龐維新太太 龐董晶怡 拒女兒患公主病
自育有兩女之後，Helena對教育產生濃厚興趣，加上奶奶、前保良局主席龐盧淑燕的啟發，她前年創辦幼稚園，全家鼎力參與，連兩個女都幫手教學，暗示將來有機會接棒，把龐氏的教育理念傳承下去。
大女要求高 細女男仔頭
龐維新有一個孿生弟弟、金牌大風老闆龐維仁，父親是「皮革大王」龐國本，母親是前保良局主席龐盧淑燕，兩兄弟共育有四千金，一家人常被影到high tea共享天倫。龐維新與太太Helena十多年前結婚，育有12歲及10歲的女兒Nicole與Natalie，已開始步入青春期，Helena笑稱，兩個女的性格大不同，「家姐依家讀中一，當佢三四年班開始，佢漸漸對自己要求高，無論讀書或做嘢，佢都有自己責任感；阿妹就比較男仔頭，好鍾意數學、科學、電腦嗰啲，不過佢可能係細女，性格仲係BB啲，好小朋友需要呵護。」
兩個女的起步順利，但Helena不想女兒嬌生慣養，決定自己先行第一步做好身教，「佢哋由細到大我都有諗呢個問題，擔心佢哋有公主病，雖然公主病唔一定關有冇錢事，有冇錢都要教好道德觀，無論喺邊個處境、邊個位置，你都要humble（謙遜），呢方面學校都教得非常好，中小學都有教，呢個都係我哋最鍾意呢間學校嘅地方。」
St. Paul’s Co-ed 社會縮影
Nicole與Natalie正就讀名校聖保羅男女中學及其附屬小學（St. Paul’s Co-ed），外界都覺得該校是貴族學校，只有達官貴人子女才能進入，學生比成績比家底，學校又催谷小朋友要周身刀張張利，Helena為學校平反，指該校致力培養道德價值觀，校內亦有很多平民學生，彼此相處融洽。「比較喺呢個世界當然有，但學生喺讀書上係良性競爭，唔會因為你高分過我就唔開心，學校好鼓勵學生同自己比較，自己要不斷進步，好過成日同隔籬比較。」
Helena亦不覺得 St. Paul’s Co-ed是貴族學校，形容為一個「社會縮影」比較貼切，「當然都有富裕嘅，亦有中產、家境冇咁好嘅人，我聽我小朋友講番其他同學嘅情況，例如住邊度，咁我知道大約邊個階層，但我見佢哋玩得好融洽，完全無歧視其他階層，無聽過佢哋用家庭背景來界定同學，反而佢哋會admire（讚賞）讀書好叻嘅同學。」
聖保羅男女中學及其附屬小學階段不應催谷
St. Paul’s Co-ed重視一生一體藝，Nicole和Natalie熱愛打羽毛球，Nicole又喜歡彈琴，Natalie就學科學、電腦，學術上亦固然重視，但Helena覺得最重要是讓小朋友全人發展，學術並非首重。「我同我先生覺得幼稚園至小學階段，重點係建立小朋友性格、道德觀、價值觀，打好基礎，到中學、大學就真係讀書嘅時候。」就讀名校，學術上總有一定壓力，她覺得有壓力與否，視乎家人的要求。「我哋冇乜俾壓力，補習點都有少少，但只係補充性、學校support冇咁多嘅嘢。」
兩夫婦這個看法亦得到家族支持，最重要是合力培養小朋友全人發展，「除咗讀書之外，做人仲要有關愛、有自信、有組織力，對所有嘢充滿熱誠、熱心學習，咁先係最重要。」
投入女兒的朋友圈
自兩女出世後，Helena對教育愈來愈有興趣，並為此進修增值，「我睇好多育兒書，了解小朋友唔同階段嘅相處方法，我最近都上咗個同青少年相處嘅課程。」大女升讀中一，進入青少年反叛期，Helena在湊女上正面對新挑戰，「青少年會面對發育問題，我個女又讀男女校，我喺課程中學到好多嘢，例如青少年點解鍾意同朋友一齊多啲，而冇咁聽屋企人話呢，其中喺腦潛能課堂有得着，因為原始人喺十幾歲就離開屋企去建立族裔，族裔就係佢嘅朋友，所以點解呢個階段咁受朋友影響，係由原始人開始train到我哋腦部發展係咁，十幾歲要離開屋企，去搵自己嘅群組喇。」
明白這是一個自古以來的發展，她學識要體諒小朋友，幸好大女並不算反叛，全靠一直以來緊密溝通，「我好俾心機聽佢講嘢，家長係好重要嘅聆聽者，你第一、第二日唔聽，第三日佢就唔再同你講㗎喇。」她又好投入女兒的世界，甚至八卦她們同學間的感情生活，「點呀，個男仔係咪仲鍾意個女仔呀？佢覺得我好清楚佢朋友。好多家長都錯過咗好多，令仔女覺得『我講你都唔知邊個啦！』就係因為你之前冇聽，佢都冇興趣同你講。」
創辦幼稚園 全家參與
龐家一直參與保良局、仁愛堂等慈善機構的教育工作，尤其龐老太龐盧淑燕在幼兒教育出心出力，Helena都有從旁協助，並出任學校的校監校董，加上自己慢慢建立的教育觀，遂萌起創辦幼稚園的想法。直到2014年，Helena創辦了蔚思幼稚園暨幼兒園，希望以年輕家長的角度出發，「我係好貼近新一代家長嘅諗法，我啲小朋友都唔係咁大個，都經過咗搵幼稚園、小學嘅階段，仍然安排緊佢哋將來讀書嘅路，當中我都有唔少壓力，所以我喺呢間學校所做嘅決定、課程設計上，都以媽媽角度去諗。」
龐老太是人生導師
龐老太辦過多間幼稚園，今次都有給予新抱好多意見，Helena說：「雖然奶奶係多年前辦幼稚園，模式都有少少唔同，但喺管理、教學心得都俾到好多意見。我奶奶基本上係我人生mentor（導師），佢好叻㗎，學校以外嘅嘢都教咗我好多。」Helena早婚嫁入龐家十多年，一直以奶奶為榜樣，「我今時今日會做嘅嘢，好多都喺佢身上學習番嚟，例如我遇到不公平對待，以前我會唔出聲，但我喺奶奶身上發現到，當道理喺自己度就應該爭取。」
除了奶奶的經驗之談，丈夫龐維新是她最大的精神支柱，每天做她最佳的聆聽者，「我哋多嘢講到講唔切呀，太多嘢想同佢報告、問佢意見。」她最驚喜是兩個女都有興趣，當幼稚園是她們生活的一部分，「佢哋一放假就嚟，當自己係老師入班房幫手，老師們都同佢哋好熟，我好surprise佢哋咁鍾意小朋友。」看來Nicole和Natalie有機會接嫲嫲和媽媽的教育棒，作育英才，Helena說：「我都有講笑話第日你哋大個之後，呢間幼稚園留俾你哋做喇，佢哋都唔抗拒喎。但我唔想俾壓力佢哋，一定要佢哋讀education，留番個空間俾佢哋將來發揮。」
面試貼士
蔚思幼稚園現正招收2016至17年度新生，身為校監的龐董晶怡都有一些面試貼士給家長參考，「我哋係小組面試，最緊要小朋友入到嚟鍾意間學校，小朋友都有感覺，有家長講番去咗好多間學校都喊，嚟到呢度唔喊，咁家長都知搵啱地方。小朋友鍾意間學校，覺得環境舒服、覺得我哋親切唔驚，對我哋教佢好有幫助。」所以面試老師會觀察小朋友是否喜歡學校、玩得開心投入，就是這麼簡單！
想知更多有關學校課程的介紹，去片聽聽龐董晶怡的介紹。
蔚思幼稚園
SOPHIE KINDERGARTEN
學券：沒有
全年學費：$62,150 （分11期）
