Mr.鼓手 Tom x 陽光妹Leanne 囝囝：想做超人歌手！

●撰文：Ling
●攝影：Simpson Chiu（部分相片由受訪者提供）
●場地：節奏生活（tel: 5544 9447）

年輕父母 頭半年最辛苦

Tom 與Leanne是年輕父母，五年前未婚懷孕，Tom 當年僅25歲，Leanne更是90後只得22歲，兩人的事業只在起步階段。面對突如其來的小朋友，兩人馬上註冊並當起新手父母，Leanne坦言當時自己非常年輕，經驗不足，最困難是BB出世頭半年的階段。「我哋都好後生，好多嘢都唔識，要邊湊邊學，不過我相信好多人都係學做父母階段最難。BB出世頭半年我係好辛苦，我連同佢沖涼都唔敢，好驚會整親佢，要Tom幫佢沖，好多情況發生我都唔識處理，要睇好多書學習，同埋問我媽咪、奶奶，過咗半年就好好多喇。」

媽媽從懷孕到BB初生階段，情緒會變得波動，好需要丈夫的支持，升為人父的Tom亦變得成熟起來，分擔了許多湊仔的責任，沖涼、換片不假手於人。五年過去，三口子一路走來順順利利，更因杜杜的出現令家庭變得歡樂，兩人工作亦更有動力。

90後文青媽媽

身為90後媽咪的Leanne，懷孕之時正值模特兒及演藝事業的起步，更是最新一代「陽光妹」，學生妹形象又pure又true，備受注目，但兩年後就由「學生」變成新手媽媽，為了囝囝要暫緩工作。Leanne回想不覺得可惜，反而覺得感恩，在自己感到迷惘的時期，Tom 和杜杜走進自己的人生，而且父母也是21歲結婚生了自己，之後還有三個妹妹，Leanne與最細妹妹相差16年，一直以來都在湊小朋友。「依家我三個妹都係21歲、14歲同11歲，其實我湊最細兩個妹都似湊女，甚至有人以為我個妹真係我個女。所以一直以來我都接觸好多小朋友嘢，令我都想快啲組織家庭，喺追求家庭同事業方面，我企咗喺分叉路口，呢個時候Tom同杜杜就嚟咗，令我搵到自己嘅路。

Leanne暫停工作一段時間湊BB，之後再尋找興趣發展新事業，走到台灣讀園藝治療及學壓花手作，回港後創辦手作市集，慢慢變成「文青媽媽」。「做到自己開心又幫到人嘅工作，個成功感好大，雖然幕前工作我少做咗，但keep住都有導演同客戶搵我，所以依家好享受各樣工作同家庭生活。」

囝囝學音樂無耐性

兩人都是在職父母，Leanne搞手作市集及相關活動，Tom則打理小店的生意及推廣音樂工作，平日將杜杜交由婆婆照顧較多，但一家三口與婆婆家僅幾步之遙，晚上就會接杜杜返家。

兩人表明沒有特別的湊仔之道，最重要是願意投放時間照顧。Leanne慶幸杜杜是個易湊的小朋友，性格溫馴乖巧，「佢唔會亂發脾氣，好識顧及人感受，亦好識睇人面色，依家好多小朋友都係咁，識睇父母情緒，見到你嬲嬲哋會收斂啲。」

Tom眼見杜杜漸漸長大，現投放更多在工作上，引來杜杜投訴，Tom想出一石二鳥的方法，多帶杜杜去自己的小店玩音樂享天倫，亦可薰陶他對音樂的興趣，但他坦言，未覺得囝囝有遺傳音樂天份。「佢個人好心急，我教佢一陣就話要自己嚟，好似教佢打鼓又話自己打，小朋友學嘢應該要聽教。不過佢學其他嘢就有耐性，例如學畫畫呢啲靜態少少，佢學咗年幾好鍾意；相反學樂器有正確手勢，佢就冇咁好耐性學，只係想用自己方法玩。」Tom相信杜杜似媽媽喜歡畫畫、手作方面，反而不似自己。

想做歌手大唱超人歌

講到杜杜的最愛，畫畫是其次，超人才是他的最愛！杜杜話全部超人都好鍾意，因為個個超人都好勁！杜杜認識好多超人歌，最鍾意唱上世紀70年代，由林嘉華主唱的〈超人七星俠〉，首歌仲老過爸爸媽媽，他竟然背熟所有歌詞，訪問當日霸氣大唱「維護正義，真理必勝！」所有超人歌無論任何時代，在杜杜眼中都是最in，包括陳奕迅主唱的〈超人迪加〉！

Tom的 Mr. 主音隊友Alan去年亦誕下兒子Adam，剛滿一歲大。被問到杜杜與Adam會否繼承爸爸組「 Mr. Junior」，杜杜二話不說搶答：「梗係會啦！我想做歌手！」不過杜杜與Adam年齡有段距離，杜杜與朱薰和譚健榮（ Mr. 隊員Dash的孖生弟弟）的4歲兒子之仔比較friend。Tom話杜杜為人好熱情，尤其是對BB，一見到BB就想爭抱，對Adam如此，對朱薰的細女妹之亦如是，「佢一見到BB就衝埋去，試過熱情得滯嚇親人，我都驚佢會整親啲細粒BB。」

心儀母校馬頭涌官小

5歲的杜杜現正讀九龍靈糧堂幼稚園K2，Tom最感激老師的關懷，甚至替家長擔心沒時間湊小朋友。「老師會定期打電話同WhatsApp我哋，影埋相俾我哋睇佢表現，講番今個學期有咩進步、有咩要注意，好仔細。」老師指杜杜寫字方面要加把勁，所以Tom和Leanne讓杜杜學畫畫，連帶寫字都大有進步，「啲老師好到我哋唔捨得俾佢升小學！」

不過唔捨得都要捨得，小朋友會成長吸收新知識，Tom和Leanne正為他籌備小一事宜，Tom更已鎖定心水學校。「我想揀我母校馬頭涌官立小學（紅磡灣），我讀嗰陣都唔知原來咁好口碑，都係聽番家長意見先知，同埋話爸爸以前讀過易入啲，即管去試下。」

Tom知道官校的功課較多，但功課量不應只睇數目，還要睇深淺程度，他相信杜杜有能力處理到，反而校風才是最重要一環。「學業方面唔使好叻，最緊要校風正面，校園生活融洽，唔會令學生感到孤僻，惹上不良嗜好。」他又讚學校重視體育，培育小朋友有良好體魄，「小朋友要郁多啲，唔好成日坐喺度寫字，第日你坐寫字樓有排你寫。」

囝囝：想爸爸大肚生妹妹

杜杜快將升小一，Tom和Leanne仍未夠30歲，應有心有力湊多個，Leanne的確有生多個的打算，卻遭杜杜反對。「佢話想要妹妹，但唔想我生，唔想我個肚變大，不如叫婆婆或者爸爸生，哈哈！」杜杜好錫媽咪，其實只是怕媽咪懷孕後會出事：「我驚媽咪跌親，爸爸生好啲。」

五年來都未追多個，Tom明言心想，但時間不容許。第一胎在沒有計劃下出世，第二胎他們希望計劃得好一些，確保自己有時間照顧才造人，現階段想先花時間為事業打好根基，讓一家人將來的路比較好走。「我同太太仲後生，仲有好多事情要經營，打好根基，所以呢段時間對我哋嚟講好緊要。有多個當然開心，但應該再冇時間做我哋想做嘅嘢，我哋都要活口同生存，經營一啲嘢係需要時間，好似我舖頭需要時間睇住，與同事磨合，建立團隊精神；太太又要搞市集，佢一搞就唔理所有人，對住部電腦係咁整，所以如果多一個小朋友我哋好難作時間管理。」

時間一點一滴過去，圓滿事業後才回頭追個小朋友，可能已經太遲，「有時見到囝囝都好慘，成日叫我哋陪佢玩，所以佢去到公園或其他場合，一見到小朋友就好主動，有時見到都有啲心噏，我未有多個小朋友陪佢玩，但唔生多個住都係責任心嘅問題，等我哋打好根基之後再打算。」