90後以舞會老友記
甚麼是椅子舞？
英國引入的音樂運動，針對長者而設計，舞步由專家設計，訓練四肢協調、握力、平衡力和肌力，讓長者安全地進行適量運動，腦退化症患者、失去部分活動能力、體弱長者均適合。整套舞蹈大約四十五分鐘到一小時，輕快簡易的舞蹈配合懷舊音樂，由導師帶領長者一起跳舞。
義工三人組跟公公婆婆擺出有型有款的舞蹈動作。
港孩關注人口老化
有人將「九十後」定義為「港孩一族」，皆因他們大多自小被父母寵愛，甚至由工人姐姐湊大，從未吃過苦，更有指他們自我中心強，不理世事。同是九十後的William、Lily和Wincy為年輕人大平反，他們身體力行關心社會，從事義工，近日更極度關注長者問題。三人都是IVE大專生，參與義工活動，讓他們學會放下自己，尊重長者。當中，以William的義工資歷最深，他立志做社工，為長者服務。「我做過上門服務義工，探訪獨居老人，佢哋真係好似同社會斷晒、被孤立，難聽啲講句，喺度等死。點解曾經為社會努力、貢獻嘅老人家會有咁嘅下場？其實，好多長者六十五歲依然有心有力，係社會要佢哋退休，令佢哋覺得自己變成包袱，唔係佢哋錯，而係社會有問題。呢個根本問題要由政府實施政策解決，我依家仲係學生，能力有限，不過，會盡力用自己方法關心長者。」在旁的Lily與Wincy深感認同。
重新認識長者
Wincy與Lily跟長者相處的機會不多，過去標籤了長者的形象是「老餅」、體弱的，不太主動接觸他們。Wincy直言：「屋企老人家講鄉下話，同佢哋溝通唔到，而之前細個真係會掛住讀書，以自己感受行先，不太主動跟老人家溝通。但當做義工時，更多機會接觸長者，會發現好多唔同睇法。」Lily也說：「之前做義工跟一班長者行太平山山頂，當時第一次真正接觸長者，本來擔心老人家無體力行山，要扶佢哋，又估要用更長時間完成路程，點知佢哋好精靈、好有活力，反過來提醒我哋年輕義工要飲水、應該點行。」訪問當天，她們跟William參加了尊賢會舉行的「耆舞派對」活動，加深認識長者。他們來到護老院與一眾長者練習跳椅子舞，性質跟送物資、派餅乾、問候長者不一樣，而是跟老友記玩樂，一起做運動跳舞，開心過一個下午。
長者的形象不一定「老餅」，他們也很貪玩，與小丑打成一片。
直擊探訪護老院
沙田一護老院熱鬧非常，十多名年輕人包括William、Lily與Wincy，與廿多名圍圈而坐長者共舞。三人笑言當初知道要跳「椅子舞」， 均不約而同想起sexy dance椅子舞，難以想像如何跟長者扭動身體熱跳性感舞。事實當然並非如此，此舞豈同彼舞呢。筆者直擊練習椅子舞的實況，看到長者們安坐椅子毋須過分操勞，配合音樂節奏展開雙臂、動動手、踢踢腳，時而高舉雙手，時而向左向右扭，投入程度不輸年輕人。
背景音樂響起陳寶珠《女殺手》：女殺手，女殺手，天生一副好身手，智勇雙全膽又壯，生平嫉惡更如仇……大家配合歌詞，雙手交疊擺起殺手架式，神氣十足。男女老少都十分開心，緊接播放許冠傑《半斤八兩》：半斤八兩，做到隻積咁嘅樣，半斤八兩，濕水炮仗點會響……氣氛更高漲，大家拿起七彩啦啦球揮舞，左手轉個圈，右手轉個圈，雙腳踏步，最後結束更一起拋起彩球。還有多首跨年代、耳熟能詳的歌曲，例如林子祥《狂歡》、薛家燕《皆大歡喜》、Twins《愛情當入樽》、謝霆鋒《活著viva 》等等。在「唏呀唏呀唏」快樂歌聲中，青年義工與長者都非常投入，開心大玩，與一般探訪長者的義工活動大不同。
充滿活力的婆婆穿上漂亮長裙大跳椅子舞，笑容滿面。
投入用心享受其中
跟長者互動中，William表現出色，看他不時擠眉弄眼做出趣怪表情，逗得長者呵呵笑，又周圍走，此刻跟長者拉拉手，下一秒就跳到長者面前，讓長者看他示範與表演。他毫不謙虛地說：「我天生有股魅力，小朋友老人家都鍾意我，我唔怕自嘲講爛gag，跳舞時會鼓勵老友記，同佢哋講：『你睇我跳得咁肉酸、咁肥都跳到』，佢哋會笑得好開心。」
讀社工的他更分享年輕人跟老人家相處之道。「年輕人講嘢有時一嚿嚿，同老人家講嘢要大聲少少、咬字清晰，唔好中英夾雜，有時聽唔明長者說話唔緊要，可以點頭、微笑，最緊要係投入，唔好覺得做義工係交差。」在旁的Wincy表示自己沒有跳舞底子，擔任導師未必十分稱職，但她深明跳得好、跳得齊不是重點，而是大家開開心心郁動下。看她做義工時，全程都掛着甜美笑容，又會彎下身子拉着婆婆的手，投入程度爆燈。
小分享大感動
朝着幼兒教育為目標的Lily就施展細心迷倒長者，她笑言自己跳足全程感吃力，但看見長者掛着滿足的笑容、期待的眼神，就不覺辛苦。她分享一個感動位：「其中一個動作是跟兩邊長者手拉手，第一次拉手時，坐輪椅伯伯跟我說佢嘅手冇用，抬唔高，我就轉而搭佢膊頭；到第二次拉手時，我就掂佢手；到第三次拉手時，伯伯努力咁輕輕舉手，示意俾我拖佢，嗰刻好感動。」雖然不是所有長者都充滿活力，可以跟年輕人打成一片，但他們都很期望年輕人來探訪。Wincy覺得他們只需出少少力，就可以讓長者樂足半天，十分划算，她期望日後花更多時間做義工，多關心長者，從中有得着。
後記：殊途同歸
三位年輕人各有自己的夢，William表示家人 反對他讀社工，曾冷言冷語表示，社工搵唔到食，何不做高薪厚職的「專業人士」？但他依然堅持夢想。Lily喜歡與人交流，相較對幼兒教育感興趣，希望以身作則教育小朋友，包括教育敬老重道，而Wincy則寄望開放自己的心，花更多時間做義工，服務長者。雖然他們仨的夢想不一樣，但最終都是抱着關心社會、關心長者的角度出發。
鬼馬的William 是個開心果，他志願是做社工，為長者服務。
尊賢會
為長者服務的本地社企，致力提供長者社區及居家照顧服務，包括於本地社福機構、私營安老院及社區長者中心推動認知訓練活動，讓長者在趣味豐富的運動中享受社交樂趣，而尊賢會於3月29日舉行由英皇慈善基金冠名贊助的「耆舞派對2015 」 。
●撰文：Esther Ngan ●攝影：Paul Choi（部分相片由受訪者提供）
●鳴謝︰尊賢會、劍橋護老院
