邊個話小朋友唔玩得大人場！今次就同兩個細路去咗開業有一年多的樓上Party Room「BALL ROOM」，除咗荔枝角分店，喺觀塘仲有兩間店設不同主題，裡面有各樣得意好玩的遊戲，其中一樣仲有今屆冬季奧運會新增的冰壺遊戲，大家不如今個新年考慮下一家大細嚟呢度玩番日啦！
樓上Party Room BALL ROOM 設3間分店
BALL ROOM在香港已有3間店，今次去到位於觀塘的2間店，一間位於駱駝漆一座，一間位於永興工業大廈(The Wave側)
巨型桌上足球
我哋先到永興工業大廈的BALL ROOM玩玩，其實每個BALL ROOM都有一個Signature的遊玩設施，這個桌上足球POOLSOCCER®就係觀塘1店的生招牌
玩法就同美式桌球一模一樣，只係唯一唔同嘅地方係用腳踢取代用Q棍。
但係呢個呀芊唔跟規矩，踢踢下變咗帶波去到洞前先踢……很正常吧！哈哈~
大小朋友都啱玩
跟住到哥哥施展一下球技（佢唔大腳踢咗上天花板已經算係咁）
估唔到最後留低喺度玩的係呀芊，佢真係好鍾意踢波，係時侯要培訓佢對甲組腳
正所謂「出得嚟玩，預咗要執」我呢個嚴父當然教小朋友要玩完執嘢，有錢大哂咩。
第一次玩這個POOLSOCCER®真係覺得好好玩。
小小桌球運動員？
哥哥之所以踢踢下走咗去，原來佢特別鍾情於篤波，真係估佢唔到。
其實以往舊屋企會所有一枱桌球，唔知係咪細細個手抱已經接觸，所以大個之後雖然冇咩點玩，但係一見到已經好興奮，未打機前幾乎都黐住張波枱。
幸好美式規矩比較容易玩，若英式的話可能佢打成個鐘都未入到一粒
桌上冰壼
觀塘1店這裡還設有一個桌上冰壼SHUFFLEBOARD，冬季奧運會加入咗呢個運動，一於俾小朋友先認識下，到時睇比賽佢哋就會有興趣。
練手眼協調
睇落好似好易，但係都真係幾難玩，幾乎下下都太大力推咗落坑
真係好奇怪，推極一次都唔中……唔係落坑就係唔入圈，如果練熟咗個Game最啱用嚟喺呀囝呀囡面前表演。
Board Game任玩 場地大
BALL ROOM有好多Board Game，同埋場地空間好大，有足夠空間同班朋友慢慢玩。
親子時間
我最鍾意同小朋友玩Board Game，因為玩嘅時侯可以同小朋友有很多的互動，確係一個超級好的親子時間。
MasterMind
近期哥哥愛上咗玩 MasterMind，但係次次都只係鍾意做出題嗰個>.<
最後臨離開前先至開部PS4俾佢哋玩，因為明知如果一開始就打機，其他嘢就唔駛玩。
開咗隻街霸V俾佢哋玩，打得佢哋幾咁緊張！因為哥哥都試過喺商場活動度玩過下，所以係咁咦都識得出波同AllUGet
打街霸切磋武功
為免令媽咪覺得打街霸係教壞細路，所以我就話呢個唔係打交Game，只係切磋武功，點到即止，哈哈～
駱駝漆另一間BALL ROOM
離開咗永興工業大廈的BALL ROOM，我哋再去駱駝漆工業大廈另一間BALL ROOM
桌上冰壺CURLING
這裡的Signature Game係桌上冰壺CURLING，仲係今屆冬季奧運會新增設的運動項目。
整個賽道非常之長！每個冰壺都超重，千祈唔好走去嘗試拎起佢，如果唔係一陣閃親就弊傢伙。
玩法好簡單，只要大力將個冰壺推到分數圈內，累積分數最高就贏啦！
我哋分好咗男子組及女子組對決，喂！唔公平喎，兩個男仔都咁大個。
班男仔即刻投哂訴！算啦，算啦，呀芊咁細個就讓一讓下佢啦！
電流捧考驗集中力
挑戰完冰壺之後，我哋去到隔離的電流捧 ELECTRIC ROD，我細個成日睇一個日本節目玩電流棒超好玩，所以今次好期待可以有得玩。
不過連老闆都話其實轉得有啲快，佢自己都係試過一下成功完成3-4次。
當然佢哋都係好快就撞到邊邊響鐘啦！不過難度咁高，佢哋每過到其中一關都已經要拍爛手掌鼓勵。
小朋友每撞到一次就原地繼續再玩「無限Continue」。
真係唔交代清楚，以為哥哥真係可以由頭玩到尾咁勢利。
旋轉層層叠
之後我哋再玩呢個好似輪盤的遊戲，叫做「旋轉層層叠」
成張賭枱咁究竟係點玩法，原來個圓台會自動轉動，玩家每次拎出籌碼叠上去，其後玩法就如層層叠般，冧落嚟就輸啦！
遊戲簡單又好玩抵死，最啱成班朋友，甚至小朋友一樣都啱玩。
電子飛鏢靶
亦設有電子飛鏢靶，可以同小朋友來一場對戰賽。
PS4電玩
這裡除了有PS4這些電玩外，仲有個街機模擬器用Joystick玩。老闆教佢哋那個掣是輕拳那個是重腳，我看都是嘥氣吧！佢哋最後咪又係亂打。
Photo byCANON 5D Mark IV,Len|EF 24-70mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分:10分
呀劍評語:一直冇諗過上樓Party Room可以啱小朋友玩，以為必定係麻雀耍樂咪霸地頭。原來可以一樣有遊樂設施適合一家大細一齊玩。新年就到，大家快D包場上去玩番晚啦！
BALL ROOM 簡介
BALL ROOM的設計以美式工業風格為主體，是香港一個提供多元化娛樂活動的場所。場地佔地約2,200呎，全場開放空間，最多可容納70-80人娛樂狂歡。場地設施包括：人氣大熱運動「POOLSOCCER®」、星際氣墊球、桌上沙壺、標準美式桌球比賽枱、Dartslive 飛標機、過百寸大屏幕投射機、燈光及音響系統、 48吋大電視、PS4遊戲、大量卡牌及棋類遊戲等。 此外，我們亦設有i-Cable及NOW TV 直播足球賽事、包場派對及代訂餐飲到會服務等。一個地方享受全方位優閒及娛樂服務，是公司活動、家庭聚會、良朋歡聚、悠閒玩樂不二之選。
開放時間
12:00 NN – 12:00 AM『敬請預約』
地點
觀塘 (KT1) 觀塘興業街14號永興工業大廈12樓C1室
觀塘 (KT2) 觀塘開源道62號駱駝漆工業大廈1座10樓A室
收費觀塘 (KT1)
查詢電話︰5405 4579
電郵︰[email protected]
網頁︰http://theballroom.com.hk
(以上資料更新至文章當日)
