【親子遊】峴港大人細路都啱玩 陽光海灘古蹟之旅
不過今次田爸田媽真係好想去陽光與海灘歎下Hea下，布吉沖繩蘇梅我地都去過，近近地田爸就諗到去峴港（Da nang)。
話明係Hea，田媽連事前的planning都好Hea，只係上網睇下邊間Resort適合一家大細玩、同埋出發前3日book了個local tour，其餘的行程都係去到上網搵，隨心玩。
不過，今次5日4夜峴港之旅，我地一家三口都大叫好玩，真係唔捨得走。未離開峴港田媽已經諗緊幾時再有機會去多次，所以決定同大家分享一下帶住小孩遊峴港係點。
出發前準備
本來想用飛行里數換機票，可惜該Airline一日只有一班機去Danang，結果田媽就改訂budget airline，仲俾我搵到平機票，一家三口連稅total $3300!
另一樣會令人怕怕就係要搞簽證，其實去完發現都唔係咁煩。最方便的方法係先網上申請（小朋友都要申請），網上俾錢，大概USD$8一個人。
過一個星期左右就會收到email。
印張form出黎填好（一人一份）同每個家庭一封信，帶住上機就可以。
到埗未過immigration就會見到個counter辦理落地簽證，基本上全機人都會排隊搞簽證。再俾多大概USD$16現金左右（田媽唔記得左）就可以順利入境。
至於錢方面，在香港換美金過去就得，當地消費好平，大部分舖頭都收美金，找越南盾（當然個rate冇咁靚啦）！
而家就分享一下我地5日4夜玩左乜啦！（由於今次峴港之旅都一段時間喇，所以未有記得太多資訊、或者樣樣都影相，如有遺漏請見諒）
Day 1 機場 – 市區酒店 – 食Pho
我地班機到峴港都5點，搞掂晒所有嘢都成6點幾先到酒店settle down。田媽頭兩晚都住市區的Sanouva Danang Hotel，除了因爲方便頭兩日的行程，最重要係間酒店平靚正（之後間Resort 都唔平，要溝淡一下）一晚$4xx包早餐不特止，仲每晚都可以做一次免費的45分鐘Massage，好抵住！
房間都算乾淨、早餐食物亦ok，lobby有兩部真的綿羊仔俾人影相，Justin玩到唔想離開酒店。
去到越南當然要食下Pho啦 （保守估計我成個trip食左10碗以上），我地見步行17分鐘就有一間係trip advisor遊客推薦的，田爸就提議行下，視察下民情。結果我地發現條街係冇乜人行，而且條路好難行，Justin行行下要田爸抱。
至於碗牛河，我地食左兩間（因為佢地係隔離），分別係Pho Hong同 Pho Phu Gia Hà Nội 。
回程我地決定call grab，港紙幾蚊就可以舒舒服服返酒店，往後我地大多數都係以Grab代步。
Day 2 Danang Cathedral – Danang Museum – 會安美山美食團
田媽出發前3日book左個local tour去美山同會安，下午一點先出發，朝早食完早餐就諗住市內觀光一下。
我地先步行去粉紅色的Da Nang Cathedral 睇下，但係峴港的日間真係好熱，去到教堂田爸同Justin已經溶左，冇心情影相。田媽都係是但selfie左兩張就算。
見仲有時間，就立即上網search下附近有乜室內的地方可以去，我地就決定坐grab去Danang Museum。
個博物館主要介紹峴港的歷史，仲有驚喜位，就係展出了當年越戰用的槍炮、炸彈，好震撼！雖然好快就行完，但係田媽覺得值得一去。
返酒店附近食完午餐就出發去美山會安美食團。田媽訂local tour的時候見到好多都晨咁早出發，而且會安最靚應該係入夜後，所以就選擇這個美山+會安美食團。這個係包團，一個司機+一個當地導遊+我地一家三口出發！（導遊姐姐係講流利英文的，田媽8掛問佢，原來佢係當地大學英文系畢業。）
峴港市去美山(My Son)大概一小時車程，途中係巧驚驚的，因為司機係會瘋狂cut線爬頭，應該係越南的駕駛style。
美山其實就係一個迷你版的吳哥窟，峴港這個歷史比柬埔寨的更悠久，有「小吳哥窟」之稱，被列為世界文化遺產。
門票local tour已包，由大門口行大概5分鐘，就坐電動車去建築群附近，但係落車之後都要行一段山路先到。
車程又係一個鐘左右。
會安係一個古鎮，在峴港市我地成日覺得條街冇乜遊客，冷冷清清咁，原來好多外國人都會選擇住喺會安。一去到已經覺得充滿住濃厚的異國風情，好正，田爸仲話終於覺得自己去左越南。
導遊姐姐帶我地食了好多地道美食：rose dumpling、法式包、燒豬肉、高樓麵、越南咖啡等等，超滿足、超飽！（食物費用已包了在團費）
途中其實我地有段小插曲，可能在美山的時候太熱太曬，去到會安Justin個人好熱、仲話好眼訓，一路要我抱住佢。本來田媽諗住不如提早返峴港，導遊姐姐話佢可能中暑，叫左一杯lemonade俾Justin，過一陣Justin又生猛返晒，真係好感激導遊姐姐。
食飽飽就行入古城，準備今晚最後的活動：放水燈！入夜後的會安古城真係好靚！我地坐船在河上水燈，Justin覺得好好玩，唔想上返岸。放完水燈，於河邊食個燒豬肉米卷就回程返峴港，完成半日豐富的行程。
返到酒店先8點幾，田媽走落去歎返個免費按摩，正！
Day 3 Han Market – Helio Center – Hyatt Regency Resort
Check out 轉酒店去Resort 前，我地去市集行下。
峴港有兩大市集：Con market 同 Han market，我地選擇了去遊客比較多的Han Market。
入面主要賣兩類東西，樓下係食品，樓上就係衫褲鞋襪。我地本來諗住買越南腰果俾我家的腰果怪食，但係試味真係太咸了，放棄左。
行左唔夠10分鐘Justin就話要走，但係又未夠時間去resort check in。我地就醒起早一日去美山途中經過一個叫Helio Centre的地方，導遊姐姐話有小朋友野玩。由於佢的位置係酒店與resort之間，我地11點就check out攞埋行李坐grab去Helio Center。
一入去就會見到一個好似冒險樂園的地方，大少少的朋友會岩玩，至於3歲的Justin，我地就去左佢個playhouse。係呀，越南都有playhouse架！
Playhouse都好大，多野玩，衛生程度就一般啦。我地最欣賞佢個超級市場，像真度都高。留意這裡只收越南盾，幸好我地夠錢俾入場費，不過就唔夠錢食野。
之後就到最期待的行程：Resort 歎世界！
多數香港人去峴港會選擇Intercontinental Peninsula Resort，不過田媽望過覺得唔係咁適合小朋友，所以就選擇這間Hyatt Regency DaNang Resort。
田媽係經佢官網訂房，當日格過價比較平，我加多左少少錢，upgrade要埋Regency Club access。同埋我選擇Ocean View room而非Garden view，因為一場黎到，望住個海點都開心點
Resort內9成都係韓國人，其實成個峴港都係，因為韓國喺越南有好多投資。Resort最吸引係有好多個泳池，main pool 由頭行到尾都要5分鐘。我地大部分時間都留在baby pool，因為有得玩沙。3日2夜留係Resort我們游了4次水，曬到燶左。
酒店亦有私人海灘，一行出去係有種令人起雞皮的震撼感。一望無際的沙灘同大海，壓力煩惱一掃而空
Upgrade了Regency Club的好處，係唔需要於大堂掛隊check in check out、全日飲品任飲、同埋最吸引的free cocktail！每日5:30pm -7pm 都會提供cocktail、啤酒、紅白酒、汽水、多款小食，任食任飲。原本第一晚resort我地諗住出市區食海鮮，但係Regency Club已經飲飽食醉，到Justin訓左叫個Room service就算。
順便一提，越南的消費實在太低，酒店食飯room service 的價錢相等於香港一般餐廳，所以平時唔會咁豪既田爸，都由得我係咁食、係咁叫room service。
Day 4 Hyatt Regency Resort – Dragon Bridge
是日大部分時間都係留在Resort繼續歎世界放空游水，而田媽亦安掛了今日於酒店做spa，師傅手勢唔錯，好爽呀！
夜晚在Regency Club填飽個肚我地就出發去市區睇Dragon Bridge，條橋每逢星期六、日夜晚9點個龍頭就會噴火。不過出到去有個小朋友話驚火唔想睇，所以我地係河邊行下、食個雪糕就返Resort。
Day 5 Resort – 回香港
話咁快就到最後一日，照樣係酒店Hae，早上游多轉水。我地食完早餐就去request late check out，我地要4點到機場，可能星期一又唔係peak season，酒店安排我地3點check out。
我地call grab去機場都好方便，原本諗住去到機場用埋d越南盾，可惜機場d貨品Mark up得太多，最後乜都冇買！
今次的行程，由頭都尾都係Hae同即興，但係意外地好玩，過左兩個月都仲回味緊
如果想知道行程的多一點資訊，歡迎pm田媽，多謝支持！
=====================================
田媽玩樂誌
Facebook: https://m.facebook.com/justinmamablog/
Instagram: https://www.instagram.com/justinmamablog
