YouTube 癲喪女神 KisaBBB
Profile：
陳思慧（KisaBBB）22歲
經歷：2014年11月開始拍片放上網絡平台YouTube，開設「KisaBBB」頻道，分享日常二三事，是少數無聊愛搞爛gag的女Youtuber。
何謂：「女神」？定義隨時在變。古時，《愛蓮說》有云：「出淤泥而不染，可遠觀而不可褻玩。」女神由頭到腳散發着氣質，凡夫俗子得個睇字。今日，高登宅男有指：「有樣有身材，仲要夠親民有個性。」女神唔使吸風飲露，最好肯收兵，少少伏多多趣至過癮。網絡創作人YouTuber KisaBBB有潛質成為新一代女神，KisaBBB勝在夠「kai」、夠搞笑，展示真性情之餘，亦無懼素顏拍片，一般港女無得比，難怪不足一年已經煉成癲喪女神。
我不是女神
看「KisaBBB」影片前，第一個問號在腦海中浮現：究竟點解叫KisaBBB？她親自解畫：「之前工作，同事都係姐姐或者媽咪級，可能覺得我細路女，順口叫我Kisa BB。有一次，我無聊問男友：『係人都叫我做BB，你又叫我BB，唔得呀，我要升一個level。』佢即時隨口話：『BBB啦！』而Kisa都有意思，我好鍾意貓，之前英文名其實係叫Cat，記得有一次朋友整鐵線扭字頸鏈，佢話三個字唔靚，我唔想叫Cathy、Kitty呢啲唔襯我嘅名，後來發現Kisa等於Kitten貓咪意思，就取名Kisa，變成依家KisaBBB。」
取個名都搞鬼過人，而影片中見到KisaBBB喪笑毫無儀態、無無聊聊，又真係出於性格，100%真實，正如她自我介紹：鍾意搞爛gag，扮靚靚，玩貓貓，打機睇動漫，無無聊聊集於一身嘅女仔。近日，她被封為「YouTube女神」，KisaBBB大叫受唔起。「我心目中的女神係好有氣質，好靚，唔係我！之前跟其他YouTuber拍片，我都係飾演『唔係女神』，而唔係『吾係女神』。」
日常：KisaBBB——沖繩之旅
探索YouTuber之路
近年上網睇片成為許多人習慣，只要有心思、有噱頭，任何人都可以成為YouTuber。可知道，YouTube有分紅制度，只要影片多人點擊，就可以分紅。去年十一月，中大專業進修學院新聞系一年級生的KisaBBB忙上課，也忙工作，從事兼職售貨員的她，心想不如拍片賺些外快，少返兼職一兩日也好。加上，她下學期將修讀拍攝影片課程，先自學拍片取經驗沒壞。最重要是，KisaBBB性格搞鬼、諗頭多多，很多朋友鼓勵她拍片分享。以上種種促成YouTube女神之誕生。
靚女拍片分享扮靚心得，美容Blogger及YouTuber特多，KisaBBB學過美容又靚女，其實有潛質走此路線，拍片初期，她曾分享去黑眼圈及助入睡的法寶，可是點閱率不高，知道這塊「餅」飽和了，於是她立即變陣，展示其他女YouTuber很少涉及的範疇。「除咗美容扮靚，我都鍾意打機，男友係高達迷，對得多我又識，分享打機影片，仲有分享生活事，例如拍拖無聊事、返學趣事都受歡迎，反而有關貓奴、飲飲食食比較『正路』、花好多心機時間整嘅片就少人睇。」
喪笑本能感染網友
當魯芬也可以成為女神BB，就知各位巴打口味難以捉模。
而Kisa能夠成為女神，原因可能是她性情夠真。然而，KisaBBB初入YouTube界，網友說她醜樣、作狀、嘴藐藐懶得戚，有不少惡意批評，她都很介懷，為此而哭過，不過拍片找到認同、樂趣，一於繼續，學懶理「負皮」。
一條點擊率達十萬的〈【日常】KisaBBB．極低質素IQ題．笑到有腹肌〉有讚有彈。「我上高登睇到笑話，睇咗半頁，覺得好好笑，由於同學笑聲好過癮，決定一於返學校齊齊睇笑話，錄埋佢哋笑聲。」影片中，KisaBBB笑到見牙唔見眼，城堡入邊住咗隻仙子，原來係保鮮紙（堡仙子）；點解食神韜韜咁肥，因為Olay total effect（韜韜易fat呀），爛gag啟動了KisaBBB喪笑本能，笑到肚痛！有網友留言：「個個巴打都話你借高登上位」，KisaBBB回應：「呢個年代，做咩都會俾人話上位，顧唔到。」另有更多網友認同KisaBBB，例如：「好喇！你贏咗喇，我笑咗，已訂閱。」、「雖然啲gag一早知，但夾埋後面班觀眾又幾好，靚女，好笑，又有字幕效果，已sub（subscribe）支持。」從中，KissBBB開始找到認同，找到一眾知音人，鼓勵她繼續拍片分享。
出賣男友家人
KisaBBB現時拍了四十一段影片，男友肥仔是常出現的角色，而最近跟媽咪遊沖繩拍片，伯母亦不介意上鏡，不過被KisaBBB後期加工遮樣。KisaBBB不怕沒有私隱，更「出賣」身邊人，影片呈現了她八成的生活，她現時更必定隨身帶半自動單反相機，到餐廳吃美食，又或在街上忽發奇想都會即時拍片。「男友好支持我拍片，佢上鏡覺得無所謂，仲有網友話好想睇佢，話好好笑，而屋企人又無理我，可能見我開心，仲愈嚟愈支持我。」
「我唔係好紅YouTuber，分紅唔多，七個幾月以來，都係有$2,500左右，拍片唔可以當飯食，但就好開心可以分享，而且賺咗好多機會。最近，我為手機遊戲出席活動，雖然屬免費義務，但就有機會遇到羅蘭姐，呢啲機會有錢都買唔到。仲有，開始有小舖寄產品俾我免費試，我都好有興趣。」KisaBBB不想跟其他當紅YouTuber比較，現階段視作興趣為主，日後可當作一份兼職亦不錯。
不做新聞之花
現時網絡平台愈發愈大，全球觀看YouTube影片的時間較兩年前增加了50%，大眾花很多時間看影片，較傳統電視為多，整個傳媒生態正迅速改變。問讀新聞系的KisaBBB日後想當網絡新聞主播？她說：「原先有諗過做新聞女主播，但發覺傳統平台工作性質好似唔適合自己性格。咁讀新聞未必要從事呢行，之後讀上去，有機會揀其他科。」暑假期間，她在「謎米新聞」實習，同事知她有拍片經驗，找她拍片，KisaBBB直言非得心應手，需要留意咬字，NG好幾次。她較喜歡將拍片當興趣，題目、拍攝方式沒限制，可以揮灑自如展示真個性。
征服兵仔 男女通殺
那麼讀新聞可會幫助拍片？「完全無，因為未上相關剪片課，一直以來拍片都係我自己研究，大約花兩星期先可以出一條片，一啲即時性，例如介紹新game影片另計。平日相機跟身，見到得意嘢會影，儲吓片。」她確實花了很多心血，相約KisaBBB到貓café訪問，她不忘瞓身拍下跟貓咪互動，準備製作「貓奴」題材影片。大家專注看她靚樣、正身材之外，不妨留意字幕、特別效果、配音等等小細節，都是她的心血。KisaBBB慢慢儲了一堆fans，在最新一輯短片《動漫節搶先試玩》中，就有網友留言：「女神又唔講幾時去？等我呢啲毒撚參拜下。」而最令KisaBBB開心的是，愈來愈多女網友送她鼓勵說話、認同她，現時男女網友訂閱者比例大約7:3。KisaBBB很認真經營她的網絡分享平台，期望可以更入屋，男女通殺呢！
後記：貓咪女生
KisaBBB確實帶點貓咪特質，貼身衫配上短褲，一身打扮率性帶點性感，如同小野貓；看其影片，有時估不到她下一步做甚麼，如同貓咪行動難揣測；有時候，她變成美人兒，展示甜笑，像嗲貓咪般討好。還有，她擁有自我想法，有人認同她當然好，沒有也罷，自得其樂也無所謂，如同我行我素的貓。可知道，不少人是貓奴，筆者相信如貓的KisaBBB會愈來愈受人喜愛。
YouTube Channel：KisaBBB
訂閱人數：24,035
觀看次數：816,662
Facebook : www.facebook.com/kisabbb（Likes 8,135）
Instagram : kisabbb
Weibo : kisabbb
（截至2015年7月31日）
●撰文：Esther Ngan
●攝影：黃大立（部分相片由受訪者提供）
