凌晨遇一大難題！陳柏宇老婆：我扮唔到大方！
廣告
歌手陳柏宇自從舊年榮升做爸爸之後，就同女女形影不離。不過，呢日得返佢老婆符曉薇（Leanne）係屋企時竟然發生一大難題，而且仲有其他問題同時發生，搞到Leanne忍唔住要係凌晨4點幾出Post發洩！
撰文：Kammy | 圖片來源：Instagram
遇上一大難題
陳柏宇同太太Leanne自去年榮升做爸爸媽媽之後，經常都晒愛女Abigail嘅相到社交網站，不少網民都大讚女女可愛。呢日，Leanne就凌晨4點幾發貼文，指自己遇到條難題：「1）個囡（女）扭眼訓要抱住訓（瞓），訓左（咗）放返（番）落床又喊，一定要抱，尿都要你抱住去痾（屙），放都無（冇）得放；2）Bessie同V打架；3）seven又打亞V，所有野同時發生你會點做？」
遇上寵物打架，仲要係貓（Seven）狗（V、Bessie）混戰都咪話唔頭痛，加上Leanne要抱住女女Abigail，見到呢個情況都好傷腦筋。Leanne就話當時佢就先放低個女由佢喊，再一手分開三隻寵物，然後睇完各位嘅傷口，再消毒傷口。
不過，點知Bessie畀阿V咬傷耳仔，阿V就畀Seven打pat pat，仲打到開花咁流血，「痛到立即屙屎」。Leanne係執屎嘅同時再將Bessie 同seven 捉入房冷靜下，形容「經過一個精彩嘅晚上」。
相信好多人都會問，咁陳柏宇去咗邊？原來Leanne見老公好耐冇放過假，所以放人畀佢出去玩，點知老公一唔喺屋企就要經歷「驚心動魄嘅晚上」，最後仲話「扮大方唔到，打咗過去（陳柏宇）發洩」。不過，其實真係要畀個「叻」Leanne，因為唔係人人都可以處理到呢個咁混亂嘅場面！
