靚媽廚神梁雅琳 六招改善小朋友偏食
自阿Bu兩歲起，Hilda就讓她享受下廚樂，由準備色彩繽紛的食材開始教導，讓女兒愛上每種食物，加上千變萬化的煮法，吸引女兒每日自薦幫忙，不止「幫手食」咁簡單，Hilda今次分享了六大法寶，幫助家長改善孩子偏食問題。
撰文︰Ling
攝影︰Killy Sung（部分相片由受訪者提供）
場地︰PizzaExpress@Causeway Bay（Tel: 2506 0688）
2歲開始廚房教育
阿Bu性格活潑幽默，是一個開心的小朋友，尤其見到食物會雙眼發光！「佢同我一樣見到食物就好開心，應該遺傳咗我，可以同佢一齊分享相同興趣好幸福！」阿Bu似媽咪為食，亦似爸爸喜歡戶外活動及汪洋大海，令原本不好戶外活動的Hilda也要同行。「以前我都唔會陪老公去海灘曬太陽，但阿女好鍾意去海灘游水，反而我畀佢感染咗。」
Hilda自囡囡兩歲起，就讓她一起下廚，每年母親節就一同拍攝「親子下廚片」，雖然場面混亂，但見到囡囡享受下廚樂，一切都值得。「開頭佢都係為食先入廚，食晒我準備嘅材料，但依家佢開始享受同我一齊煮，唔會淨係掛住食。」問阿Bu最鍾意煮甚麼，她說︰「我鍾意同媽咪煮麵麵、菜菜、Pizza，仲有發蛋，鍾意喺屋企煮。」
親自下廚 教育最重要
Hilda笑指每次入廚房，阿Bu都走入來自薦幫手，「佢會問我煮緊咩?可唔可以幫手洗菜、搣洋葱，好主動，因為佢覺得入廚好好玩。」Hilda讚阿Bu發蛋最努力，發足十幾分鐘，雖然暫時未完成過一道菜式，但好多菜式都有參與。
Hilda對囡囡的教育比較寬鬆,學術上不會催谷,升小亦未有計 劃,她比較著重培養囡囡的性格、道德觀和發掘興趣。
廚房有爐頭和大量刀具，一不小心易生意外，很多家長都限制孩子進出廚房。Hilda也同意廚房有一定危險性，所以親子下廚最重要是教育，並為孩子購入一些安全廚具。「首先要同小朋友講解最危險嘅地方，點樣會整親，家長亦要用非常肯定嘅語氣講解，小朋友係會學習到，而且坊間有啲廚具係啱小朋友用，刀具唔會切親手。」阿Bu聞言也搶答道：「刀係好危險，會整親手，我要小心。」阿Bu牢記著媽咪的教導，十分叻女！一直有教授親子班的Hilda補充，低至兩歲的小孩已可接觸烹飪，由準備食材開始，例如學習剝香蕉皮，認識不同食物。
從色彩繽紛的食材入手
小朋友好多時有偏食習慣，最不喜歡食蔬菜，覺得淡而無味。阿Bu不單止沒有偏食，更非常喜歡食蔬菜，她表示最鍾意食番茄、茄子、粟米和秋葵，「同埋花花嘅vegetable！」即是西蘭花、椰菜花，有賣相又好味！
Hilda建議家長，首先從選擇食材入手，多用色彩繽紛的配搭。「一餐最少有四五種顏色，唔同顏色代表唔同營養素，一餐有粉紅色、綠色、紫色，已經提高到小朋友食慾。」第二，父母應多讓小朋友一起下廚，提高他們對食物的認知和進食意欲，包保小朋友會把完成品食清光！
Hilda的好友Pizza Express產品研發經理鄭慧芝（Sophia），訪問當日與Hilda進行廚藝比拼，她亦有貼士提供，要培養孩子有健康飲食習慣，父母需要以身作則，並把蔬菜煮成不同形狀或打成醬汁去吸引孩子，她透露還有一招撒手鐧：「我帶兩個仔同朋友仔gathering時，當朋友仔食菜嗰陣，我就話『嘩！你睇吓小朋友食菜幾叻，不如你都試吓！』呢招好有效！」Hilda相當同意，把蔬菜切條、切粒或打成醬汁，令小朋友不覺得沉悶。「每一種食法、每一種口感都唔同，好似將蔬菜切條可以包成米紙卷，或者切粒鋪喺Pizza上面，就容易吸引小朋友食多啲。」
Hilda特別提醒家長要留意天氣，隨時影響孩子的食慾，「天氣咁熱你仲煲粥，大人都唔想食啦，更何況係小朋友，應該煮一啲輕盈菜式。」家長亦需要多動腦筋，在創意方面下些工夫，不能獨沽一味。「唔好一日三餐，一星期每餐午飯都係炒飯，大人都覺得悶啦。好似五穀類需要進食多啲，選擇都有好多，烏冬、米粉、通粉、意粉都係，意粉仲有好多唔同形狀；米飯都有好多款，白米可以加啲藜麥落去變唔同顏色;蔬菜有更多顏色同質感仲多嘢玩！」
6招改善偏食
- 選擇色彩繽紛的食材
- 多與孩子親子下廚
- 父母身教多吃蔬菜
- 把蔬菜煮成不同形狀或打成醬汁
- 留意天氣變化
- 要有創意，每餐應用不同食材配搭
讀聖保羅堂有禮貌
除了廚房和飲食教育之外，Hilda十分重視培養囡囡性格及發展興趣，學術是其次，長大後可以慢慢學。「阿女依家仲細，我想佢享受童年，玩多啲、體驗多啲，尤其香港嘅環境比較大壓力，更加要培養佢開心、願意傾訴嘅性格。」
現就讀聖保羅堂幼稚園K2的阿Bu，校園生活很愉快，Hilda希望她在傳統幼稚園能打好根基，學好正確價值觀，並讚揚學校有愛心，壓力不大，「只要同學校做好溝通就OK，校長老師都好有心，我見小朋友出到嚟都學得開心，好有禮貌。」
一日三餐連繫不同關係
對Hilda這位「女煮人」來說，一日三餐代表連繫不同關係：早餐是與老公拍拖的時間，每日出街食不同早餐，午餐及下午茶與朋友、同事或學生一齊享受，晚餐則是familytime，一家三口在飯桌上無所不談。「其實都係平衡生活嘅一種方法，家人重要，朋友都好重要，食係維繫到所有人。」
為推廣健康飲食及家人同枱食飯的觀念，Hilda創辦了小店並親自挑選引入多款健康食材、零食、乾果小食及廚具，希望令更多家庭享受下廚樂和同枱食飯。不過，Hilda不會要求阿Bu做她的接班人，繼承小店做大廚，她希望阿Bu能發掘自己興趣，走出自己的道路。「佢個人好搞笑幽默，又鍾意魔術，可能佢將來做棟篤笑、做小丑都唔定，佢做乜嘢我哋真係無所謂，總之佢搵到興趣同夢想，我哋陪伴佢發展，希望佢堅持落去。」聽到媽咪一番肺腑之言，阿Bu就話：「我想做一個chef，但有刀我會喊，好熱我會走開，媽咪繼續煮，我會食嘢嘅。」即係想做食家啦，爸爸媽媽一定會陪佢食呢！
小朋友食譜分享
蛋白蘋果塔
材料：
蛋白 2個
糖粉 50克
現成果塔皮 8個
餡料：
蘋果 ½個（約80克，洗淨，去核）
糖 ½湯匙
檸檬汁 1茶匙
肉桂粉 ⅛茶匙
提子乾 1湯匙
檸檬絲 少許
做法：
1）準備餡料：小煲內下蘋果、糖和檸檬汁，以中火拌煮至糖溶，加入肉桂粉、提子乾和檸檬絲拌勻，盛起。
2）大碗內放入蛋白，用電動打蛋器打至起泡，加入一半糖粉，攪拌至形成白色泡沫，再加入餘下糖粉，繼續攪拌至企身成蛋白霜，放入唧袋內。
3）現成果塔皮放入已預熱焗爐內烘1分鐘，取出，放上餡料，唧上蛋白霜。
4）放入已預熱至180℃焗爐內焗3-4分鐘至金黃，完成。
貼士：此款迷你蘋果塔餡料偏酸，能中和味道偏甜的蛋白霜。
薯蓉漢堡
材料：
素肉碎 80克
青甜椒、紅甜椒 共35克（去籽，切粒）
蒜茸 1/2茶匙
番茄 20克（去籽，切粒）
薯蓉 100克
大啡菇 1個
英式鬆餅 1個
生菜 適量
做法 :
1）鑊內下油加熱，下素肉碎、青甜椒、紅甜椒和蒜茸，以中火炒香至熟，盛起。
2）加入薯蓉拌勻，塑成漢堡狀。
3）鑊內下油加熱，下薯蓉漢堡煎至兩面金黃，盛起；鑊內下油加熱，下大啡菇，以中火煎熟，盛起。
4）英式鬆餅對半切開，放鑊內烘熱，夾上薯蓉漢堡、生菜和大啡菇，完成。
下一頁：滋潤止咳海底椰粟米湯
下一頁：健脾利水 木瓜生魚花生湯
