馬詩慧難捨仔大女大 想阿仔黐住我
大女出櫃欣然接受
父母是娛圈名人，Kayla是受矚目星二代，言行舉止都會被大肆報道，去年Kayla被影到與外籍同性友人過從甚密，其後大方宣布出櫃，背後得到家人支持。子女同性戀，很多家長都不知如何處理，甚至迫子女由攣變直，令子女感到難受，把一切埋藏心底裏，Janet直言自己都經歷過掙扎期。「佢中學時候我開始懷疑，有段時間我覺得佢經常講大話，直至有一次，佢俾咗少少暗示我，當時我唔係好接受，唔接受之餘仲想自己呃自己，可能因為讀女校，係暫時感覺啫，遲啲會變㗎喇，我嘗試說服佢唔係呢樣嘢，亦說服自己希望唔係呢樣嘢，因為我都識好多人以前係，大大吓變番唔係。」
反而Michael得悉後反應平靜，可能外國長大思想開放，覺得沒大問題，Janet回想當時丈夫沒安慰過她，「好似真係冇喎， 點解佢冇呢？不過呢樣嘢係好難安慰人哋嘅，要靠自己釋放同接受，如果接受唔到，點安慰都冇用。」有一段時間，Kayla沒直接承認，Janet又心存希望，母女關係總有一層隔膜，惟有多溝通去摸索對方，「同佢講道理囉，係講㗎咋，我唔會打人嘅，當然有時我會大聲咗或者佢激動咗，一定會有。」直至Kayla過美國讀書後，有一年返港放暑假，在家與當地女性朋友以Skype通話，語氣比一般朋友親暱，Janet聽後即捉實女兒問話，「嗰一刻佢真係承認咗。」
女兒勇於承認，媽媽都決定一齊面對，「當我接納咗，我就決定let go，唔會再糾纏，我只希望佢搵到自己鍾意嘅人，而嗰個人又錫佢，大家喺埋一齊好開心，咁就已經足夠。」
二女闖紐約做Model
Kayla性格開放、有主見、有理想，亦有一顆善心，畢業後開始籌備時裝網店生意，加入了公平貿易（Fair Trade ）元素，所找的廠房一定要計足加班錢、不能用童工、要公平對待工人等等，希望透過網店宣揚人權、公平及環保等問題，成本較高也在所不計。Janet對此感到非常驕傲，「Kayla睇錢唔重，幫到人先係最重要，令呢個世界公平一點，我個女識咁諗我覺得好感恩。」
至於二女Irisa正在美國波士頓讀大學，Janet打算讓她停學一年，赴紐約發展模特兒事業。「畢業後22、23歲先開始太遲喇，所以要停學一年試咗先，依家啲model 15、16歲就開始，中國人好少少，無咁易變老；鬼妹開花好燦爛，但好快就謝。Irisa都覺得自己遲咗，但我覺得都唔係遲嘅，早幾年我哋又唔會俾佢唔讀書去做，so this is the right time！」身高有5呎11吋的Irisa遺傳了母親的model潛質，但她身形較豐滿，被Janet斷言難以擔當high fashion model，「佢夠高，但胸部稍大，做high fashion會嫌大少少。不過紐約市場比歐洲大，做泳衣、做Victoria’s Secret就係要呢啲身形。」
細仔有志做演員
雖然香港有父母的名氣帶挈，起步容易得多，但她不打算返港發展，皆因市場細，港人的眼光又是一個問題，Janet解釋：「依家香港有咩show做？全部都好細，同埋如果佢喺香港做泳衣show，你諗吓？香港人、甚至亞洲人個眼光唔同，着少啲布人哋就會將個眼光放喺性感上面，我唔想啲人用呢個眼光睇佢。」
Irisa有機會做馬詩慧第二，細仔Kadin卻可能做王敏德第二。熱愛籃球的Kadin同時愛演戲，希望中學畢業後可以跟家姐赴美讀書，進修演藝課程，「都係受爹哋影響，做戲好好玩，因為有機會扮演其他人。」Michael無時無刻都教仔做戲，教得最多是喊戲，Kadin說：「佢教我喊嗰時好有feel，會叫我諗番啲唔開心嘅事，第一次喊唔出，要慢慢練習，當我想練習就會問佢。」
港華籃球校隊
就讀名校香港華仁書院中三的Kadin年紀尚輕，父母把照顧重心放在他身上，最令Janet煩惱自然是兒子學業方面，她笑言自己比兒子更大壓力，「可能性格問題，佢讀書冇俾好大壓力自己，反而打波輸咗佢會好唔開心，可能佢讀書冇乜興趣，所以唔會擺太多effort落去，你要我合格我咪盡量合格囉，唔合格都冇辦法㗎喇，呢種態度。」Janet不願多提兒子的成績，但相信他是有能力，只是沒心機讀，「佢吸收能力好強，只係唔想專注，如果佢天份唔喺學術上，點迫佢都冇用。」
Kadin的天份在運動上，自小四開始成為校隊籃球代表，先天優勢加上後天打波，Kadin現時身高與爸爸平頭，15歲的他仍有長高空間！他指自細玩BB籃球就愛上這項運動，「細個爸爸買咗個BB籃球返嚟，我同表哥成日玩，嗰陣開始鍾意。籃球係好激烈嘅運動，贏輸要睇你在唔在狀態同能力，最重要係團隊精神，我可以同朋友同隊一齊打波。」港華三支A、B、C grade籃球隊皆身處學界最高D1級，今屆總成績位列第六，成績不俗，Kadin希望之後有機會打進四強，希望盡量贏取更多賽事。
Kadin不單打波叻，打golf都有一手，在爸爸引導下，Kadin開始學打golf，「呢種運動都好玩，但對我嚟講係一個hobby，籃球先係將來想繼續發展。」畢業後，他希望跟家姐到「籃球強國」美國升學，可以繼續專心打波，令球技更進一步，到18歲又跟家姐考車牌，甚至跟阿爸學揸飛機，將來由他帶領一家人四圍去！
家有一個潮媽，仔女當然都好潮，Kayla 開網店做時裝、Irisa 做model，兩個女都好有fashion sense，母女的衣服會輪流着，飾物都會互相分享。近年三人最愛戴「港女至愛」Pandora，最初Michael 為三人送上聖誕禮物，一人一條，至此她們迷上串飾mix andmatch，Janet 喜歡一次過戴多條串鏈，感覺豪邁一點，兩個女則喜歡簡單款幼鏈。今個母親節Kadin 找爸爸夾錢購買Pandora 母親節系列，在訪問當日送上驚喜，嚇了Janet 一跳！
●撰文：Ling ●攝影：Alison Kwan（部分相片由受訪者提供）
●服裝：Electric sekki、Nanushka、Ellery ●首飾：Pandora
●場地：Cafe Siam（tel: 2851 4803）
