Super Kisstar冠軍 Charlotte 童星新勢力

為比賽認真學跳舞

Charlotte 與6歲半的哥哥Kayden（曾希聞）一齊入選最後十強，在選拔賽節目中一直互相扶持，直到哥哥於第8集被淘汰出局，Charlotte要靠自己繼續比 賽。當日比併跳彈床拍照，兩兄妹有爭執，影響表現，爸爸Gabriel覺得，哥哥出局對兩兄妹是一個難得的體驗，可從失敗中學習。「都預咗哥哥會出局，佢 應該要收斂一下脾氣，呢個係一個好機會俾佢接受失敗，人生冇挫敗係唔會長進。」宣布結果後，Kayden一直攬着媽媽哭個不停，父母想不到兩兄妹對今次比 賽非常認真、投入。 每位參賽者幾乎都有一技之長，Charlotte卻沒有學習十八般武藝，但她參賽後抱着認真態度學習，父母也始料不及，媽媽Erika對跳舞一集印象最深 刻。「佢冇學過跳舞，我事前就叫佢加油喇，其他小朋友都有跳開舞，點知佢真係好專注去YouTube睇跳舞片，係咁睇蘇志威跳舞（比賽地點i Dance，蘇志威為董事及舞蹈總監），所以依家佢一見到蘇志威就係咁嗌蘇志威呀！蘇志威呀！」Erika最欣喜囡囡為了做好自己，好投入做準備，到比賽 時能輕易跟隨導師的舞步，「佢嗰組年紀比較細，複雜舞步跳得冇咁流暢，但見到佢都好專注，好俾心機去學，覺得阿女真係好乖豬。」

投入拍攝 忽然大個女

由 第一日試鏡的怕醜BB，演變成今日的自信妹，《Super Kisstar》整個學習過程，令Charlotte父母好像重新認識女兒，「佢性格外向、開朗，鍾意主動撩大人傾偈，但自理上仲係BB啲，好似食飯比較慢，有時仲想人餵佢，好識嗲人。但參加呢個比賽，佢知道其他小朋友係對手，佢好似脫胎換骨變咗第二個人，會喺其他人面前表現自己最強一面，連食飯都唔使你餵，佢大個女可以照顧自己，一知道有得拍攝，連瞓晏覺個習慣都冇咗，頂到拍完先瞓。」

勝出比賽後，Charlotte 將有很多《Sunday Kiss》拍攝機會，十分期待！爸爸Gabriel話會用平常心看待，希望她能保持學習的心迎接新挑戰，在明年升小一前，多加體驗讀書以外的生活，尤其在不同群體中學習，媽媽Erika說：「好似今次咁，攝影師、收音師哥哥叫佢做嘢都好合作，我哋喺屋企叫佢都冇咁合作，佢為咗做好件事變得好聽話。以前影相都冇咁易影，依家一舉起相機佢就嚟料，試衫對住塊鏡都會不斷擺甫士。」所以Charlotte真的有潛質做小童星！

精彩片段

怕醜試鏡

試鏡當日， Charlotte 起初怕陌生哭個不停，後來拍攝一開始她立即收聲，戰戰兢兢演唱〈Twinkle, Twinkle, Little Star〉，之後愈唱愈有信心，連後排的小朋友也跟着一齊唱，其感染力及自信心，帶領她入圍十強。

唱歌表演

在第三集「天才表演」中，梳起孖辮仔可愛度爆燈的 Charlotte，選唱英文歌〈Five Little Monkeys〉，首歌都幾長，中間雖有少少甩漏，不過她最後都記得所有歌詞，順利唱完整首歌，獲評判楊思琦大讚沒有怯場，沒有放棄。

爭影相鬧交

三個女人真的一個墟，第六集自拍比賽中，將九位小朋友分成三組，Charlotte 與Elise、Avina一組，三個女仔爭相機，Charlotte與Avina更吵起上來，一度不願意合照，好彩最後都做番好朋友，成功影到selfie。

哥哥出局

最後八強小朋友，在第八集接受跳彈床拍攝挑戰，Charlotte 與哥哥Kayden有爭執，互數大家曳曳，影響了發揮，最終Kayden被淘汰出局，攬着媽媽哭了一場，妹妹當然有錫番哥哥，一起接受挫折，亦是 Charlotte 愈戰愈勇的轉捩點。

●撰文：Ling
●攝影：Sing Ho（部分相片由受訪者提供）
●協力：Killy
●場地：LUDUS Kindergarten & Nursery （tel：2382 0061）

※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。