【親子好去處】Super Park 6大全新遊戲率先睇
撰文、圖：Kammy
【親子好去處】SuperPark 6大全新遊戲率先睇
1. 益智AR遊戲
難度：★★☆☆☆
率先為大家介紹呢個AR玩意《智能老師》，當中包含住超過20個互動體育娛樂小遊戲，其中更有啲遊戲係以教學課程為主，小朋友可以一路玩一路學新知識。另外，AR遊戲提供8個波，畀小朋友可以分組玩遊戲，可以學下同其他小朋友合作！
《智能老師》提供先進嘅視聽效果，令小朋友好快就投入於遊戲之中，而呢個遊戲除咗好考體力之外，仲好考團隊合作同智力，絕對啱晒小朋友去玩！另外，玩嘅遊戲場地較大，唔使驚小朋友會有碰撞，十分安全！
2. iWall
難度：★★☆☆☆
iWall係以創新嘅方法使用行動感測技術研發出嘅多面性遊戲，當中包括有Parkour（飛躍道）、Shadow Master（太極）等7大遊戲。呢個遊戲可以同時畀兩個人一齊玩，而且為大家有嚟唔少嘅健康益處，除咗考大家嘅力度、速度、同手腳協調外，仲可以提高彼此間嘅合作性添！
小朋友要靠做唔同嘅同作去獲取分數，絕對考小朋友嘅體力同專注力，只要用一陣就已經玩到出晒汗喇！
3. 超級智能拳手
難度：★★★☆☆
唔少嘅親子好去處都較少有打拳遊戲玩，但其實唔少人都好鐘意玩打拳嘅遊戲，因為每一次擊中個目標都會好大成功感，而呢個「超級智能拳手」就正正畀到呢種能覺大家！呢項人工智能遊戲，可以教你點樣改善手眼協調、平衡力同準確度，當中提供沙包模式或拳手模式，而且可按照個人嘅喜好去調教唔同嘅難度！
不過，值得注意嘅係，呢個打拳遊戲要有140cm高先可以玩！呢個遊戲都真係好考個人體力，因為呢個「超級智能拳手」真係好似捉到路咁，知道你下一秒會點出拳，反應能力隨時比玩家仲要快，而玩家亦要好專注咁睇下幾時可以出拳攻擊對方，真係極高挑戰性！
4. 彈床大激鬥
難度：★★★☆☆
親子好去處有好多嘢玩，但跳彈床唔係人人都有接觸過，所以小朋友可以喺呢度一嚐跳彈床嘅體驗，而呢個跳彈床遊戲仲加入咗運動遊戲科技，可以透過個人或2位玩家一齊玩一系列嘅互動任務遊戲。另外，場內會有職員教授彈床嘅基本技巧，令小朋友可以更易掌握，從而提升玩遊戲嘅技術。
此外，每個彈床都只限一人進入，加上有職員在旁睇住，家長可以放心！
5. 忍者障礙賽
難度：★★★★☆
相信有唔少人都有睇過外國節目Ninja Warrior，而呢個忍者障礙賽就正正仿照節目內嘅挑戰，當中包括10種唔同嘅元素，如拳爬、跳躍等，以及入門級到專家級嘅唔同障礙賽，喺呢3個障礙陣中設有7大障礙，極考玩家嘅體能！
6. 攀石賽道
難度：★★★★☆
記者就認為呢個攀石賽道係6個新遊戲中難度最高嘅，只因呢個好考大家嘅膽量！如果小朋友畏高就一定唔玩得喇！攀石賽道設有4個攀石牆，由唔用嘅大細嘅扶手設計，難度亦從此增加，玩家要慢慢咁爬上頂部，再拍完成鍵就挑戰成功！
玩家玩之前一定要做好安全措施，職員會為大家裝備好安全帶！
