商場捕獲人氣卡通人物 完全攻略
天時暑熱，一家大細去邊好? 集衣食住行玩樂於一體嘅商場，就最適合不過啦! 今年暑假，來自全球各地嘅人氣卡通人物，紛紛進駐港九新界各大商場，鍾意集郵影相，又或者買限定產品，都一定唔可以錯過!
一套《魔雪奇緣》令全球女孩為之瘋狂，雖然電影一早落咗畫，但呢股”魔雪狂潮”就從未停過! 迪士尼新園地冰雪小鎮已經開放，仲要喺夏天有真雪玩，一眾公主控應該一 聽到就”姣仙芬”! 但係一家三口要一齊入去玩，郁啲就以4位數字起跳，真係唔係人人玩得起! 而家MegaBox就將全港首個「《魔雪奇緣》冰雪小鎮觀光館」搬咗入商場，可以率先體驗迪士尼冰雪小鎮有幾好玩! 又或者喺「預覧區」先plan吓行程，仲可以免費索取限量版《魔雪奇緣》冰雪小鎮號外，等小公主感受吓冰雪氣氛先!
日期：7月26及8月16日 (星期日)
時間：2:00pm
地點：G
消費滿HK$500*或以上或以Mega Club 10分 / Mega Kids Club 6分即可報名參與，由香港迪士尼樂園酒店甜品師傅親身示範製作吸引的《魔雪奇緣》夏日甜點，「魔法化妝廳」仙女教母實習生亦即席展示如何讓模特兒小女孩搖身一變為愛莎女皇及安娜公主！樂園的演藝人員更會即場教授以《魔雪奇緣》主角創造精美的手作工藝，發揮創意！
《魔雪奇緣》3D攝影區 經典場景逐個睇
頭先講過，一家三口入一入迪士尼，閒閒地都要使4位數，點樣平平地又可以滿足屋企個小公主先? 有嘅! 嫌個觀光預覽區唔夠盡興，仲可以使少少錢，就可以同小公主影相影餐飽喇! 事關喺商場9樓，開咗個以《魔雪奇緣》為主題嘅3D魔幻館，佔地逾8000呎，劃分咗5個不同區域，提供約30幅3D立體畫，小公主可以喺入面親歷《魔雪奇緣》電影中嘅經典場景，真係好有公主feel架! 最重要就係平! 只係要畀$50，又或者喺商場入面消費滿$200，就可以入去影餐飽，一家三口去到食個lunch，就可以小公主去影靚相啦! 抵到爛! 至於有咩經典場景畀你影? 一齊去睇吓啦!
行埋去影相都可以施展魔法，絕對可以滿足公主控嘅需要!
《魔雪奇緣》3D攝影區
日期：7月31 – 9月12日
時間：12:00nn – 9:00pm (星期一至五)
10:00am – 10:00pm (星期六及日)
地點：9樓 童真天地
其他相關精彩活動，可以喺呢度睇到!
新世紀+新城市 點指兵兵迷你兵
7月就有新戲上，所以呢排去到邊都見到呢3隻迷你兵咁滯! 其實迷你兵又點止呢3隻! 今個暑假就有66隻迷你兵，分別進駐入旺角新世紀廣場同沙田新城市廣場，仲會穿越時空， 反轉倫敦紐約大街小巷， 重遊古代大西洋活火山，要行勻成個商場，先可以影得哂唔同嘅造型，影完之後，記得數吓夠唔夠66隻呀!
返到去石器時代，唔知有冇蕉佢哋食呢?
不可不去的pop up store
雖然戲就未有得睇，不過都可行買吓迷你兵產品止吓渴先嘅! 而家喺一田(沙田,大埔,荃灣同旺角)，都有開檔，家品精品，文具玩具，你講得出都有，買夠$800仲有一田獨家限量版tole bag送tim!
至於有咩產品係必買呢? 一齊嚟呢度睇啦!
MOKO新世紀廣場 X迷你兵團「點指兵兵 萬里尋兵」商場佈置
日期：即日起至7月31日
時間：12nn – 10pm
地點：MTR樓層中庭、L2樓層及L4樓層
新城市廣場迷你兵團Minions 異動基地詳情
日期： 即日起至8月2日
時間：上午12時至晚上10時
地點： 新城市廣場1期1樓羅馬圓型獻技場、3樓拱型玻璃天幕廣場及
新城市廣場３期1樓天幕長廊
7米高鐵甲萬能俠「銀芽」飛到The One
鐵甲萬能俠對小朋友嚟講可能會陌生啲，不過70後至80後嘅爸爸，應該冇一個唔識喇掛! 有時出街都唔可以淨係掛住小朋友鍾意咩嘅，唔通爸爸次次出街就係負責拎嘢,畀錢,同揸機咩! 今次The One呢個鐵甲萬能俠展，真係唔止中正大細路爸爸嘅喜好，小朋友一樣啱玩架! 除咗門口露天廣場放咗個全球最高嘅巨型版出嚟壓場之外，商場入面仲有一個珍藏基地，展出過百款經典珍藏，可以睇到一眾鐵甲人登場，仲有創作人永井豪嘅手稿,漫畫原稿等等，兩父子一齊影相，再講吓童年回憶，都係一個幾好嘅親子活動嚟架!
Q版模型，啱哂小朋友心水!
「The ONE X 永井豪 珍藏基地」永井豪精品研究所限定店
日期：6月29日至8月31日
時間：12:00nn 至10:00pm
地點： UG2中庭
Domo仔浪遊到屯門市時代廣場 + 粉嶺中心
Domo係日本電視台NHK嘅熱爆吉祥物，由而家起去到8月23號，3米高嘅巨型毛毛Domo就會喺屯門時代廣場現身。而粉嶺中心就以香港特色街道為主題，Domr會以多個搞笑造型，好似食魚旦、彈結他唱歌、購物狂等等，喺商店街出現! 喺屯門時代賡場，更會破天荒公開NHK官方借出之Domo 動畫製作模型，等fans可以了解動畫製作嘅概念同過程，仲由日本直送咗好多官方極罕限定精品，好似係Domo 不同經典造型、絕版公仔、展出過百件Domokun 的手稿，當中包括全球唯一官方手造、曾於法國康城電視節展出的Domokun，Domo粉絕對不容有失！
「恒基兆業商場 x Domo 仲夏浪遊之旅」
日期：7 月1 日至8 月23 日
時間：10 :00am 至 10 :00pm
4D龍珠體感遊戲專區 最強對最強
悟空、比達、杜拉格斯、笛子魔童及悟飯，呢型龍珠戰士唔止係動畫主角，而家仲一齊齊集東港城，同菲利、魔人布歐、斯路展開爭戰。動漫入面嘅情節，變成4D場景，大人細路去到商場，可以登上比達嘅太空艙、踏上斯路決戰擂台、爬吓貓仙人塔，真人體驗動漫嘅情節!「儲閃卡」係90年輕嘅熱潮，亦都係一眾動漫迷嘅集體回憶！ 同場舉辦嘅《我們的龍珠Z閃卡隧道》，就會展出近千張《龍珠》閃卡，畀大人可以帶住細路一齊去懷緬吓兒時嘅經典。
東港城 x 龍珠Z 《盛夏‧最強對最強》
日期：7 月4日 至8 月31 日
時間：10 :00am 至 10 :00pm
其他推介
新元朗中心 X「Mr. Men & Little Miss世界巡遊」
My Melody & Little Twin Stars 40週年生日派對
除咗以上嘅介紹，仲有好多商場活動值得大家去趁吓熱鬧架!!
得閒可以緊貼住Sunday Kiss網站嘅 “好去處”，就可以掌握到全港各大小商場同活動嘅動向架喇!
撰文:Joanne
(相片由有關機構提供)
