the pulse 小王子 小公主 聖誕派對

7日在淺水灣the pulse兒童天地peek-a-boo圓滿舉行，吸引近200個小朋友參加。是次比賽特別打造一條長達一百呎的亮燈舞台，12位進入決賽的小模特兒除了行百呎catwalk，更施展混身解數表演才藝， 有唱歌、跳舞、耍功夫，經過一輪比併，最終由區日朗（Jayden）及陳芷澄（Elise）脫穎而出，成為新一代小王子、小公主！賽後更為我們示範一系列聖誕裝，扮靚靚參加party！

小公主視美心妹為榜樣

外表鬼妹仔的Elise有四分一英國血統，性格活潑開朗，充滿自信心，Elise賽後都說得獎好開心，重複多次「估唔到…估唔到！好開心！」媽媽Helen相信輕鬆比賽及笑容贏得評判歡心，登上小公主寶座。「其實我都冇諗過佢會贏，我哋抱住平常心去報名，入到決賽已經好開心，嗰日表現好平均，笑容都好好。」
Elise能夠表演淡定，平日都有練習一下，更有一個非常好的榜
樣——美心妹妹Celine！Helen指女兒好喜歡大一年的Celine，稱她做「美心姐姐」，覺得她又靚又叻，好識擺pose，Elise都有學擺她的招牌pose，Helen說：「Celine記稿好叻，對住鏡頭好淡定，Elise依家都會對住塊鏡練嘟嘴擺pose。」Elise與Celine從未合作，好希望有機會一齊擺pose影相！

Sammi啟發跳舞潛能

比賽中，Elise在才藝表演選擇跳舞，大晒一字馬、坐地舉腳等高難度動作。她兩歲半睇過一次鄭秀文（Sammi）演唱會DVD，即刻瘋狂起舞，媽媽即刻送她學跳Jazz。「佢從來未參加過model比賽，今次係第一次，之前佢只係參加過跳舞比賽，要面對好多觀眾，令佢練得大膽、有自信。」講起偶像，Elise最愛是Sammi的好拍檔劉德華！Helen笑說女兒BB時期已迷戀華仔，「我哋睇戲佢一見到華仔就會尖叫！BB至依家都係咁！」Helen覺得喜歡偶像沒問題，Sammi和華仔都經過一番努力，才有今天成就，「我有解釋佢哋都努力學唱歌、跳舞，你一定要付出先有收穫，不能一步登天。」Elise會繼續小模特兒生涯，以不影響學業為大前提，2015年她將有新廣告推出，喜歡Elise的朋友要留意了。

小王子看中百呎舞台

6歲的小王子Jayden曾演出電視劇、電影、廣告，以及擔任多份報章雜誌的小model。Jayden媽媽Yvonne指，今次參加Chic Kiddie比賽，是被百呎catwalk舞台吸引，「平時行catwalk只係T字型，好短嘅舞台，但今次有一百呎，可以充分展示行catwalk、擺pose嘅潛質，提升佢自信心。」坊間有很多小公主選舉，王子反而好少，今次比賽選出一對王子公主較罕有，亦吸引很多小男孩參與，Yvonne說：「今次有得選王子公平啲，好多比賽只係選女仔，或者男女混合，冠亞季女仔攞晒，始終女仔多靚裙着，set頭化妝扮得靚啲，男仔衫多數西裝，好難突圍而出，今次選一個公主一個王子，好開心佢得到認同。」

想似型男「都敏俊」

Jayden天生有model潛質，視擺pose行catwalk為興趣，行街會停低睇廣告，參考其他model擺pose，回家再照
鏡研究，Yvonne沒刻意培育，一切靠他自我改進。「佢K2開始有行catwalk機會，第一次好怕醜，好多人望住，驚到唔識擺pose，第二次對眼可以望番出來，第三次見佢識發揮擺pose，之後好多人讚佢叻，pose擺得好好，慢慢建立到自信心。」
Jayden還有一位11歲哥哥Andrew，兩兄弟拍住上做小model，互相讚賞及檢討表現。雖然家有兩位小童星，但

Yvonne時刻教導他們切勿虛榮，從不告訴他們合作的藝人是大明星，靠他們自己感受，不會因為別人的名氣才親近。反而因為Yvonne喜歡「都敏俊」，Jayden想學「都min俊xi」般有型，氹媽媽高興呢！

200爭做王子公主

Chic Kiddie 2014@the pulse小王子小公主大賽今年舉辦第一屆，有近200位小朋友參賽，再篩選6男6女共12位進入決賽， 先以時尚便服和王子公主造型行catwalk，之後選出五強，五位小朋友作天才表演，鬥靚鬥叻，最後選出兩位冠軍，現在一齊重溫當日盛況。

●撰文：Ling
●攝影：Clay Lam（部分相片由受訪者提供）