摸蜆四大熱點 最快樂的親子活動

撰文：李永釗、林斌 | 攝影：Clay Lam、Paul Choi、溫俊鏘、黃大立

水口村 景靚配套足

香港的 摸蜆 泥灘有好多，特別在大嶼山，貝澳、大澳及水口等等，當中水口村近年成為摸蜆的熱點，平時好多人去，令到泥灘周圍都有好多摸蜆的配套，由東涌轉巴士或的士前往水口村網球場附近落車，車程約二十分鐘左右，落車行到泥灘只需三分鐘，來到即刻見到有士多，除了買麵食汽水作摸蜆中途的補給外，士多內還有摸蜆裝備出租，一套包矮凳、鐵扒和水樽。摸蜆要趁潮退時間，水口的泥灘非常大，約有六至八個標準足球場的大小，從士多望過去，非常廣闊，沿住泥灘行出去，愈近海邊愈大機會摸到蜆，揀啱地點就可以開始扒開泥沙，一行人在近海地點位置摸了半個鐘已經有好多蜆，當中還包括兩隻大蜆，收穫豐富，大家就可以拿着戰利品回到士多，俾少少錢讓他們幫你即時炮製，望住廣闊的藍天大海一邊品嘗自己摸到的蜆，真是別有一番風味。

前往方法:

到東涌巴士站乘11號巴士或的士前往水口村（近公廁位置）落車，再穿過小徑前往，離開方法亦一樣。

白石 水清沙幼兼多蜆

想 摸蜆 但唔想入咁遠嘅，其實地點較為就腳嘅沙田區亦有兩個好出名嘅 摸蜆 好地方！經常聽沙田友話烏溪沙好多人摸到一大桶，於是筆者又親身入去考證下。烏溪沙有兩個地方有得摸蜆，一個就係白石，一個就係泥涌。前者雖然都近烏溪沙馬鐵站，行過去都唔使十分鐘，但由於白石個泥灘並未被開發，所以係冇救生員、冇士多及裝備租借，要自己帶備所有物資前往。筆者前往當日為閒日，整個泥灘大約有兩至三個足球場咁大，加埋都唔過20人，在水邊位置摸了大概個半鐘，已經有半個大桶嘅收穫，但蜆種普遍較為細隻，似平時街市見到嘅砂蜆。另外再加上本身隱世泥灘嘅怡人靚景，實為摸蜆好去處！

記得帶埋私伙裝備去，小朋友用沙灘玩具較安全，而大人用嘅園藝扒及鏟較貴，雜貨舖買都要$40至$50。

前往方法:

乘馬鐵烏溪沙站步行約10分鐘，或自行駛車在往白石俱樂部的小路中段下車向右落小山坡。

下白泥 睇日落摸蟶子

流浮山的下白泥，出晒名有靚景又浪漫，而且還是一個摸蟶子的熱點，在近黃昏的時分，斜陽映照泛金的泥灘，絕對令你驚喜。不過要留意沙灘附近的士多平日大多數唔開，所以要預備好水等補給品及自攜 摸蜆 工具。來到泥灘，平日並不多人，但下白泥的景色確實一流，沙灘和近海的泥灘融合，水流在岸邊形成一條河，中間又有一個小小的綠洲，屬影相的熱點。沿着泥灘行出去摸蜆，收穫比水口少好多，但只要留意泥灘中的一個個小孔，被水覆蓋時候孔內會有水泡冒起，就證明孔內有蟶子。之前新聞報道有人拎粗鹽去引蟶子，破壞生態環境，不過村民表示，用工具都可以挖到蟶子，在這些孔的地點挖大概廿公分深，就有機會找到，我們用該方法大概嘗試了十多個小孔，成功找到兩隻蟶子，雖然過程比較辛苦，但摸到蟶子的成功感加上在此日落的美景之下，個人都心情好啲。

前往方法:

於元朗市中心的泰豐街乘綠色33號專線小巴，過了流浮山迴旋處，於鴨仔坑下車，沿海灘方向走十五分鐘左右到達。

泥涌 蠔殼多過蜆

聽聞白石附近嘅泥涌都係 摸蜆 勝地，位置大約在西沙茶座附近，風景的確唔錯，有小溪流水，但衰在地下就一係爛泥一係碎石，連深水位亦多碎石，穿拖鞋的筆者及攝影師亦覺得腳板陣陣刺痛，原來地下蠔殼猶如地雷陣，難怪在場人士多穿水鞋或白飯魚。筆者眼見在場摸蜆人士都只得蜆仔三兩隻，一問之下原來已經摸咗個幾鐘，記者親身摸了個半鐘左右亦係得個吉。雖然睇黃昏係唔錯，但就摸蜆來講，呢度絕對中伏！

前往方法:

乘馬鐵烏溪沙站步行約20分鐘，或轉乘807小巴於西沙路落車過對面。