黃長興 中英法三語教女

囡囡八個月時不肯跟他，傷透他的心，決意調配好工作修補關係，更三語齊下加強溝通，尤其是他的母語中文及法文，每晚臨瞓必講bisou（錫錫）及faire dodo（睡覺），囡囡已開始識聽，對她說bravo（恭喜、好嘢）都識拍手掌！

阿女唔肯黐爸爸

去年囡囡剛剖腹出世時，Stefan見到她的手腳及五官齊整，皮膚又白又滑時，激動得差點流下男兒淚。頭三個月他有落手落腳湊，餵奶換片做到足，但三個月後開始忙拍劇及餐廳生意，錯過了不少父女溫馨時光，到囡囡八個月大開始認人，他醒覺要多放時間在女兒身上。「當時佢完全ignore我，唔肯跟我，.陣我好擔心，死喇我一定要多.返屋企陪佢，如果唔係佢就唔黐我。睇番呢一年我係冇真真正正湊女，我錯過咗佢第一次食粥仔，換片亦好耐冇換，但掉番轉我都開心佢黐媽咪，係好應該嘅。」

Stefan出招對囡囡又玩又氹，在囡囡睡覺前盡快返家，開始扭轉局面，囡囡終於肯讓他抱，令他放下心頭大石。工作與家庭之間，必須平衡得好。

聽自己留言學廣東話

不經不覺，Stefan已入行十年， 餐廳生意愈做愈大，正計劃開分店，不過演藝事業未有突破，第二個十年他不求上位做主角，但希望能多做有發揮的角色。「以前我覺得拍劇梗係最好做主角啦，依家就無諗要做主角，希望先嘗試多元化角色，做好人、做奸人都好，最緊要有得發揮。我覺得自己應該擺多啲心機喺演藝方面，因為我唔喺香港長大，有時老婆叫我睇番自己啲戲，點解做成咁嘅？佢對我係最中肯，初初我都唔係咁接受，但發覺有時唔單止拍得唔好，自己都準備不足，無論拍乜嘢都應該做足功課，人哋先會睇得出我嘅努力。」
為了在港生活及工作，他最堅持一定是學好廣東話，唔識講到識，十年間進步神速，他覺得仍未夠好，「自己聽番仲有啲口音，有時用WhatsApp、微信send voice message，自己可以聽番自己講嘢，有時覺得自己講嘢好奇怪，原來某個字講得唔正喎，我要留意番。」

法國英語程度淺

已紮根香港的Stefan不打算返回法國，希望囡囡在港成長，與爸爸一齊學好廣東話，「我同佢講法文同中文，老婆就講中英文。」講得法文多，囡囡開始識聽簡單詞語，「好似bisou錫錫、bravo拍手掌好嘢、faire dodo瞓覺、au revoir拜拜，仲有問吓佢c’est qui邊個嚟架？佢都識俾反應。」
法國人一向對自己語言好驕傲，不太接受英文，令法國整體英語水平差，但Stefan自小對英語有興趣，一直用功學習。隨.時代轉變，法國人都開始跟隨潮流，不能再固步自封。「以前法國人覺得法文比英文重要，中學英文堂只係一星期兩小時，程度又淺，咁點會學好英文呢？不過聽朋友講依家日日都有堂喇。」去旅行與法國人講英文，多數耍手擰頭轉身走，但今時不同往日，「佢rd 7一向覺得國家同法文都好powerful，絕對唔會輸俾英文，但事實英文係八達通，所以依家你去法國問一句excuse me，以前會話no English，依家即刻yes！」

絕不回流法國讀書

Stefan約五歲就移民法國讀書，他指當地教育簡單，升學政策是就近入學，邊間學校近就讀邊間，公立學校由幼稚園到大學都是免費，Stefan與弟弟長發皆出身於公立學校。法國教育福利好，校風自由，學生讀書毫無壓力，卻不懂珍惜讀書機會，所以他絕不會送囡囡返法國讀書，「讀書唔使交學費，所以學生唔志在讀書，我唔想佢太free。」

想當年讀書無拘無束，兩兄弟間中瞞着父母逃學打波，又「抄考」同學功課，「唔鍾意啲課程，有時會逃學做運動、打乒乓波，功課就交齊嘅，借朋友啲功課參考吓、改寫吓。」他不想囡囡步他後塵，但他不熟悉香港教育，交由太太Peggy全權負責，現正處於選擇本地或國際學校的交叉點，她說：「我哋偏向local，想佢學好中文同紀律好啲，國際學校好free，我自己都係讀國際學校，曳起上嚟真係好曳，學得好壞，但讀local我哋驚應付唔嚟，我哋兩個唔識教功課，所以好矛盾。」

長發八月做老襯

Stefan與Peggy正計劃生第二胎，坦言希望追仔湊個「好」字，待囡囡兩、三歲較獨立後，就會開始努力，「如果下一胎係仔就收工喇，如果係女，我哋唔介意再追多個，生三個都OK。」Stefan喜歡大家庭，自己都是四兄妹，他排第二，與大哥差四年，與弟弟長發差六年，還有一個細妹差十二年，「細妹出世我都有幫手餵奶換片，有時望番細妹細個個樣，同囡囡都似似哋呀！」至於大哥生了三個，加上自己個女，四個小朋友可以一齊玩。而長發眼見兩位哥哥有幸福家庭，已計劃今年八月迎娶捷克籍女友，在女友家鄉布拉格行婚禮，希望盡快組織家庭，Stefan說：「外國人思想係想早生BB，唔同亞洲人，所以法國人都係廿歲左右生仔，我相信佢都會婚後生小朋友。」

想囡囡做律師

對於囡囡的將來，Stefan目光頗遠大，希望囡囡做律師，「大律師、事務律師都得，講嘢有紋有路，我覺得囡囡性格都幾有權力，呢類型嘅工作幾啱佢，又可以貢獻社會。」好多工作例如醫生都有貢獻㗎？「醫生都好，不過好難，要栽培吓先得。」

他覺得如果父母對子女的將來有期望，不能太放手任他們自由發展，可以嘗試從旁引導，「如果當初我父母知道我要做咩工作，可能會push我去行嗰條路，有機會去做嗰份工作；如果由得仔女發揮，讀書揀科都唔知點，所以如果父母想仔女做醫生，可以引導一條路。」或者最後發現囡囡遺傳了爸爸的演藝天份，Stefan都不會反對入行，「只要佢係有talent，阿爸一定會支持佢。」

撰文：Ling
攝影：Paul Choi（部分相片由受訪者提供）