【日本親子遊】名古屋童星點心麵主題樂園7月開幕 7大必玩打卡位率先睇
廣告
講起最受小朋友嘅零食，童星點心麵一定上榜！童星點心麵官方去年宣布於名古屋開設童星點心麵主題樂園，日前宣布樂園將於7月開幕，場內有好多玩樂設施及打卡位，肯定會成為日本親子遊嘅必去熱點！
撰文：Kamen | 圖片：Oyatsu.town
日本親子遊 名古屋童星點心麵主題樂園7月開幕
日本一直係親子遊嘅熱點，有好多以卡通或食物做主題嘅主題樂園。而童星點心麵去年宣布於名古屋興建主題樂園及工場。而日前亦宣布最新消息包括開幕日期及場內玩樂位。
樂園將會於7月20日正式開幕，選址於三重縣，鄰近大阪及名古屋，如果一家人去玩建議喺名古屋出發會更加方便！樂園總建築面積約4000平方公尺，集「遊樂」、「學習」及「創造」於一身。
7大必玩打卡位率先睇
場內除咗有品牌歷史博物館，亦有室內遊樂場及自製點心麵體驗，非常啱小朋友去放電！
1. 零食博物館
零食博物館區域有大量收藏品，小朋友可以欣賞各種昭和年代嘅零食！
2. LittleTown
Little Town全場用瓦通紙製成，亦有一條滑梯，絕對係打卡位呀！
3.8米長Hoshio 滑梯
Hoshio係童星點心麵嘅吉祥物，今次佢化身8米長嘅滑梯，絕對係小朋友嘅放電之選！
4.Sport Viking 6
Sport Viking 6係個運動體驗嘅場所，一共有6款運動包括攀岩、乒乓波同高爾夫球等俾小朋友體驗！
5.3層巨型繩網陣
場內有個3層高巨型繩網陣，2、3樓更加有滑索，小朋友一定超開心！
6.自製點心麵體驗
來到童星點心麵樂園，當然要體驗自製點心麵！除咗點心麵，大家仲可以體驗朱古力脆脆麵，有得玩有得食！
7. 紀念品店
童星點心麵樂園當然唔少得紀念品店啦，除咗可以購買超過200款口味嘅點心麵，亦可以DIY專屬包裝拎返屋企！
