【深圳親子遊】 2日1夜深圳觀瀾湖超詳盡行程懶人包 生態園+卡丁車+彈床應有盡有
撰文：鄭小b之成長日誌|編輯：KM
其實過往都擔心帶小朋友上大陸玩，第一當然係安全問題，其次就係衛生問題。所以咁耐以嚟，都係帶過小b去過一次大陸，仲要係即日來回。
不過嚟過深圳觀瀾湖之後，真心覺得好好玩，充滿大人細路都啱玩嘅玩意，有高爾夫球場、手藝工廠、生態體育園、觀瀾湖新城，全部都有免費穿梭巴士可以到達，車程最多都係5分鐘，好方便，好適合一家大細嚟，而且2日1夜係玩唔哂！好期待可以好快有下一次，再嚟玩！
好喇！而家就等我分享我哋呢個2日1夜，食、住、玩嘅盡興行程！
首先，講下交通方面，我哋就喺太子坐皇崗巴，喺皇崗過關後就去到17號舖觀瀾湖穿梭巴士候車室登記，等穿梭巴士到酒店 (車程約40分鐘)。由屋企起步計，我哋用咗兩個鐘多啲就嚟到，係方便嘅！
到達酒店隨即check-in 上房。
酒店周圍環境十分像東南亞嘅Resort！
酒店另一個泳池及康樂中心▼
我哋入住嘅係高級客房，其實係酒店最普通嘅客房。
房間挺大、舒適，唯獨冷氣唔夠涼。
▼有浴缸及淋浴間
▼泡茶用品。
留意:茶葉需收費的。
好舒服嘅園景^^
放低行李後，我哋就去咗酒店入面嘅<山景閣>食午餐，而第二日同樣都係<山景閣>享用自助早餐。
海南雞飯▼
去骨的海南雞皮爽肉質嫩滑，正！
肉骨茶▼
藥膳味濃郁，排骨入哂味！
韓式薄牛肉飯▼
醬汁味道好好，薄切牛肉好入味，值得一試！
福建鮑魚海鮮燴飯▼
用料非常豐富，有鮑魚、鮮魷、蝦肉、瑤柱、花菇，芡汁味濃好送飯，小b爸讚呀！
蟹肉薄餅▼
有驚喜，相當好食，推介俾大家！
印尼炒飯▼
小食併盤▼
串燒併盤▼
另外，酒店入面還有中菜廳<駿豪軒>，聽聞餐廳嘅北京片皮鴨及錦繡芙蓉山桃膠都好出色，下次有機會一定要試下。
食飽飽，當然起行去玩去放電啦！
正正我哋係週末嚟，所以玩樂嘅第一站就係體驗觀瀾湖嘅週末親子廚藝班，製作迷你香蕉蛋糕。
小b做得有板有眼，抵讚！
同時都讚下自己 (haha^^)，平時經常同小b一起入廚，所以佢可以自己做到。
地點: 綠茵閣
時間: 星期六、日及公眾假期 14:00-15:00
*留意番親子廚藝班係先到先得。
第二站，我哋由酒店坐穿梭巴士來到觀瀾湖新城，嚟到爸爸期待嘅酷跑卡丁車！
其實媽媽我都好期待兼緊張，因為我未玩過，唔知我揸唔揸得掂？手腳係咪會唔協調？！
大人及小朋友頭盔均有提供。
使用前必須戴上頭套，以確保衛生。
Yo! 出車喇！
評價: 場新，賽道闊; 人流唔多，唔洗排隊; 可親子駕駛飛馳，小b超興奮！！
而我未玩過，一開始就炒咗兩次，之後上咗手，原來揸車係咁爽嘅。
**觀瀾湖繽紛親子度假套餐已包酷跑卡丁車一次
第三站:反彈蹦床公園
不得了！一入到場，興奮到爆燈！
地方超大，面積達2000平方米，有蹦床區、彩虹繩網陣、攀岩區、蹦床籃球區、海綿池區、波波池區、海盗船區、滾軸滑梯等，放電量達至100%！小b玩咗45分鐘已經無電！
2樓配有休息觀看區，係大人看小朋友玩嘅最佳位置。玩得攰亦可以喺度休息一陣再玩過！
好好笑！！小b爸好努力將自己痴上牆上！
攀石牆▼
海盜船、波波池▼
滾軸滑梯▼
彩虹繩網陣▼
地點：觀瀾湖新城L3
開放時間：10:00am-10:00pm
收費: RMB$188 (1大1小)，額外大人RMB$30一位，亦有提供全日門票。
*必須穿著底部有防滑膠粒的襪進場，如沒有準備，可即場購買RMB$10 一雙防滑襪*
除咗卡丁車、蹦床公園外，商場入面還有親子樂園、溜冰場 (冰堡國際滑冰場)、保齡球場、地下樓層仲有個超大型嘅波波池！非常之吸引！但我哋玩完蹦床成個人都已經散哂兼好肚餓！
晚餐我哋就到觀瀾湖新城附近，一間有質素嘅西餐廳-Patio café用餐。
裝修帶英倫風，十分舒適，還有live band註場，食物質素有水準，價錢一啲都唔貴，極力推介！！
養生沙律▼
採用各種新鮮嘅時令蔬菜，不僅顏色鮮豔，再配埋秘制嘅意大利油醋汁，好清新，酸酸甜甜，非常開胃。
Roasted Chicken燒雞▼
巴迪奧漢堡▼
麵包好鬆軟，中間嘅牛肉餅厚實多汁，夾著生菜、番茄同酸黃瓜，口感豐富不油膩。
蘑菇湯、海鮮Pizza、甜品
************************************************
第二日，喺<山景閣>享用完自助早餐後，10點半就出發再去玩！
第一站，我哋做下手作仔！呢一個環節好啱媽媽我呀！
我哋坐穿梭巴士去到觀瀾湖新城旁嘅手藝工場。
一整幢都係手藝工場，地下就係賣手工藝品，
而樓上則是手藝工場，內有玻璃、皮藝、布藝、陶藝、紙藝、木藝、金工、活字印刷！大家可以參與其中，製作專屬自己嘅手工藝品。
木藝▼
陶藝▼
金工▼
我哋就參加咗「活字印刷」工作坊、做紙畫，同埋我想咗好耐嘅皮革製作，可以完我所願親手製作一個皮革卡包給小b爸。
古代印刷藝術「活字印刷」▼
紙畫製作▼
皮革製作班▼
正在處理皮革表面及皮邊。
刻字需由導師代勞。
我親手製作給小b爸的皮革卡包，完成喇！▼
地址：深圳市龍華新區觀瀾湖新城購物中心旁手藝工場
開放時間:
平日 10:30am-7:30pm
周末及假日 9:30am-7:30pm
**觀瀾湖繽紛親子度假套餐已包藝工廠傳統手工藝項目 (六選一)，約1-1. 5小時。
手工藝項目：馬克杯墊(1份)、橡皮章(1塊)、筷子製作 (1對，不含盒子)、木片彩繪(1個)、貝殼世界 (1件)、軟陶小公仔 (1個)。
第二站:生態體育園
園內有多種設施: 有兒童遊樂場、射箭、摩天輪、機動遊戲、太空漫步、滑行龍、海盜船、碰碰車、水上手搖船、藝術品展出等等，也有小小嘅動植物區，足夠大人小朋友玩足大半日，係個親子同遊嘅好地方。
園內隨處可見的紙傘陣▼
兒童遊樂場▼
不同高度的巨型鐵皮滑梯
射箭 ▼
看！小b爸的英姿！
(hahahaha) 老公，你好型呀！
小小嘅動植物區▼
有兔仔、羊咩咩、豬BB
仲有小馬、松鼠、鴕鳥。
從未如此咁近距離>o<
機動遊戲區▼
太空漫步▲▼
碰碰車▼
我同小b爸好耐無玩過碰碰車喇！
今次可以同小b一齊回味我哋嘅童年回憶！
開放時間：
平日: 11:00am-6:00pm
周末及假日: 9:00am-6:00pm
**觀瀾湖繽紛親子度假套餐已包觀瀾湖生態體育園入場券及機動遊戲的遊戲飛：
成人項目: 摩天輪、太空漫步、海盜船、槍林彈雨 (10發)、碰碰車、滑行龍、木馬、射箭 (10支)
兒童項目: 兒童城堡、旋轉木馬、自控飛機、風車王國、花果山漂流、叢林射擊(10發)、碰碰車、摩天輪、滑行龍
更多有關觀瀾湖嘅詳情或訂購觀瀾湖度假套餐，請到以下網址:-
https://lihi.cc/ixIhp
