【小小科學家與你Merry Kidsmas】動感科學園地聖誕玩不停

Dec 8 2017

我地嚟科學園都真係唔知有好幾十次，可能有朋友仔會問…嚟咁多次唔會好悶？

其實我地都真係唔會悶，因為每次嚟玩工作坊，佢嘅活動都係有唔同，而且隨著小小豬越嚟越大個，佢對STEM嘅認識又多啲，聽導師講解科學原理又好似明多啲，自己落手落腳做又多啲，投入感又多啲，所以小小豬玩得好享受呀~

編輯：Sunday Kiss

十二月就係聖誕月，所以科學園就嚟一個Merry Kidsmas，動感科學園地 – 聖誕玩不停，有好多唔同嘅工作坊，等小朋友邊玩邊學STEM~

[avrviframe id=”https://www.youtube.com/embed/E0FS74aJ_Sg”]

其實今次都有大約七個工作坊可以參加，不過小小豬就揀左三個佢覺得好玩嘅，就去報名參加啦！

第一個工作坊就係古惑測謊機，聽個名就好得意，原來佢都有一啲應用科學原理係當中。因為人一緊張就會流汗，流汗就會有水份，所以就會對電阻有影響。所以做一個測謊機就可以睇下講說話時有冇緊張。當然係整嘅過程中，導師會解釋電阻嘅科學知識，同埋電流同電阻嘅關係~

小小豬都好認真去整佢個測謊機，仲唔洗我地幫手，佢話要自己整呀~

經佢一番努力，當然係有導師幫佢手，終於完成，仲即時搵DADDY齊齊玩，睇下大家有冇講大話啦~

接住我地就去整個醒目機械貓，依個活動可以話係最受小朋友歡迎，因為參加者係最多嘅，當然亦都因為個製成品可愛有關啦。製作嘅過程可以學到摩打嘅結構同埋電流嘅方向令摩打轉凍變化嘅知識~

今次步驟就比較多，同埋都有好多唔同電線，所以小小豬終於求助，要我幫手啦(不過我都係做一啲要用力嘅部分，其實好多都係小小豬整)~

整好左隻機械貓，真係好可愛呀~

我地仲即場試玩機械貓，轉來轉去真係好攪笑呀~

最後一個工作坊就係整聖誕滑行機，可以自己砌飛機，小小豬又點會唔鍾意。主要係透過接駁電源教小朋友去推動摩打，連接個扇葉產生風力，令到個滑翔機向前行~

可能都已經係第三個工作坊，所以小小豬整得都好順手，好快就可以跟到導師進度~

將啲貼紙佈置靚靚，飛機就完成啦~

仲可以即場試飛添~

玩左三個工作坊，小小豬表現都算唔錯，所以就俾佢去跳下彈床開心下啦~

其實我真係好鐘意同小小豬入嚟玩，除左小小豬鐘意之外，我覺得就係可以由零開始，等小朋友一手一腳完成，見到個靚靚製成品，唔好話小朋友，就連我係旁邊睇住都好有成功感呀！

當然亦都要俾個LIKE各工作坊嘅工作人員，因為佢地都係好細心咁同小朋友講解各STEM原理，見到小朋友好似唔多明時，都會好主動邊解釋邊幫手，所以其實唔止小小豬，我見參加嘅各位小朋友都玩得好開心呀！

「動感科學園地 – 聖誕玩不停」嚟緊仲有兩場活動(12月10日& 17日)，由下午1時至6時，大會設有少量門券於活動當日即場發售，有興趣朋友仔都可以入去玩一轉呀！

下一頁：親子好去處金鐘香港公園