黎諾懿張達倫爭新抱 小春雞搶先密會包包
撰文：Sunday Kiss
圖片來源：lokyilai@Instagram，新傳媒資料庫
當小春雞遇上包包
黎諾懿同馬家一齊遠赴韓國拍攝聖誕特輯，因此要用視像電話先見到囝囝一面。日前，佢就分享咗一條囝囝「小春雞」同徐榮囡囡「包包」玩視像電話嘅片段，「小春雞」搶先「勁秋雞」一步認識「包包」，睇嚟呢場「新抱仔爭霸戰」已經正式展開！
可愛嘅「包包」對住鏡頭做出各種趣怪表情，氹得「小春雞」好開心，仲邊食手指邊笑得好冧豬。照咁睇嚟「小春雞」好鍾意「包包」，但唔知「包包」又覺得「小春雞」如何呢？呢場「搶包」大戰會由邊家人勝出？
網民除咗大讚「小春雞」嘅笑聲非常治癒，仲開始幫呢對小情侶改唔同嘅組合名，例如「春雞包」、「雞包仔」等等。
兩個月一索得男 快過黎諾懿
被好兄弟黎諾懿拍片「挑機」催生仔的達倫，與好兄弟同樣一索得男，更快過諾懿造人半年，他的囝囝叫「小春雞」，自己個仔秋天出世，可以叫「大秋雞」！「佢都好開心嘅，仲話我咁快搞得掂，大家個BB同年。」兩人已計劃將來帶兩個仔一齊出去玩，互相照應，彼此的友誼延伸到下一代。「兩家人會有好多gathering，我老婆同諾懿老婆Nicole都好friend，所以一齊出嚟肯定好開心，大家交換湊仔經！」成為新手爸爸兩個月的諾懿提醒達倫，現要盡量爭取時間睡眠，BB出世後就無覺好瞓了。「佢講到好驚咁，搞到我依家真係有得瞓好瞓。」
張達倫同囝囝「勁秋雞」
爭取「包包」做新抱仔
《愛．回家》一班演員像家人般親密，達倫、諾懿與同劇的徐榮最老友，閒時一齊踢波，連徐榮外母都很熟稔，屋企食飯都叫埋達倫一齊，現在三個男人圍埋就傾湊仔經。「我哋三個好投緣，真係兄弟咩都講，唔會留有餘地，大家心照。我同阿榮又住得近，成日踢波，有時佢會叫埋我上佢屋企食飯，佢哋屋企gathering落樓下酒樓食飯，佢外母都會叫埋我。」徐榮的可愛囡囡徐心怡（包包）都有客串過《愛．回家》，氹得成班演員好歡喜，達倫和諾懿打趣謂，「大秋雞」要和「小春雞」爭包包做新抱仔，上映「春秋之爭」！達倫笑說：「佢真係好得意，對眼好似識講嘢，你望住佢就覺得好冧，佢一笑直情軟晒。」
小春雞學玩「十五二十」
有仔萬事足的 黎諾懿 ，日前又分享囝囝小春雞的圖片。相中小春雞眼仔碌碌，雙手緊握拳頭，超級可愛！爸爸黎諾懿 笑指囝囝很快就懂跟自己玩十五二十，網民紛紛留言嗌佢唔好教壞囝囝！
不過，小春雞媽媽李潔瑩就話囝囝病咗，非常心痛，難怪小春雞好似冇咩精神咁啦！希望小春雞早日康復，繼續精精靈靈同大家見面啦！
小春雞2個月大，影埋證件相，係咪好精神呢？
爸爸媽媽幾乎每日都分囝囝的萌照。
到底小春雞似爸爸定似媽媽呢？
連睡覺都笑，唔知係咪發夢見到包包呢？
