，令陳曼娜正式升呢做婆婆，專注玩孫女。不過佢哋早前就不幸遇到唔稱職嘅陪月，竟然用尿水幫BB沖涼，搞到B女皮膚敏感，全家都大呻心痛呀！日前，陳曼娜為孫女大搞百日宴，唔少圈中好友都有出席，好熱鬧呀！
撰文：Sunday Kiss
相片：羅霖IG
陳曼娜轟陪月唔稱職
陳曼娜女兒Joie上年嫁俾上市公司董事Dicky，仲火速造人並誕下B女Kaelyn。日前佢哋一家就為B女舉辦百宴，大宴親朋，好多陳曼娜嘅圈中好友都有俾面出席，包括修哥同安德尊等人。修哥仲幫當日著住豹紋套裝嘅Kaelyn改咗個乳名，叫做「小豹妹」，好有霸氣呀！
不過，陳曼娜當日接受訪問時就話最近因為陪月而搞到唔開心！原來佢透過朋友介紹請咗一個陪月姐姐幫手湊孫女，點知知陪月就十分唔稱職，衛生意識仲好差！
陳曼娜話佢哋一家一直都好擔心陪月唔稱職，所以佢哋都有喺屋企安裝閉路電視，結果就發現陪月好唔衛生，BB沖涼時瀨尿都唔換過一盤新水，變相用尿水幫BB沖涼，搞到B女全身都皮膚敏感。陳曼娜仲話陪月姐姐換片時唔洗手就幫BB搽嘢，令佢哋十分心痛呀！
陳曼娜提醒其他新手爸媽如果唔係太忙都唔好將湊B重任假手於人，因為唔係個個都咁好彩可以請到一個好保姆，佢自己就買咗好大個教訓啦！佢宜家就請咗一個菲律賓工人幫手湊B，但佢自己都要化身保姆，落手落腳湊孫呀！
