阿方士多啤梨園免入場費任摘士多啤梨＋粉嶺壁畫村/芒草園打卡
廣告
阿方士多啤梨園｜又到咗士多啤梨嘅季節啦，有唔少士多啤梨園都開放俾小朋友摘士多啤梨。通常士多啤梨園都不外乎喺元朗、錦田等，不過呢類農莊大部分都會好多人，今次Blogger My Double Rainbow 同大家介紹一個遠少少係粉嶺嘅隱世農莊，會比較少人，就係阿方士多啤梨園啦！
阿方士多啤梨園｜士多啤梨＋多款蔬菜
一入到去有個魚塘，魚塘旁邊有隻小白兔，仲有草可以俾小朋友餵食，仲有個姐姐喺度賣蔗汁。阿方士多啤梨園地方較大之餘，地方都算好乾淨唔會搞到成腳泥，除咗士多啤梨仲有其他蔬菜選擇，例如生菜、娃娃菜、油麥菜等等，當然要睇返當造時間。
阿方士多啤梨園｜免入場費 每磅計算
今次我哋摘嘅士多啤梨雖然相對唔算非常大粒，但係勝在粒粒夠紅，本地士多啤梨嚟講都算甜。最重點係阿方士多啤梨園唔收入場費，摘幾多買幾多，每磅計算。執完士多啤梨仲可以喺就近雲泉仙館後面檔攤買一啲乾貨同零食返去。
阿方士多啤梨園｜坪輋壁畫村＋粉嶺芒草園
摘完士多啤梨我哋去咗附近坪輋村又名壁畫村行下順便影相打卡，呢度平路較多同埋有容易行對於幼兒來講相對容易照顧，不過好多村民住緊所以記得要安靜免得滋擾當地村民。
之後我哋仲行咗去芒草園影吓相留念，但可惜芒草季節已經過所以剩返好少，唯有下年再嚟過啦。
阿方士多啤梨園點去？
於粉嶺港鐵站轉乘小巴52k於雲泉仙館站下車
阿方士多啤梨園需要入場費嗎？
是免入場費的
撰文： My Double Rainbow 圖片來源： My Double Rainbow
