患病食藥被逼「停餵奶」符曉薇嘆：心情難受
撰文：Chloe | 圖片：leannefu IG、陳柏宇IG
陳柏宇太太患病食藥被逼「停餵奶」
呢日，陳柏宇太太符曉薇（leanne）喺突然社交網大嘆心情低落，事因佢睇醫生後被要求食藥「停餵奶」。原來，Leanne係乙型肝炎帶菌者，自從Abi出世後為了餵母乳一直停止用藥，但最近發現肝指數飆升需要重新食藥。事發突然，愛女出生後一直樂做母乳媽媽嘅Leanne亦只能聽從醫生指引去做，大嘆「心情難過」。相信每一位母乳媽媽都好明白Leanne此刻的心情。
原來當知道自己唔可以餵母乳，心情會有點難受。我係一個乙型肝炎帶菌者，因為指數高所以懷孕期要食藥，但又因為餵母乳，Abi出世就要停藥。停藥之後醫生又擔心我肝指數會升，所以每個月都要驗血check 住，由於指數由上個月81已經上升到232，醫生要食返藥唔可以再餵母乳。雖然醫生同我講，而家d奶粉好好，會足夠bb嘅營養（成日聽d媽媽講飲奶粉bb好難去便便），但個刻果心都係有啲難過。以我樂觀嘅性格，難過一陣就無野，而家要開始搵岩abi嘅奶粉。
符曉薇自爆產後連升8個cup
陳柏宇老婆符曉薇（Leanne）日前產後首次出席活動，做咗兩個月媽咪，已經適應咗新身份，最唔適應嘅，反而係身材突變，因為餵全人奶，上圍由C升至JJ，連升8個cup 呀！
為囡囡健康冇計較
陳柏宇同符曉薇嘅囡囡Abigail已經兩個月大，因為Leanne係餵全人奶，所以身型都出現咗變化，上圍狂升8個cup，佢仲話而家好討厭自己個胸。
Leanne話本來都唔知原來係有JJ cup，喺陀B嘅時候已經升咗好多，最點知最近去買bra，個sales先畀個I cup佢試，點知都着唔落，原來已經升到去JJ，連個sales都話好誇張！
本來Leanne有諗過唔再餵人奶，但係考慮到BB嘅健康，真係咩都要放低！Leanne之前係C cup，而家升到JJ，都真係睇唔慣，想生完第二胎去縮胸，但係後來聽好多媽媽朋友講，收咗奶之後就會自然縮番細 ，先接受到呢件事。
Leanne仲話，因為個女係早產， 所以好難湊，成日都喊，又餐餐嘔，而家每兩個鐘頭就要餵一次奶，真係完全冇時間抖，而老公陳柏宇就掛住瞓覺，過咗頭一個月，已經冇幫手湊B，不過就仲識氹佢，讚做得好叻！
陳柏宇太太 大嘆新手媽媽湊B心聲
早前，符曉薇就喺社交網大嘆新手媽媽湊B心得。佢上載了一張同囡囡嘅合照，並留言話：「近排發現最無聊嘅問題，就係問我做緊乜。」
leanne接著解釋，「我每日每三個鐘餵奶，撞正佢心情好個餐，半個鐘可以攪得掂。撞正佢心情差個餐，起碼搞成個幾鐘，之後仲要每三個鐘泵奶，自己都冇乜時間做自己野。有時大小姐仲唔肯訓，扭計要抱（其實望到佢，已經想抱佢），唔好講話自己時間，去個廁所都唔得。不過早上有陪月幫手，可以訓多兩個鐘同痾篤屎，所以話陪月有幾重要！」
唔少網友都同Leanne講「要好好珍惜同享受照顧BB嘅過程」，另有網民大讚符曉薇係好媽媽：「湊B唔假手於人！」
