慈雲山歷奇樂園 ｜大型嬉水裝置＋2層高滑梯

撰文：Kammy｜資料來源、圖片：初初媽媽 ChochoMama 授權｜編輯：TLY

慈雲山歷奇樂園

天氣咁熱最岩就係玩水啦，慈雲山歷奇樂園就係少有提供嬉水設施嘅免費遊樂場！位於慈雲山中心5樓露天平台現已開設超過萬呎嘅歷奇樂園，費用全免，而且全日共設4節遊玩時段，每節75分鐘，好啱帶小朋友嚟放電！

不過大家注意啦，雖然慈雲山歷奇樂園係免費入場，不過由於入場人數有限，大家要先喺5樓中庭嘅電梯附近拎手帶先可入園，每人限攞2條，而且名額有限派完即止。另外，公園要除鞋先入去玩㗎，場內更設有免費儲物櫃，方便家長使用。

大型嬉水裝置

慈雲山歷奇樂園內有各式各樣嘅玩樂設施，但最吸睛嘅莫過於呢個大型嬉水裝置。裝置有定時灑水系統，吸引唔少小朋友跑過去一邊放電一邊消暑，建議家長帶多件衫褲俾小朋友替換。

2層高巨型滑梯

呢個樂園第二個賣點就係呢條長滑梯，仲要係一條橫跨2層嘅巨型滑梯，相信刺激度爆燈呀！不過由於鐵滑梯嘅出口同地墊都長期曝露喺陽光底下，所以如果入園當日天氣嚴熱，家長就要衡量下俾唔俾小朋友玩。

大型波浪繩網陣

大型波浪繩網陣可以訓練小朋友嘅身手，俾佢地可以喺繩網中自由穿梭。繩網陣旁邊仲有其他特色攀爬設置同鞦韆。

樂園內仲有好多其他唔同嘅遊樂設施，包括適合 2-5 歲兒童嘅遊樂設施，絕對可以令小朋友玩到樂而忘返呀！

慈雲山歷奇樂園 詳情

地址：慈雲山毓華街23號慈雲山中心5/F

適合年齡：2至12歲兒童
費用：全免
開放日期：星期二至日（星期一休息）
開放時間：
A – 10:30am – 11:45am
B – 12pm – 1:15pm
C – 2:30pm – 3:45pm
D – 4pm – 5:15pm
（A及B時段於10am開始派發手帶，C及D時段於2pm開始派發手帶，派完即止)

常見問題：

問：到慈雲山歷奇樂園有什麼要注意？
答：場內規定必須入場人士要脫鞋遊玩，不過夏季時地墊很燙腳，建議帶備襪子保護雙腳。另外，由於有嬉水設施，建議替小朋友帶備多套衣服以作更換。

問：樂園內是否有定期清潔消毒？
答：有，每日的13:15-14:30為樂園的清潔消毒時間。