一家大細進擊AIA歐陸嘉年華
等咗8年，冬日嘉年華終於重臨香港，對一家大細嚟講，嚟緊一連三個重要節日－聖誕、新年仲有農曆新年，都唔怕冇地方去喇！喺開幕之前，我哋有機會入去會場事先巡視過，放假打算帶小朋友去happy吓嘅家長，不如睇吓我哋有咩貼士俾你啦！
點去最方便？
嘉年華位於中環新海濱，正門入口就喺中環10號碼頭隔離，而家會場周邊有工程進行緊，所以沿路都有好多圍板，公眾要由正門入口入場，我哋建議由尖沙咀坐船過中環天星碼頭，又或者坐直達中環渡輪碼頭嘅巴士，係最方便，同行得最少嘅，而且唔需要經過之前所講嘅地盤。如果坐地鐵嘅話，就好就由IFC出口出，經通往天星碼頭嘅行人天橋，走到位於碼頭內嘅海事博物館，沿博物館外嘅扶手電梯落去，就可以到達正門入口。順帶一提，有車一族可以選擇將車停喺IFC同大會堂附近嘅停車場。
有咩最驚喜？
今次嘉年華最大嘅特色之一，就係將全亞洲最大嘅室外溜冰場帶咗嚟香港，俾咁多中環區嘅摩天大廈圍住嚟溜冰，對大人細路都係難忘嘅體驗。如果小朋友唔識溜冰都一樣玩得，因為主辦單位準備咗幾十隻小海獅，小朋友可以坐喺上面，家長喺後面一路推，一路喺冰面滑行，玩一次要6個代幣，包埋溜冰鞋，喺場內算係「高消費」玩意，不過一樣可以過足癮！
機動遊戲冇得玩？
唔少人去嘉年華係為咗玩機動遊戲，不過傳媒試玩當日，場內廿幾個機動遊戲都仲測驗緊，有啲甚至連安裝都未完成，有睇新聞都知，係因為主辦單位都仲未攞到機電處嘅許可證，不過而家已經陸續開放緊，所以為咗機動遊戲入場嘅朋友，都係唔好咁心急入場，睇定啲先好喇！玩機動遊戲都係要用代幣嘅，一般消費由3至10個代幣不等，最貴就梗係玩最強離心力「MACH5」啦！不過驚嚇度都一樣咁高，唔係好啱小朋友玩啦！
有咩啱小朋友玩？
就算有機動遊戲玩，都未必樣樣啱小朋友玩，所以場內仲設置咗好多攤位遊戲，掟到公仔，小朋友一樣咁開心架！而且消費都唔算高，一鋪2個代幣，就有4次機會，啲公仔都幾吸引架。嫌攤位遊戲無聊，想打吓機又得，現場有個X-BOX攤位，鍾意嘅可以打吓機。場內仲有好多影相位，例如3D立體場景，加上唔同嘅場景擺設，充滿節日氣氛，啱哂一家大細一齊玩自拍！
會唔會冇啖好食？
入得主題樂園玩，食嘢「貴夾唔飽」都係常識啦！錯！喺嘉年華入面，開餐選擇絕對多，小食亭更加總有一個喺你左近！除咗有一般嘅熱狗、爆谷，仲有具有歐陸風味嘅pizza、薯條、長通粉，地道啲嘅有燒賣、荷葉飯，15蚊起就有交易，食個pizza都係$45蚊，味道都算唔錯，一家大細玩到攰想食啲嘢，都唔使就住就住啦！飲品價格都算親民，買支700ml嘅水都係10蚊，凍冰冰想入支熱維他奶都一樣有供應，算係幾貼心啦！
活動詳情
日期： 2014年12月23日 至2015年2月22日
時間：11：00 –至 23：00
地點：中環新海濱
票價：成人$125 (附價值$100的遊戲代幣)；小童及長者$90（附價值$70的遊戲代幣），3歲以下小童免費入場； 遊戲代幣每個$10
2015年1月5日至2月12日期間，星期一至四皆為特惠門票，週末及公眾假期門票則以一般門票售價發售，平安夜、聖誕節、除夕及農曆新年初二之門票只限即場購票
網上購票：www.ticketflap.com
撰文：Joanne
攝影：Clay Lam
