工廈 室內場 卡丁飛車玩飄移
廣告
係香港地想玩賽車，由於土地問題，幾乎係冇可能嘅事。不過，記者發現最近觀塘工廈有個小型賽車場，就攞正牌專玩電動卡丁車，更大玩飄移做噱頭，不論是否車友，聽到都心郁郁想試！駕駛技術唔使識，純粹要求有膽識，手拉飄移桿就「片」到個靚彎！
無牌駕駛 飄移境界
其實呢個所謂賽車場，本身係賣卡丁車代理公司，由於需要地方試車，於是索性改埋工廈單位做賽車場，三千幾呎空間化身賽道。有大、中、細揀，平均時速20km，最普遍的中車最高負重都有成百四磅，如果自命大件頭的可俾多十蚊揀大車，最高負重更去到兩百四磅。
雖然賽道唔算好長，幾十秒已經兜完一圈；但醉翁之意不在酒，因為打正旗號玩「飄移」，所以彎位夠多先係重點！賽道雖唔算迂迴曲折，但仍有五個彎位俾大家「劈」住去。踩油、扭軚至入彎一刻，手執飄移桿一抽，兩隻後轆就會「解鎖」可轉360度，縱向移動的「飄移」就係咁易做到！由於「飄移」一刻需要左手單手控制「軚盤」， 若操控唔好或「速度」太快，就有機會打白鴿轉呢！
續下頁
由於卡丁車的軚盤圈數細，不論左右只要扭半圈，前轆已經可以180度， 所以轉彎時只需扭少少已足夠。
飄移逐格睇
縉泓科技有限公司
地點：觀塘開源道73-75號業及工業大廈二期9樓H 室
營業時間：12:30pm-12mn
費用：細車每5分鐘$40起
查詢：3428 5298
