秋日4大靚景單車遊
大埔單車自由行
不少人到大埔踩 單車 ，路線通常都係大埔墟踩入大美督，又或者踩去大圍、沙田，不過，如果家長帶住小朋友踩，最方便及安全一定是吐露港旁的海濱公園。先在大埔火車站旁的 單車 舖租單車，成人一般五十至六十元，小朋友單車則約廿元，便可踩一個下午，最遲七點交車。由大埔墟火車站，沿廣福村方向前進，穿過林村橋，便到海濱公園的入口。
揀車要訣
由於不是「自家車」，為小朋友租 單車 時就要留意兩點， 首先是車架高度，小朋友坐在座墊上，由大人將車子扶正，讓腳踏板移到一上一下的位置，其中一隻腿平放在下方的腳踏板上，而踏在下方腳踏板的那隻腿，自然擺直並略為彎曲，是最適高度，如此一來，雙腿在踩踏時，才能有充裕的伸展空間。另外，在車頭加上單車鈴，可以提醒前面的路人閃避，避免衝撞意外。
在踩入海濱公園之前，提議先來一個尋幽探勝，講的是位於吐露港與海濱公園的入口旁的元洲仔，由一條小路引入，踩 單車 入去只需兩分鐘，就會去到一個小碼頭，這裏面對全海濱公園，站在此可以飽覽吐露港景色，景色迷人，而且岸邊更可看到不少白鷺飛翔及覓食。
海濱公園草地樂
不想行程淨係一路向前踩，海濱公園另一好處是除了有長長的 單車 徑外，仲有不同的活動區，好似擁有翠綠的草地亦是賣點之一。整片草地盡在視線內，可以放心給好動的小朋友光着小腳漫步，又或者在草地上盡情奔跑、翻滾，有時一家靜靜躺在草地上，看看天上的白雲，數數眼前飛過的小鳥，呼吸着撲鼻而來的青草味，一起享受着草地與陽光帶來的一絲愜意。
懷舊火車博物館
踩完海濱公園，可以沿往林村河的 單車 徑繼續行，約十五分鐘便會去到太和橋，穿過太和橋就可以到達大埔墟火車博物館，此時，將單車鎖在橋旁的單車停泊處，便可入場遊玩一番。這個博物館在1984年被列為法定古蹟，面積有六千五百呎，場內有舊式火車，有鐵路，仲有專室介紹火車的種類以及當年火車站的設施。
跟團睇盡南生圍靚景
本地的眾多 單車 旅行團中，Bike Travel 是最早開辦本地及海外 單車 團的團體之一，當中最多人報名的導賞團就是南生圍一日遊。該路段勝在以平路為主，極少上落斜位，啱晒新手或一家大細一齊踩。但由於行程起點和終點都係錦上路嘅車店，一來一回計埋有成40公里，對體力有一定的要求。此團行程頗為豐富，由頭到尾需時約七個半個鐘，幾乎踩足半日，所以要一早九點幾開始出發。雖然要早起身苦了身子，但眼睛就絕對有回報，皆因行程景點實在靚到不得了，真係隨便影一張都係靚相！第一站去完水尾村睇百年樹屋熱吓身，跟住就係最多景點嘅南生圍，荷塘、濕地、沙洲、樹林、草地、水渡等，都係必去景點，不時有龍友山長水遠入嚟影相！呢個團仲包一餐午飯，可以在當地居民嘅魚塘內食新鮮農家菜，出面有錢都未必食得到！食完飯後，踩埋入去邊境路，就完成整個行程，返到錦上路就開始入黑，時間啱啱好！
Bike Travel
文化薈萃南生圍 單車遊
費用： $168/位（大小同價，包午膳及所有入場費。租單車需另加$55）
地點：元朗錦上路跳蚤市場C22 舖
電話：2470 2138
網址：www.biketravelltd.com
備註： 必須佩戴單車頭盔，建議自備單車及頭盔。
地膽帶你踩入流浮山
除咗踩 單車 睇靚風景外， 單車 生態遊亦夠gimmick，元朗區內另一間開辦 單車 導賞團的社企Biciline，帶隊的都是在區內長大的後生仔，絕對是地頭蟲，帶大家鑽盡區內鮮為人知嘅景點。其 單車 團的路線選擇多，除南生圍外，流浮山及白泥兩條線都十分吸引，但由於某些路段需要穿梭馬路，更要在海邊的路段上坡落斜，所以有一定危險性，算是中級難度的路線，較適合有經驗的朋友。雖然兩條路線和景點有部分重疊，但仍然保持各自特色。
前者的流浮山線，路程總長32公里，由元朗來回流浮山大街，需時約5個鐘。主要帶大家一窺本地魚市場的買賣運作、探訪本地唯一的蠔田，更可以即開即燒鮮蠔，一於買埋土產咸魚返歸做手信！而另一白泥線就明sale 日落景色，而且路段亦較短，回程又有車接送，路程為28.7公里，時間只係長多兩個鐘，而主要的精華景點都在尾段。所謂「黃天」不負有心人，山長水遠踩到入下白泥，無非係為咗睇個靚靚鹹蛋黃。夕陽西下再加多個淺灘，名副其實「漁火閃閃擦浪濤」，難怪經常有新人到此拍婚紗照。筆者建議大家最好五點正之前到埗，因為大約只有半小時俾大家影相，記緊把握時間！
BiciLine
流浮山蠔田生態之旅、
白泥日落美景之旅
費用： 流浮山$220/ 位、白泥$245/位（包午膳、單車及頭盔）
地點：元朗鳳翔路5號大廈地下4號舖
電話：2478 3880
網址：biciline.tungwahcsd.org
免費單單公園推介
如果怕小朋友太細不方便，又或者未學識踩 單車 ？唔使愁，其實有不少 單車 公園都好好玩，場內設施各有特色，而且較其他沿馬路而建的 單車 徑安全得多，家長可以放心跟小朋友一齊踩。
蒲崗村道公園
簡介： 2012年初啟用，設有全港最具挑戰性及難度最高的BMX 單車場，全港第一條長約1公里的高架單車徑，以及適合初學者使用的單車園地。
地址：九龍鑽石山蒲崗村道公道內
時間：8am-10pm
查詢：2320 6140
註： 凡進入BMX 單車場使用設施的人士必須佩戴單車硬殼頭盔，及需要BMX 單車場使用許可證。
賈炳達道公園
簡介： 1個佔地2,800平方米的兒童單車徑，場內的設計色彩鮮艷十分可愛，是一個專為小朋友而設的單車主題遊樂場。
地址：荃灣永順街59 號
時間：7am-11pm
查詢：2408 9592
九龍灣公園
簡介： 05年落成，設有一條不銹鋼單車橋，劃有初學者練習區，並有單車租賃服務。
地址：九龍九龍灣啟禮道
時間：7am-11pm
查詢：2341 4755
撰文:林斌, Angela
攝影:Clay Lam,黃大立
※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。
