【對付老公好方法！】林盛斌賴床 老婆出招即彈起身

撰文：Kammy｜圖片來源：Instagram

林盛斌賴床 老婆出招即彈起身

藝人林盛斌（Bob）同太太黃乙頤（Pearl）育有3女1子，一家六口十分幸福！阿Bob經常都要出去做嘢，瞓覺對佢嚟講簡直係奢侈。呢日阿Bob就瞓到唔願起身，太太Pearl就拉埋班仔女出絕招整醒阿Bob，搞到阿Bob即刻好乖咁彈起身添！

究竟係咩Pearl出咗咩招呢？就係同班仔女搶晒阿Bob啲被、枕頭同攬枕，阿Bob見到就逼於無奈要起身。Pearl就留言話：「呢個爸爸咁晏都未起身同小朋友玩所以媽咪決定出絕招💪🏼💪🏼攞晒佢床上面嘅嘢等佢冇得留低」

阿Bob對於畀老婆同班仔女咁對待，佢喺網上以「變態」嚟形容佢哋。不過，一眾網民就認為，阿Bob老婆用心良苦，仲大讚Pearl呢一招好勁，話以後都咁對付自己啲老公！

阿Bob起身之後做咩呢？就係同班仔女一齊打機，場面十分溫馨！

陳敏之同林盛斌對親家

呢日，阿Bob一家同陳敏之一家一齊打邊爐，期間敏之囝囝子樂被安排同阿Bob三女機機坐，點知敏之突然話：「子樂好似睇中咗機機咁」，阿Bob仲叫佢哋兩對望，子樂隨即大放電眼！

子樂望完一次都唔夠，仲主動咁去望多機機一次，成班大人即時起哄，不斷「Wow！」呢個時候，呢兩位小朋友見到大人嘅目光，好似顯到有啲不知所措，怕醜嘅機機就偷笑，繼續低頭食嘢。

林盛斌：要三千萬禮金！

面對自己愛女畀人睇中，阿Bob更公開提出禮金要求：「三千萬禮金，兩層貝沙灣唔少過千五尺嘅」等，而敏之亦即時回應：「我點會出手咁低呀！閒閒地我都要機機做千億新抱啦！」

阿Bob嫂Pearl就話鍾意子樂活潑主動，仲已經得做，千億外母，睇嚟玩得最開心都係班大人！